全球客家最高榮譽「客家貢獻獎」　即起開放推薦報名至4/28止

2023年02月24日

00:00

客家貢獻獎開放推薦報名个消息！

【蘇佑昇／西湖海陸腔】由客家委員會頒發个全球客家最高榮譽獎項「客家貢獻獎」，從今晡日起勢到今年4月28為止，開放大家來推薦人選，客委會表示，「客家貢獻獎」係從民國96年起勢辦理，到今也來到第10屆，逐屆个客家貢獻獎，全部係經過嚴格慎重个審查會議，經過評審團達成共識之後評選出來，所以打屆个得獎者全部係最做得代表客家新典範个代表，所以客家貢獻獎也係全球客家盡重要个獎項。

今年【客家貢獻獎】分做2類：分別係「終身貢獻獎、傑出成就獎」

「終身貢獻獎」：係表彰在客家事務煞猛25年以上，對國家社會有盡大貢獻，佢个成就乜係社會大眾認同个人，客委會會頒發獎金新臺票100萬個銀，這隻獎項个獎金也目前國內相同級別類型獎項最高獎金个獎項。

續下來係「傑出成就獎」有4類，逐隻類型个獎金係新臺票20萬個銀，這4類獎項分別係研究發展類、藝術文化類、公共推廣類、青年貢獻類，歡迎鄉親遽遽來推薦脣項，敢有在客家對語言、文史、文學、學術研究、藝術、文創產業、文化傳承、公共事務、海外推廣，對這兜事情做出貢獻个人還係團體，一定愛遽遽來推薦報名參選！

台灣股票限空令解除　今晡日挷高15700點

金管會解除限空令這兜穩定股市个措施之後，台灣股票今晡日一開盤就挷高，重新挷高轉來到15700點个關卡，毋過到了臨晝，過跌下來百零點，在15700點个關卡邊仔跳，以上股票訊息做得提供分有投資股票个鄉親參考。

行政院長陳建仁第一擺去立法院報告个消息

行政院長陳建仁今晡日列席立法院會第一擺進行施政報告，陳建仁講，佢會盡命牯做好總統蔡英文交分佢給4大任務，第一係盤整防疫措施穩定邁向疫情之後个新生活，第二係健全社會照顧體系，第三係提升國家基礎建設，第四係推動6大核心戰略產業。
最尾，陳建仁也表示，新个內閣團隊會遽遽展開全面建設，打造一隻「燒暖合堅韌」个台灣，分台灣在下一隻10年，有過較多面對國內國外挑戰个韌性，還有持續領先个競爭力。