在阿里山人摎猴个衝突增加 林管處愛建立共存模式
【羅盛滿／新竹竹東海陸腔】元旦該日，台灣山猴仔在阿里山森林遊樂區尋食，害遊客著大驚；嘉義林管處今晡日講，山猴仔毋驚人，造成人摎猴仔个衝突事件增加，已經開始進行分布調查摎防治追走个計畫，愛建立在地化个人猴共存模式。
阿里山國家森林遊樂區沼平車站摎阿里山閣大飯店中央个草坪，元旦上晝出現2隻台灣山猴仔在該挷草來食，面對脣頭个遊客斯像無看着人共樣，大自家試着當生趣，連連續續擎出手機仔摎山猴仔翕相。
嘉義林區管理處表示，遊樂區肚个山猴仔毋驚人，做得講係暢樂合愁慮，暢个係園區个環境適合山猴仔生存，愁个係長透發生人摎猴仔之間个衝突。
嘉義林管處目前个計畫係針對園區肚个山猴仔活動位所進行調查，還過擬定策略，培養林管處員工、在地鄉親、社區解說員、國家森林志工這兜人，了解山猴仔个生態習性，學習追走山猴仔摎防治工具个操作，建立在地化个人猴共存模式。
另外，乜愛加強對遊客宣導正確个人猴相處方式，避免遊客供山猴仔食東西，用多方面改善人摎猴仔个衝突情形，達到森林遊樂區个環境資源永續還過人摎猴仔共存个保育目標。嘉義林管處強調，在阿里山堵着山猴仔，請保持安全距離。
高鐵在春節期間再過加開12枋車仔 後日半夜起勢開放打車單
台灣高鐵今晡日表示，春節疏運期間再過加開12枋車仔，包含下南7枋、上北5枋，加開車枋在後日正月初7該日，半夜12點起勢開放鄉親注文打單。
正月18到30係台灣高鐵規劃為期13日个春節疏運期間，台灣高鐵表示，因為旅客注文打單當踴躍，經過檢視運能調度情形過後，決定再過加開12枋車仔，來加強服務旅客轉家鄉團圓還過年節出門遶尞个需求。
台灣高鐵講，春節疏運期間總下加開454枋車仔，包含下南193枋、上北261枋，總計13日提供2269枋車仔个旅運服務，為着利便旅客提早規劃行程，台灣高鐵企業網站首頁已經公告「銷售資訊」，持續更新疏運期間各車枋對號座个熱銷狀況。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
