台灣沿海陸續發現屍體个消息
【蘇佑昇／西湖海陸腔】內政部部長林右昌今晡日講，2月18起勢到今，在台灣沿海陸續發現20儕个屍體，浮在海脣，其中9儕確定係中華民國籍个人，這9儕台灣人因為自殺還係跌到海竇肚過身，摎偷渡案無關係；另外其他个7儕屍體係越南籍、還有4儕身分還無法度確定，毋過林右昌講，目前个證據看起來，這7儕越南籍摎4儕屍體可能會摎偷渡案較有關係。
林右昌也講，因為今年2月有接著越南偷渡案件个通報，所以內政部警政署也有掌扼歸隻个狀況，目前淨有3儕偷渡个人還吂尋著，警察也全力清查當中。大家也當關心，這隻海脣屍體敢係摎國際个人蛇集團有關係？林右昌表示，這還愛過詳細調查，目前看起來个證據係摎偷渡案較有關係。
珍惜生命，自殺不能解決問題，生命一定可以找到出路。若須諮商或相關協助，可撥衛福部專線「1925」、生命線專線「1995」或張老師服務專線「1980」。
最尾來關心大學申請第一階段結果出來个消息
大學甄選入學委員會今晡日宣布，112學年度大學申請入學管道第一階段篩選个結果出來了，也開放考生做得上網查詢篩選个結果，看自家敢有分進前申請个大學入取了！
今晡日宣布个大學申請第一階段結果，做盡有7萬6千儕个考生來報名，6萬2千儕个考生通過第一階段个篩選，通過篩選个比率係百分之81.71，摎舊年百分之83.12略略仔降下來，平均每一儕考生做得通過2.96個學校科系，這乜係這3年零做得入取最多學校科系个一擺。
甄選委員會講，112學年度申請入學提供5萬5385儕个名額，毋過有7萬6112儕來報名，摎舊年111學年度減少了5238儕，最尾這擺个大學申請，做盡係6萬2194儕通過第一階段个篩選（舊年係6萬7616儕通過篩選），今年个考生平均申請5.57個志願學校科系（舊年係5.71個），最尾平均通過个學校科系係2.9個（舊年係2.88個）。
甄選委員會表示，這幾下年持續受著少子女化个影響，學生人數大幅減少，舊年111學年度申請入學通過率，挷高高達百分之83.12，創下新高个紀錄，毋過今年因為大學縮減名額這兜因素影響，通過率摎舊年相比，有略略仔降下來到百分之81.71。
最尾，徵選委員會提醒，通過第一階段篩選个考生，還係愛參加第二階段指定項目个甄試考試，所以請考生這幾下日愛特別注意有通過第一階段个大學寄發个通知資料，考生也愛在大學規定个時間納甄試个費用，提交相關个證明還係資料，避免影響第二階段个考試。
另外，為著分考生提前瞭解熟練網路上傳（勾選）審查資料个網路作業流程，所以會在4月13到４月19逐日朝晨9點到暗晡頭9點，開放測試系統分考生提前練習，相關个網路操作方式，假使考生想愛知過較多个詳細个說明，做得到大學甄選入學委員會个「申請入學」網站查詢。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
