總統蔡英文接見米國眾議員莫菲訪問團 討論台灣摎米國經濟貿易區域安全
米國聯邦眾議院軍事委員會「情報暨特種作戰」小組副主席莫菲率領跨黨派眾議員到台灣訪問，總統蔡英文在今晡日上晝10點在總統府接見，針對台灣摎米國經濟貿易合作還過區域安全這兜議題交換意見。
總統府發言人張惇涵指出，特別係舊年5月份台灣面臨一波疫情嚴峻影響該時，眾議員巴爾挺身企出來支持，帶領62儕跨黨派眾議員，聯名寫信仔分米國政府，爭取摎台灣納入頭一波預防射捐贈名單。
這一擺來个訪問團成員當中，有凱希力、威爾森、還過凱茉可這兜眾議員，都加入連署支持台灣，促成米國政府捐贈台灣兩擺預防射累計達到400萬門射。
針對這件事情，總統府再過一擺向美國政府還過參與連署支持台灣个國會議員，表達最誠心个感謝。
米國晶片法推出禁令 先進技術企業10年禁止到中國設立工廠
米國本土生產个半導體在全球供應總量占比、已經從1990年个40%降低成目前个10%。米國總統拜登政府宣布，接受聯邦政府資金補墊个米國科技公司愛被佢兜禁止在中國建設擁有「先進技術」个工廠，禁令个有效期限係10年。
天時資訊
中央氣象局表示，今晡日台灣附近水氣多，各地有局部短暫陣雨抑係雷雨，其中過晝以後个落水情形會最明顯，南部所在摎中部、花蓮、台東山區有局部落大水發生个機率。
溫度方面，受著微弱東北風个影響，北台灣朝晨暗晡小可清冷，低溫係23、24度，其他所在差毋多25、26度，日時頭各地高溫在30到33度。
氣象局推算，今晡日到拜六各地大體係多雲到好天，單淨基隆北海岸摎東半部所在有零星短暫陣雨，過晝以後中南部所在有局部短暫打風時；溫度方面，中部以北摎東北部个天時日夜較涼。
空氣品質方面，花東空品區係「良好」等級；北部、竹苗、中部、雲嘉南、高屏、宜蘭空品區還過金門、澎湖係「普通」等級，中部、雲嘉南有兜所在可能達到柑仔色提醒等級；馬祖乜係「柑仔色提醒」等級。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
