台灣飛國外班機恢復至疫情前8成　各大航空加開新航點！

2023年03月28日

00:00

台灣機票注文數量恢復到疫情之前个百分之80

【蘇佑昇／西湖海陸腔】世界各國陸續完全開放邊境个措施，所以台灣旅遊業者也觀察著，從邊境開放之後，機票注文个數量也持續增加，恢復到疫情進前个百分之80到90个水準，當多鄉親也早先買明年舊曆春節个旅遊機票，像係年底个機票注文數量就摎舊年同期相比增加了3倍个數量，這滿過持續增加當中。

也因為全世界各國航枋恢復个關係，目前逐間航空公司陸續宣布恢復進前个航線還有增加航枋，易遊網旅遊業者表示，旅遊个路線東北亞部分，日前長榮航空公司恢復飛日本仙台个路線，續下來，星宇航空公司會在4月初1新增加日本仙台个航點，國泰航空會在5月、6月陸續恢復飛台北到日本東京，還有台北到日本大阪个航枋；韓亞航空係從3月起勢，增加韓國首爾个航枋，大韓航空也會定定仔恢復原本所有个東北亞个航線。

另外，歐洲美國航枋个話，易遊網講，星宇航空從4月26起勢做得飛洛杉磯个航點；中華航空个話係恢復飛台北到羅馬之外，在7月18起勢也會新增加台北到捷克布拉格个航點，最尾，東南亞个話，長榮航空會推出菲律賓克拉克機場个全新个航點。