文／鍾孝昇，國小教師、中壢客家人，這下戴中壢（四縣腔）
避暑開始了，學生仔總算做得暫時歇睏一下，享受「閒神野鬼」个趣味。毋過?兜龍岡國小个六位小朋友，無因為放尞，就摎學習停跎，因為?兜今晡日來到電視攝影棚，參加客家電視台「奧林P客」節目个錄影，學習新色个客家話。
來到攝影棚，當嚴條个門禁管制，分頭一擺到電視台个?兜，試著有兜仔緊張。毋過工作人員當熱情个招呼，細人仔毋單淨順利化好妝，同時乜做了彩排，在主持人个帶領下，就開始錄影了。
講著《奧林P客》這隻節目係當長壽个兒童節目。從2007年開播，既今有十過年个歷史了，乜係客家電視台盡有名个節目。細人仔在該搞个過程中，聽、講客家話，分客語个學習變得新色過生動。
《奧林P客》有兩位主持人–郎祖筠小姐摎徐淳耕先生。講著郎祖筠小姐，大家都喊佢，安到「郎姑」。毋過，大家定著當好奇，華語恁正板个郎姑，客語仰會講到恁湛斗？
原來郎姑个阿姆係中壢客家人，郎姑從細就歇在客家莊，客家話講到當滑溜，故所佢主持客語節目，當熟手。郎姑還過摎老弟共下，為客家電視台製作戲劇《上家下屋》，歸屋家人都盡用心傳承客家文化呢。
節目一開場，郎姑帶等小朋友入場。毋過，除忒小朋友，?兜還渡等兩條校狗「來瘋」、「來玩」共下入場。為著愛分過較多个人做得認識「動物保護」个觀念，故所?兜帶等校狗共下來錄影，分享收養流浪犬个經驗，鼓勵大家共下認養流浪狗。
續下來，小朋友就開始搞這兜緊張又刺激个過關遊戲了。
第一關係「好客莫停動」。小朋友輪等摎阿丑琢進行搶答，小朋友愛根據聽著个題目，尋著答案，毋過，在過程中，係講聽著園長个咒語，大家就做毋得停動，若係分園長看著麼儕停動，就愛轉到起點，重新出發。這一關愛考驗个係小朋友个客語聽力。該載在學校，六位小朋友經過一擺又一擺个訓練，故所都聽得識題目，乜尋得著答案，輕輕鬆鬆通過這關。
再過來係第二關「遽兜連線」。在這關，三個小朋友坐在溜崎頂，在看著題目後，愛用客語來形容佢，另外兩位小朋友，根據聽著个內容，尋出相對應个骰仔。毋過，時間一秒一秒過忒，溜崎會越來越遽，等所有小朋友溜下來，遊戲就結束了。這關毋單淨愛考驗小朋友个聽力，口說能力，還有語言反應个能力，都當重要。
初下碼，題目當簡單，還過溜崎乜無恁竳，小朋友還做得輕鬆回答，毋過題目緊來緊難，加上溜崎越來越崎，小朋友相賽溜下來了，就只伸昊宸一儕人。在這時節，嗄出了一隻「壁蛇」个題目，昊宸正經就像一隻壁蛇共樣，用雙手雙腳，黏核核在溜崎項，在時間結束之前，唸出句子，分另外兩位小朋友摎正確个骰仔尋出來。最尾，五隻題目，都分小朋友講著了。
最尾一關係「客語心連心」，第一位隊員對撙卵機撙出題目來，隊員再過輪等用凌波舞个方式，摎撙卵送到回答區，唸出題目分愛回答个隊員聽，尋出正確个選項。這一關考驗个，毋單淨係智力，還愛考驗大家个筋骨有軟無。該載?這兜來自客家莊个土雞仔，逐儕腰骨都還做得，最尾乜順利過詐，完成三關，得著了盡多个獎品。
在三點鐘恁長个錄影過程中，?正知一隻節目个完成，要當多人个同心協力正做得好勢。就像現場个背景音樂，就係一位專業个音樂先生，配合主持人講話个內容，來彈電子琴。還有一位專業个客語先生，用細人仔个音調，在現場唸出各關个題目，加添節目新色个氣氛。這兜幕後工作人員个付出，都係?兜觀眾在電視面前毋知个生趣故事。
在錄影个過程當中，郎姑偷偷摎?講，佢五月時節乜在桃園市動物保護教育園區，收養了一條流浪狗，這下屋下有三條狗仔，故所，佢特別歡喜?兜帶等狗仔來錄影。?想郎姑毋單淨係一個重視客家文化个藝人，乜係一個對人、對動物有愛心摎耐心个人，莫怪郎姑《奧林P客》這節目一主持，就係十過年个時間，正經無恁該啊。
漫長个避暑開始了，龍岡國小个小朋友，利用參加客家電視台錄影个機會，學習新色个客話，同時乜見識著電視節目錄影个過程，還較重要个係，堵著有共樣理念个主持人。這堂暑假个客語課，正經係得著淰淰个收成。
華語
暑假開始了，學生終於可以暫時休息一下，享受一下「無所事事」的樂趣。不過我們龍岡國小的六位小朋友，並沒有因為放假而停止學習，因為我們今天來到了電視攝影棚，參加客家電視台「奧林P客」節目的錄影，學習有趣的客語。
來到攝影棚，嚴密的門禁管制，讓第一次來到電視台的我們感到有些緊張。不過在工作人員熱情的招呼下，孩子們不但順利化好妝，同時也做了彩排，在主持人的帶領下，就開始錄影了。
說到《奧林P客》這個節目是很長壽的兒童節目。從2007年開播至今，已經有十多年的歷史了，它也是客家電視台最知名的節目。孩子在玩的過程中，聽、說客語，讓客語的學習變得有趣又生動。
《奧林P客》有兩位主持人–郎祖筠小姐、徐淳耕先生。說到郎祖筠小姐，大家叫她「郎姑」。不過，大家一定很好奇，說起華語字正腔圓的郎姑，為什麼客語可以講得這麼好？
原來郎姑的媽媽是中壢客家人，郎姑從小住客家莊，客家話講得很流利，因此他主持起客語的節目，非常上手。郎姑還和弟弟聯手，為客家電視台製作戲劇《上家下屋》，一家人都很用心傳承客家文化呢。
節目一開場，由郎姑帶領著小朋友入場，不過，我們除了小朋友之外，我們還帶著兩隻校犬「來瘋」、「來玩」一同入場。為了讓更多的人能夠認識「動物保護」的觀念，所以我們將校犬一起帶來錄影，並分享了收養流浪犬的經驗，鼓勵大家一起認養流浪犬。
接下來，小朋友就開始玩這些緊張刺激的闖關遊戲了。
第一關是「好客不准動」。小朋友輪流與小丑進行搶答，小朋友要根據聽到的題目，找到答案，不過過程中，只要聽到園長的咒語，大家就不准動，若被園長抓到誰動了，就要回到起始點重新出發。這一關要考驗的是小朋友的客語聽力。幸好在學校，五位小朋友經過一次又一次的訓練，他們都能聽懂題目，並找出答案，輕輕鬆鬆通過這個關卡。
接下來則是第二關「即客連線」。在這一關，三位小朋友坐在溜滑梯上，在看到題目後，要用客語來形容它，而另外兩位小朋友，根據聽到的內容，找出相對應的骰子。不過，隨著時間的過去，滑梯速度會越來快，當所有小朋友滑下來時，遊戲就結束了。這一關不只要考驗小朋友的聽力了，口說能力以及語言的反應能力，都很重要喔。
一開始，題目很簡單，還有溜滑梯也沒那麼陡，小朋友還能輕鬆回答，不過當題目愈來愈難，加上溜滑梯愈來愈陡，小朋友紛紛滑下來了，就只剩昊宸一個人。在這時候，竟出了一個「壁虎」的題目，而昊宸真的就像一隻壁虎一樣，用雙手雙腳，緊緊黏在滑梯上，在時間結束之前，唸出句子，讓另外兩位小朋友將正確的骰子找出來。最終，五個題目，都被小朋友答對了。
最後一關「客語心連心」，第一位隊員從扭蛋機，扭出題目，隊員再輪流用凌波舞的方式，將扭蛋送到作答區，並唸出題目給作答的隊員聽，找出正確的選項。這一關考驗的，不只是智力了，還要考驗大家的筋骨是否軟Q，還好我們這些來自客家庄的土雞，各個腰骨都還行，最終也順利過關，完成了三個關卡，並得到了許多的獎品。
在三個小時漫長的錄影過程中，我們才知道一個節目的完成，需要許多人的同心協力才能完成。像是現場的背景音樂，就是一位專業的音樂老師，配合主持人的說話內容，而彈奏電子琴的。還有一位專業的客語老師，用童趣的音調，在現場唸著各個關卡的題目，增添節目有趣的氣氛。這些幕後工作人員的付出，都是我們觀眾在電視機前所不知道的幕後花絮呢。
在錄影的過程中，郎姑偷偷跟我說，他五月時也在桃園市動物保護教育園區收養了一隻流浪犬了，現在家裡共有三隻狗狗呢，因此，他特別高興我們帶著狗來參加錄影。我想郎姑不只是個重視客家文化的藝人，更是個對人、對動物充滿愛心與耐心的人，也難怪郎姑《奧林P客》這個節目一住持，就是十多年的時間了，真的是不容易啊。
漫長的暑假開始了，龍岡國小的小朋友，利用參加客家電視台錄影的機會，學習有趣的客語，同時也見識到電視節目錄影的過程，更重要的是，遇見了有相同理念的主持人。這一堂暑假的客語課，真的是得到滿滿的收穫。
