搭乘大眾運輸工具免戴口罩首日　多數民眾：還是會戴著！

2023年04月17日

00:00

今晡日坐大眾運輸工具毋使戴嘴揞兒

【蘇佑昇／西湖海陸腔】中央流行疫情指揮中心進前宣布4月17全台灣个鄉親坐大眾運輸工具，毋使過戴嘴揞仔，今晡日就係全台灣坐大眾運輸工具毋使戴嘴揞仔个第一日，毋過今晡日一大早上班上課，記者發現大部分坐捷運、火車、公車个鄉親，大部分个人還係戴等嘴揞仔，淨有幾下儕無戴嘴揞仔定定，記者問這兜還戴等嘴揞仔个鄉親，厥兜講，還係會愁分其他人遰著，也有家長驚細孲仔會遰著腸病毒，所以還係戴等嘴揞仔，保護細孲仔還有保護自家。台北捷運公司表示，雖然坐捷運還係貓空纜車該時，毋會強制旅客過戴嘴揞仔，毋過還係建議旅客坐捷運个時愛戴嘴揞仔保護自家，另外捷運車站還有車廂，台北捷運公司也會繼續維持逐日固定時間消毒，請旅客做得放心坐捷運。

客家委員會舉辦「客家流行音樂產業調查」交流會息

客委會從2021年起勢進行為期2年个客家流行音樂產業調查之後，在上禮拜六4月15該時，特別在台北市南港區台北流行音樂中心卡夫卡舉辦「客家流行音樂產業調查」交流會，現場做盡邀請著20零儕个知名客家音樂工作者參與，像係金曲歌王羅文裕、歌后米莎（溫尹嫦），客委會主任委員楊長鎮也到現場摎大家共同討論交流，希望為客家流行音樂注入新能量。

楊長鎮也講，這擺客家流行音樂產業調查報告，分客家流行音樂當大个啟發，特別係「行銷面」，因為客委會就會知仰般透過跨部會資源整合還有政策輔助个方式，來帶動客家流行音樂介入主流，同時提升音樂製作个品質，這就係客委會未來煞猛个方向，未來客委會也會?手客語流行音樂向「風格多元化」、「平臺多元化」、「政府資源整合放大」這兜方向推動，分過較多人做得聽著客家流行音樂个美好。