文／黃筱婷，竹東客家人，這下戴竹東鎮（腔頭：海陸腔）

新竹縣个內灣做得講係全臺灣盡出名个景點，內灣係接近油羅溪个窩壢，主要係橫山鄉管轄个區域，因為內灣村在山肚，所以斯有自然个山林景色，同時還有盡壯觀个河壩好風光，愛去過个人正知，這位係當合適來去遊尞个所在。

內灣吊橋在早期係內灣摎外背地區聯絡唯一重要个路，內灣在頭擺森林摎打礦事係主要个經濟事業，其實在日本治理臺灣个時節，內灣斯鋪有輕便車个車路到竹東地區了，分山項个樵做得盡利便遽遽運送到竹東這位，續下來再過運送到日本，毋過當打爽个係森林摎打礦事業慢慢消失以後，毋使恁多做頭路个人，山肚个莊頭內灣斯愈來愈少人留下來了。

若係來到內灣定著莫毋記得到內灣戲院參觀，這隻戲院係臺灣地區保存當好个木材起个戲院，行入去內灣戲院做得看著烏色摎白色个老電影在大戲院裡背放，實在係盡有老頭擺个味緒。

內灣保持老頭擺个山城風光，緊來緊多人都會利用放尞个時間來到內灣遶山花，欣賞客家莊靚靚个景色，乜感受著客家人个熱情。

建議來到內灣遊覽个朋友，還做得行去內灣親水公園欣賞裡肚靚靚个景色，內灣親水公園內肚種有當多樹仔，假使你兜拜訪个季節堵堵好係秋天，斯做得看著該兜樹葉仔都變紅色摎黃色靚靚个風景，到該時節，親水公園斯像係異國世界共樣，絕對值得大自家好好感受這位个靚。

內灣親水公園裡背个陂塘脣項有當多花草，來這位尞个人做得行在陂塘脣這條路項，做得就近來欣賞公園裡背个各種植物摎花草。

落去內灣斯做得看著親水公園，遠遠斯看得著公園裡背半天高个松樹，大自家做得尋時間來到內灣尞，這位有有歷史个景點，乜做得欣賞盡靚个景色，係一隻分人試著當得人惜个山城莊頭。

華語翻譯

新竹縣的內灣是可以說是全臺灣很知名的旅行地點，內灣是靠近油羅溪河畔的谷地，主要是橫山鄉的轄區範圍，因為內灣村位於山區，所以有著自然的山野景致，同時也有很雄壯的河流好景觀，要去過的人才會知道，這裡是相當適合來旅行的地方。

內灣吊橋在最早期是內灣與外界地區聯絡的唯一重要路徑，內灣在古早時候主要是以森林及採礦事業為主要經濟產業，其實早在日本治理臺灣的時候，內灣就已經鋪設了輕便的軌道到竹東地區，讓山上的木材可以很方便也很快速的運送到竹東地區，然後再繼續運輸到日本，不過非常可惜的是在森林及採礦事業慢慢蕭條後，不再需要那麼多的工作人員，山城內灣也就逐漸愈來愈少人留下來了。

如果來到了內灣一定不要忘記到內灣戲院參觀，這座戲院是臺灣地區保存非常良好的木造戲院，走進內灣戲院可以看見黑白的老電影在大戲院裡播放，大家可以一邊吃飯一邊欣賞老電影，實在是相當有懷舊的風情。

內灣保有相當復古的山城風情，越來越多人都會利用假期的時間來到內灣邊走邊遊玩，體驗客家莊的美麗景色，也感受到客家人的熱情。

建議來到內灣遊覽的大家還可以走到內灣親水公園欣賞裡面的美麗景色，內灣親水公園裡種植有許多樹種，如果你們到訪的季節正是秋天，就可以看到樹木的葉子變成紅色和黃色的美景，那個時候的親水公園就好像外國的世界一樣，絕對值得大家好好感受這裡的美。

內灣親水公園內的水池旁邊有許多花草，來這裡遊玩的人可以行走在水池旁邊的路上，可以在附近來觀賞公園內的各種植物和花草。

只要進入內灣就可以看到親水公園，遠遠看可以看到公園中有高大的松樹，大家可以找個時間來內灣遊玩，這裡有有歷史的景點，也可以欣賞漂亮的美景，是一個讓人感覺很可愛的山城小鎮。