文／黃筱婷，竹東客家人，這下戴竹東鎮（腔頭：海陸腔）
臺三線又安到「內山公路」，這條路經過當多个客家鄉鎮，充滿醹醹个客家風情，前一駁仔還舉辦了「臺三線藝術季」，摎?兜豐沛个客家文化用各項無共樣藝術个形式來展覽，這項活動辦到盡成功，當多人都來參觀這兜純樸个客家莊。新竹縣陸豐國小係這擺「臺三線藝術季學校」个其中一隻學校，藝術季學校个校長馮天蔚先生，渡盡多藝術家來到陸豐國小，教學生仔進行藝術課程，大自家共下創作出「棕簑貓仔」這大嫲隻牯个裝置藝術。
棕簑貓仔係一種灰色个保育類動物，佢兜个面上摎頸根有著白色个花紋，平常時好食毛蟹，乜當好食魚仔、蝓螺、?仔還過各種蟲仔，棕簑貓仔當會泅水，所以頭擺在偎兼陂塘个地區，輒常看得著佢兜，毋過今這下个環境汙染緊來緊嚴重，棕簑貓仔个數量緊來緊少了，?想這下當多人應該從來毋識看過棕簑貓仔呢。
藝術家分學生仔用學校輒常看得著个蟲仔做主題，來做白色个圓缶仔，愛準做棕簑貓仔个白色花紋，大自家撚出揚蝶仔、囊蜺仔、花蛄仔、雞油蛄這兜作品，撚到當歡喜，續等藝術家帶等學生仔來到學校對面个田項拈禾稈，大自家共下摎禾稈放在教室頭前，準備愛摎禾稈䌈起來，首先愛用左手拿一抓禾稈，續等要摎禾稈䌈緪，恁樣禾稈正毋會四四散散；正開始个時節，學生仔都分禾稈刺到緊講身體當癢，但係在經過幾下日煞猛做，學生仔總算摎棕簑貓仔歸身灰色个毛全䌈好了。
等到藝術家摎棕簑貓仔个樹仔骨架鬥好勢，學生仔擎等䌈好个禾稈，摎棕簑貓仔个禾稈毛細心細意个䌈到樹仔搭个骨架頂背，小朋友講愛摎棕簑貓仔个肚屎䌈多一息个禾稈，恁樣佢个肚屎正會膕出來，看起來斯還較得人惜了，無想著這兜小朋友都當有創意呢。
看著自家辛苦做个禾稈棕簑貓仔，逐隻學生仔都當歡喜，大自家都企到禾稈棕簑貓仔个脣頭來欣賞，希望學生仔做得在這擺个藝術體驗活動當中，為著保育類个動物盡一份心力，乜希望人類做得分這兜得人惜个動物一隻安全無汙染个環境。
華語
臺三線又叫做「內山公路」，這條道路經過許多的客家鄉鎮，充滿濃厚的客家藝術風情，前陣子還舉辦了「臺三線藝術季」，將我們豐富的客家文化以各項不同藝術的形式進行展示，這項活動辦得非常成功，很多人都來參觀這些純樸的客家庄；新竹縣陸豐國小是這次「臺三線藝術季學校」的其中一所學校，藝術季學校的校長馮天蔚老師，帶領許多藝術家來到陸豐國小，教導學生進行藝術課程，大家一起創作出「食蟹獴」的巨大裝置藝術。
食蟹獴是一種灰色的保育類動物，牠們的臉上和脖子有著白色的條紋，平常喜歡吃螃蟹，也很喜歡吃魚類、蝸牛、青蛙還有各種昆蟲，食蟹獴非常會游泳，所以過去在接近池塘的地區，經常可以看到牠們的身影，但目前的環境汙染愈來愈嚴重，食蟹獴的數量越來越少了，我想應該很多人應該都不曾實際看過食蟹獴呢。
藝術家讓學生用學校經常可以看到的昆蟲作為主題，來製作白色的圓形陶器當作食蟹獴的白色條紋，準備要當作食蟹獴的白色條紋大家開心捏出蝴蝶、蜻蜓、瓢蟲、獨角仙這些作品；接著藝術家帶領學生來到學校對面的農田裡收集稻草，大家一起把稻草放在教室前方，準備開始把稻草綁起來，首先要用左手拿一把稻草，接著要把稻草綁緊，這樣稻草才不容易散落四處；剛開始的時候，學生都被稻草刺得直說身體好癢，但是在經過幾天的努力之後，學生總算將食蟹獴全身的毛髮全部都綁好了。
等到藝術家將食蟹獴的木頭骨架拼裝完成，學生們拿著之前綁緊的稻草，將食蟹獴的稻草毛皮謹慎小心的綁到用木頭搭建的骨架上，小朋友還說要在食蟹獴的腹部綁多一點的稻草，這樣牠的肚子就會圓嘟嘟的，看起來就會更加可愛了，沒想到這些小朋友都非常有創意呢。
看到自己辛苦製作的稻草食蟹獴，每個學生都非常開心，大家都站在稻草食蟹獴的旁邊欣賞；希望學生能夠在這次的藝術體驗活動中，為保育類的動物盡一份心力，也希望人類能夠給這些可愛的動物們一個安全沒有汙染的環境。
