衛生福利部按算下禮拜可能就係腸病毒流行期
【蘇佑昇／西湖海陸腔】這幾下日國內新增加1儕腸病毒感染造成併發重症个病例，另外遰著腸病毒个人單淨這禮拜去看醫生个人就超過一萬儕，這隻感染人數乜接近流行期个數字，所以衛生福利部疾病管制署按算下禮拜起勢會正式進入流行期。
疾病管制署乜驚講，這波腸病毒流行期可能會變成毋係單一病毒株主流个病毒，可能會增加感染者重複感染个風險。
疾病管制署疫情指揮中心主任郭宏偉今晡日講，根據疾病管制署監測資料來看，上禮拜台灣因為遰著腸病毒門來看醫生个病人做盡有1萬空66儕，摎上一隻禮拜挷高百分之26，這隻數字已經接近流行期个1萬1千儕了。
衛生福利部發言人羅一鈞表示，這禮拜遰著腸病毒个人次來到1萬空66儕，所以下禮拜就可能係腸病毒流行期，加上今年有3儕腸病毒感染併發重症个病例，所以羅一鈞提醒，因為依照進前个數據來看，下禮拜會係流行期。
到了尞避暑進前會係腸病毒疫情个高峰，所以衛生福利部也會加強摎學校、幼兒園、托兒所、托嬰兒中心，宣導愛分細孲仔煞猛洗手个習慣，避免腸病毒个疫情變嚴重，也請家長愛多加留意屋下細孲仔个身體狀況，假使細孲仔有想愛翻、身體發燒、頭那昂昂、嘴項有爛空、身體痠軟就可能係遰著腸病毒了，一定愛遽遽渡細孲仔去看醫生。
紙風車劇團授權客委會 「雨馬」歌曲
客家親子音樂劇「雨馬」這兩年巡迴34場演出，受著大細朋友熱情个支持，乜成功餳著大家來唱雨馬演出該時个歌曲，這滿演出雨馬音樂劇个紙風車劇團講，因為這兩年長透接著鄉親來問雨馬演出个歌曲，還有希望紙風車做得授權歌曲，分厥兜在合唱比賽唱歌，所以這擺紙風車劇團決定，摎「雨馬」歌曲公開在客委會个「客家雲Hakka Cloud」，變做完全毋使錢，就係希望這兜好聽過歡樂个歌曲做得陪等細孲仔共下成長。
這滿紙風車劇團授權个客家親子劇「雨馬」主題曲，已經全部上傳到網路「客家雲」了，歌曲有「偉大个猴王」、「落水天」、「母親之歌」、「可愛客家話」做盡有4首歌還有歌詞，歡迎大家來下載收聽（https://reurl.cc/2WAvZ4）。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
