跈等自主學習風潮 教育部摎126冊新住民語教材放在網路頂
【羅盛滿／新竹竹東海陸腔】COVID-19疫情期間，出現一波遠距教學、自主學習个風潮，教育部摎7隻國家个新住民語、一共126冊个教材放在網路頂項，提供鄉親毋使錢買，分學習這件事情，毋會受著時間摎空間个限制。
十二年國民基本教育政策摎新住民語列入課綱，分學生仔依照自家个需要選擇想愛上个課程。教育部今晡日發出新聞稿講，到民國110年已經完成開發東南亞7隻國家个新住民語文數位學習教材、總下有126冊，做盡都放在「新住民子女教育網」，免費提供鄉親來用。
教材个語言種類包括越南、印尼、泰國、緬甸、柬埔寨、馬來西亞還過菲律賓話這兜國家个語言，逐種語言有18冊，都有配音摎互動功能，分鄉親做得用多媒體个方式學習語文，在任何位所只要有3C電子載具摎網路，都做得上線自主學習。部分語種還搭配公共電視个長壽兒童節目「水果冰淇淋」配音版，提高細孲仔个學習興趣。
教育部講，未來會持續補充、加強新住民語數位學習教材，還過分網站內容還較活潑，分還較多个學生仔對學習新住民語還較有興趣、還過了解東南亞各隻國家个文化，進一步培育未來南向人才。
雙語政策 國家發展委員會摎全民英檢共下推出免費AI人工智慧診斷平台
政府推動2030雙語政策，國家發展委員會摎全民英檢合作个免費AI診斷平台「全民英檢i學網」，推算在10月初1起勢會上線，提供個人化个英語診斷回饋。
全民英檢主辦單位語言訓練測驗中心（LTTC）今晡日發出新聞稿講，國家發展委員會透過「全民英檢量能擴充專案」，連續2年委託佢兜用擴大縣市、增加次數這兜對鄉親較利便个方式，減輕鄉親準備考試个心理壓力摎經濟負擔。今年還較推出免費AI（人工智慧）診斷平台，擴大雙方合作。
LTTC講，「全民英檢i學網」免費開放分所有對英語學習有興趣个人。平台做得黏時預測英語能力程度，體驗全民英檢初級、中級、中高級3種級別个題庫，完成測驗過後、做得得著個人化个診斷回饋、作答解析。
LTTC今晡日也公布2023年全民英檢日程表，正月份初級測驗會在今年10月12開放報名。佢兜講，這幾年來、英檢个考生人數無受著少子女化抑係COVID-19疫情衝擊，一擺挑戰聽讀講寫（斯係考一日定）个考生、還較逆勢成長2成，顯示國內雙語教育之下，帶動學習个人丟忒頭過單淨重視聽摎讀个被動接收技能，現下開始注重英語口說摎寫作个溝通表達能力。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
（Android連結：https://reurl.cc/8GWlXd）
（IOS連結：https://reurl.cc/O1pb59）
