文／李秀鳳，新竹客家人，這下戴中壢（腔頭：海陸腔）
12／17這日个天時當毋好，發風落水又冷沁沁，體感溫度正8度定，正經係「打狗毋出門」个寒天。毋過，有一群透風落水拚到竹北「水月拙木」餐廳个客家人，為著來參加《客俳風第二集》新書發表會還有園友共下打鬥敘。
這兩三年來，用客語寫俳句（三行詩）當時行，毋單淨係客委會拿來推廣客家文學个新方式，前一駁仔，臺中市政府客家事務委員會摎靜宜大學中國文學系，也聯合舉辦2022年臺中客家三行詩、客家春聯創作比賽，餳著當多人來投稿。
客家俳句會恁時行，有一個擎頭旗个人，定著愛特別紹介，佢就係彭碧珠，也係《客俳風第二集》个總編輯。彭碧珠係竹東人，28年前，歸家人移居南非德班。兩年前，佢摎洪仁銘兩儕在面書頂高成立《台灣俳句客家定型詩園地》，帶頭鼓勵大家多寫俳句，這下園地裡肚有9百零儕煞猛耕園寫俳。
客家俳句有兩種型式，一種安到575，就係第一行5隻字，第二行7隻字，第三行5隻字。另外一種安到577，就係第一行5隻字，第二行7隻字，第三行7隻字。過加標題4隻字以內，所以，一首三行詩正短短21到23隻字定。
彭碧珠詳細解說：「句尾做得押韻乜做得無押韻，押韻最好係押到自然，毋好為著押韻，影響著主題內容个表達；因為字數恁少，所以，行文儘量毋好重複用字、用詞；題目乜毋好直接用17抑係19隻字裡肚个語詞，避免摎主題內容講到昶清楚。」
洪仁銘續等講：「第一行就係你个目標主題，第二行就係轉折起承，第三行愛摎第一行有對應。」恁樣講起來，寫客俳盡像當好落手，毋過，逐首愛寫來有味有緒，也無恁該食。彭碧珠摎洪仁銘勉勵有興趣个人，只愛多寫多看，就會漸漸寫出有韻味、意境、感情个三行詩。
《客俳風第二集》聚總世界各地45位作者超過千首个作品，新書發表會這日，有14個作者來到現場慶祝，還有詹益雲、徐貴榮、張捷明、蘇燕能、莊萬貴等大師來幫襯。會講又會唱个主持人彭月春，摎節目炒到鬧熱煎煎，大家唱山歌、打嘴鼓、食豐沛、聽古箏演奏，逐儕笑到嘴合毋密。
筆者當場試著心肝頭當燒暖，手痎忍毋核也來寫一首：
〈鬥陣〉
客人實在慶
俳句吟唱當鬧棚
風雨牽手共下拚
華語
12／17這天的天氣很不好，颳風下雨又冷颼颼，體感溫度才8度而已，真的是「打狗不出門」的冬天。不過，有一群冒著風雨趕到竹北「水月拙木」餐廳的客家人，為了來參加《客俳風第二集》新書發表會暨園友餐敘。
近兩三年來，用客語寫俳句（三行詩）很流行，不但是客委會拿來推廣客語文學的新方式，前一陣子，臺中市政府客家事務委員會與靜宜大學中國文學系，也聯合舉辦2022年臺中客家三行詩、客家春聯創作比賽，吸引很多人投稿。
客家俳句會這麼流行，有一個帶頭領導的人，一定要特別介紹，他就是彭碧珠，也是《客俳風第二集》的總編輯。彭碧珠是竹東人，28年前，全家移居南非德班。兩年前，他和洪仁銘兩位在臉書上成立《台灣俳句客家定型詩園地》社群，帶頭鼓勵大家多寫俳句，現在園地裡有9百多位努力耕園寫俳句。
客家俳句有兩種型式，一種叫做575，就是第一行5個字，第二行7個字，第三行5個字。另外一種叫做577，就是第一行5個字，第二行7個字，第三行7個字。再加上標題4個字以內，所以，一首三行詩才短短21到23個字而已。
彭碧珠詳細解說：「句尾可押韻也可不押韻，押韻最好是押到自然，不要為了押韻，而影響主題內容的表達；因為字數這麼少，所以行文盡量不要重複用字、用詞；題目也不要直接用17或19個字裡的語詞，避免把主題內容講得太清楚。」
洪仁銘接著講：「第一行就是你的目標主題，第二行就是轉合起承，第三行要跟第一行對應。」這樣說起來，寫客俳好像很好入門，不過，每首要寫得很有味道，也沒這麼簡單。彭碧珠和洪仁銘勉勵有興趣的人，只要多寫多看，就會漸漸寫出有韻味、意境、感情的三行詩。
《客俳風第二集》聚集世界各地45位作者超過千首的作品，新書發表會這天，有14個作者來到現場慶祝，還有詹益雲、徐貴榮、張捷明、蘇燕能、莊萬貴等大師來捧場。會講又會唱的主持人彭月春，把節目炒得很熱鬧，大家唱山歌、聊天、吃美食、聽古箏演奏，每個都笑得合不攏嘴。
筆者當場覺得心裡頭很溫暖，手癢忍不住也來寫一首：
〈湊成一夥〉
客（家）人實在棒
俳句吟唱很熱鬧
風雨牽手一起拚
