文／羅寶貴 新竹市客家人，現下戴頭份 腔調︰四縣腔
看著天時拗蠻好，心又想愛出門去遶尞。逐擺出門就開始細思量，今晡日愛去哪位尞呢？兩公婆討論後決定去苗栗縣獅潭鄉个鳴鳳古道。車仔停在義民廟前，從藍色小屋，行該紅色个新鳳吊橋過，看橋下魚仔洄游，歸群結伴奮力泅往上，團結同心盡餳人。體會人生乜共樣，生命成時有風浪，輒輒堵著困難毋順利，需要刻耐仔向前抵抗，自有一番新个風景。過橋後就看著恁大片盡靚个細蕊花迎風展示嬌容，試著心情當暢快。行向山肚蹶山去，歸路欣賞山林肚个樹仔，山澗坑壢流水聲，水清清魚仔看現現。聽毋知名个鳥仔啾啾滾个聲。
愐起十過年前，渡細人仔來蹶山，到情人谷後直直上，蹶這石碫上去跏跏糾糾，這段山路崎當嶇，跋崎跋到實在還悿，試著四蹄筆直，緊喊毋敢再來了。但係看著該野猴仔跳上跌落，舂上打落山林間，實在還生趣，全家笑到暢靂靂仔，目盯盯緊看。後來因爭倈仔還細打潑賴，毋願再過行往上，仰仔拐佢就毋聽，老公高不將揹等佢，繼續行往上。半路項堵著一個老阿婆，佢對頭屋該片來，準備下山去獅潭街項，買一兜生活用品轉去。
佢講八十零歲了，看來身體還係當砸磳，打嘴鼓講起，回憶後生該央時，雙肩㧡等淰淰个竹筍，行慣古道下山去獅潭街項，摎竹筍賣忒換生活用品。再過原路蹶山轉去頭屋，頭擺生活實在還艱苦哦。
有以前个經驗，?驚著了，這擺行到情人谷選擇行另條个延平古道，這條山路跋崎毋會忒嶇，行起來盡鬆爽，心情好毋多知仔行到還較山肚。青山綠蔭當湛斗，樹林肚日頭花照入來，空氣當好。山肚無看著別人行，兩公婆譫誃話家常，忽然間看著有結石䃗,疑狐這深山肚有人戴過？緊行入去又看著當久以前壞忒个東西，係麽个呢？
老公講係頭擺做農事愛用个覆桶，煞煞查「古哥」，原來係傳統个覆桶，陸續有其他生鹵个農具，還有看著一間伙房屋个老屋跡，無屋頂，老老確確个壁同灶頭還在，在這山林壁角識有人歇，實在無簡單哦！延平古道續等接綠色古道崎較竳，有一細段愛用索仔蹶啊上，到山頂高就係接南長城古道，平平个路盡好行，過接鳴鳳古道下山。續等去獅潭老街仙山仙草店買仙草食，蹶這恁遠个路，盡難忘。當歡喜正駛車轉屋哦！
華語
看到天氣十分好，心又想要出門去遊玩。每次出門就開始仔細想，今天要去哪裏玩呢？夫妻討論後決定去苗栗縣獅潭鄉的鳴鳳古道。車子停在義民廟前，從藍色小屋，走到紅色的新鳳吊橋過，看橋下魚兒洄游，整群結伴奮力向上，團結同心很吸引人。體會人生也是一樣，生命有時會有風浪，需要忍耐向前抵抗，自有一番新的風景。過橋後就看到很大片非常漂亮的小朵花，迎風展示嬌容，感覺心情非常舒暢。走向山中爬山去，沿路欣賞山林內的樹，山間小溪的流水聲，水清澈魚看得清清楚楚，聽不知名的鳥兒啾啾叫的聲音。
想起十幾年前，帶小孩來爬山，到情人谷後直直上，爬這石階上去非常彎彎曲曲，這段山路坡度很陡，爬坡爬到實在很累，覺得四肢無力，一直說不敢再來了。但是看到那野猴子跳上跳下，亂竄山林間，實在很有趣，全家笑的非常高興，眼睛看的直視不移。後來因為兒子還小在那吵鬧，不願意再走上去，怎樣哄騙都不聽，老公不得已揹著他繼續上山。途中遇到一位老婆婆，她從頭屋那邊來，準備下山去獅潭街上，買一些生活用品回去。她說已經八十幾歲了，看起來身體還是很健壯。閒談中聊起，回想年輕那時候，雙肩挑著滿滿的竹筍，走慣古道下山去獅潭街上，賣掉竹筍換生活用品。再原路爬山回去頭屋，以前生活實在非常辛苦呢。
有以前的經驗，我嚇到了，這次走到情人谷選擇另一條延平古道，這條山路爬坡不會太陡，走起來非常舒服，心情好不知不覺往更山內走。青山綠蔭非常美好，樹林內雲縫中灑下的陽光照射，空氣非常清新。山林內沒看到其他人走，夫妻倆閒聊話家常，忽然間看到有築隄防,懷疑這深山內有人住過？越深入又看到很久以前壞掉的東西，是什麼呢？
老公說是以前做農事要用的復桶，趕緊查「谷歌」，原來是傳統的覆桶，陸續有其他生鏽農具，看到一間三合院的遺跡，沒有屋頂，斑剝的牆壁和爐灶還在，在這山林僻處曾經有人住過，實在不簡單啊！延平古道續接綠色古道山勢比較高峻，有一小段要靠繩索攀爬上去，到山頂上就是接南長城古道，平平的路很好走，再接鳴鳳古道下山。爬這麽遠的路程，很難忘。然後去獅潭老街仙山仙草店買仙草凍來吃，非常高興才開車回家囉！
