文／謝宜庭，桃園客家人（四縣腔）
吾屋下附近有一隻細細个市場，細罔細，毋過賣个東西乜拗蠻多，青菜、果子、雜貨摎衫褲項項齊，朝晨頭買菜、賣菜个人尖來尖去、喊價剁價聲噦噦嘶嘶，歸條街路鬧熱煎煎。差毋多愛到十點空仔，人漸漸散忒哩，就變做一個做得渡細人仔去定定仔行、慢慢仔逛个細市場哩。
記得妹仔還細時節，輒輒分吾家娘揇等來逛市場，市場肚做生理个頭家，大部分係家娘熟識个鄰舍摎老朋友，佢就一路緊行緊打嘴鼓，吾妹仔就分人一路請，一張嘴食無停，逐擺都對第一攤—滷味攤開始食滷豆腐干、滷卵，又行去賣烰菜个攤仔食烰蕃薯，過行去南北雜貨攤食豬肉乾……食到盡尾攤係賣糖仔个，又分頭家請一大扡糖仔，逐擺都食到飽??仔；大家都知妹仔係有名个好噭嫲，見看著佢都會撩佢講：「好噭嫲生到恁得人惜，仰會恁好噭？來來來，?請你食糖仔，暗晡頭斯莫噭到大嫲聲吵人睡目哦！」細人仔有糖仔好食，就歡喜到暢蹀蹀仔，哪有聽大人在該講麼个啊。
吾家娘一禮拜有幾下日，會在這細市場裡肚賣扁食，佢輒輒會講，賣食个除忒愛分人阿腦好食，還愛知得俗話講个「秤頭係路頭」个道理；做生理愛公道，斤兩愛足、毋好批人，人客正會緊來緊多，正會賺有錢。還過對逐儕人客都愛有耐心，老古人講：「嫌貨正係買貨人。」莫因為自家無耐心去跌失人，該就河壩跑馬—壞蹄哩，這兜都係家娘做生理个孔竅。係講做得分人客買到歡歡喜喜，輒輒過來交關生理，該頭家就做有成功哩。
市場肚个頭家，大體會用賣个東西个來喊名仔，賣麼个就安到麼个名仔，像吾家娘賣扁食就安到「扁食嫂」，賣雞卵糕个就安到「雞卵糕仔」，當生趣。生理好个時節，輒輒會?摎你?賣、你同??顧攤，互相照顧；生理毋好个時節，就打嘴鼓、譫誃做伴尞。有成時，佢兜還會用自家無賣忒个，斗換其他頭家个東西轉屋，互相來交關生理。
家娘係有伸較多个扁食無賣忒，收攤收好就會一路?等推車，在市場項用扁食摎其他攤仔个頭家換兜仔青菜抑係肉轉屋下；若係扁食賣忒哩，就用較便宜个價數，買當多个菜、肉摎果子轉來，成時係豬肉攤無人交關个膨蹄，成時係水果攤無賣忒个朳仔。有恁多菜，朝晨頭就毋使專專去市場買菜哩。逐擺看家娘帶麼个東西轉屋下，就知得該日市場肚麼人个生理無異好，大家人摎佢?銷，分佢做得安心收攤轉屋下，人講：「人情好，食水甜。」盡靚个風景，就在這位。原來細細个市場裡背肚，毋單淨有淰淰个貨品，還囥等大家互相關心、醹醹个人情味。
華語
住家附近有一個小小的市場，小歸小，但是賣的東西也非常多，青菜、水果、雜貨跟衣褲樣樣齊全，早上買菜、賣菜的人擠來擠去、喊價殺價聲大聲的喊來喊去，整條街熱鬧非常。差不多要到十點多，人潮漸漸散去，這裡就變成一個可以帶著小孩慢慢走、細細逛的小市場了。
記得女兒還小的時候，常常被分婆婆抱著來逛小市場，市場裡做生意的老闆們，大部分是婆婆熟識的鄰居跟老朋友，她一路邊走邊聊，女兒就讓人一路請客，一張嘴吃個不停，每次都從第一攤—滷味攤開始吃滷豆腐干、滷卵，又走去賣炸菜的攤子吃炸地瓜，再走去南北雜貨攤吃豬肉乾……吃到最後的攤子是賣糖果的，又被老闆請了一大把的糖果，每次都吃得很飽；大家都知道女兒是有名的愛哭包，每次看到她都會逗她說：「愛哭包長得這麼可愛，怎麼會這麼愛哭啊？來來來，我請你吃糖果，晚上就不要再這麼大聲哭、吵人清夢喔！」小孩有糖果可以吃，就高興的不得了，哪有在聽大人講了什麼啊。
婆婆一週有幾天會在這個小市場裡賣餛飩，她常常說，賣吃的東西除了要讓人誇獎好吃，還要知道俗話說的—「秤頭就是路頭」的道理；做生意要公道，斤兩要足、不能佔人便宜，客人才會越來越多，也才會賺錢。還有對每個客人都要有耐心，俗話說：「嫌貨才是買貨人。」不要因為自己沒耐心而得罪人，那就糟糕了，這些都是婆婆做生意的秘訣。如果可以讓客人買得開心，常常再回來買，那這個老闆做得就算成功了。
市場裡的攤販老闆們，大部份都會用賣的貨品來稱呼彼此，賣什麼就叫什麼名字，像我婆婆是賣餛飩的，就被稱為「餛飩嫂」，賣雞蛋糕的就被叫做「雞蛋糕仔」，非常有趣。生意好的時候，他們常常會我幫你賣一下、你幫我顧攤一會兒，互相照顧；生意不好的時候，就一起說說話、聊聊天，彼此陪伴。有時候，他們還會用自己沒賣完的東西，來交換別人的貨物帶回家，來照顧彼此的生意。
婆婆如果剰下比較多的餛飩沒賣完，收攤後就會一路推著推車，在市場裡用餛飩跟其他攤位的老闆交換一些菜跟肉回家；如果餛飩賣完了，她就會用比較便宜的價格，買許多的菜、肉跟水果回來，有時是豬肉攤沒人買的蹄膀，有時是水果攤沒賣掉的芭樂。有這麼多菜，早上就不用再特地去市場買菜了。每次看到婆婆帶什麼東西回家，就可以知道那天市場裡是誰的生意不太好，大家幫他一起買光光，讓他也可以安心收攤回家，人說：「人情好，喝水甜。」最美的風景，就在這裡展現出來了。原來小小的市場裡面，不只有滿滿的貨品，還藏著大家彼此關心、濃濃个人情味。
