客家戲曲演員蘇國慶為「台三線藝術季」演出 著烏洗披羅、戴烏目鏡高唱〈賣雜細〉
【羅盛滿／新竹竹東海陸腔】榮興客家採茶劇團个客家戲曲演員蘇國慶，頭一擺摎客家後生藝術家彭致穎共下合作參與「浪漫台三線藝術季」！你敢做得想像著烏洗披羅、戴烏目鏡，在市場肚仰般做客家大戲無？蘇國慶在六月份會唱分你聽！
年紀33歲个蘇國慶做客家戲曲表演已經超過20年恁久，在國立台灣戲曲學院客家戲學系還過佛光大學文化資產摎創意學系碩士班畢業个佢，目前係榮興客家採茶劇團个主要演員。蘇國慶雖然係河洛人、從小毋曉得講客，但係佢一隻字一句話个慢慢仔學唱，總算成為客家戲曲鰲人，佢識在2020年藉等演出榮興客家採茶劇團年度大戲《地獄變》裡肚个吳道子（斯係老生）這隻角色，得著台灣文化部「第31屆傳藝金曲獎」最佳個人表演新秀獎。
蘇國慶這擺摎客家後生藝術家彭致穎合作，參與致穎在「浪漫台三線藝術季」个實驗影片个演出，影片名仔安到《市場》，蘇國慶講，做為傳統客家戲曲演員个佢，愛仰般在傳統戲曲摎現代創新之間取得平衡點，重點在必須保留傳統戲曲演員个身段、表情、動作還過唱腔這兜工夫，正有資格講著創新，絕對做毋得為著微毛末節个問題毋練好基本工夫。
斯像這擺拍片个服裝，就算蘇國慶著等洗披羅、打內固帶又戴烏目鏡，摎傳統戲曲表演著个服裝樣仔爭差當多，但係佢在拍片該時，還係堅持保留佢所認為愛做好个傳統本質，恁樣形在鏡頭面前搭配燈光、布景還過各種个視覺特效，正有達到加分个效果，假使單淨倚恃後期製作个特效，演員自家無練好基本功夫，就會變成外背裝到靚靚、裡背空空个空殼餅，同時乜對買票來看戲个朋友當失禮。
這擺拍片主題个名仔安到《市場》，所擇个戲曲係〈賣雜細〉，唱个歌詞內容係根據摎客家區塊鏈團隊个訪談內容，編寫成做得表演个實驗客家戲曲，負責演唱个人分別係傳統客家戲曲演員蘇國慶摎江彥瑮兩公婆，還過來自南非洲个舞台劇演員Palesa這三儕分段演唱，中央還搭配傳統客家戲曲樂師吳岳庭來挨弦仔進行「行弦」串場。
這隻實驗影片《市場》个計畫推算會在今年六月份結束，到時拍好个影片會在藝術季期間展出，希望全國个鄉親朋友莫錯過咧！
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
