無薪假个人有1.3萬　製造業、運輸業个人數增加幅度明顯

2022年04月18日

00:00

無薪假个人有1萬3千零儕　製造業、運輸業个人數增加幅度明顯

【羅盛滿／新竹竹東海陸腔】勞動部今晡日公布最新減班休息（斯係無薪假）个統計，實施事業單位一共有2,167家，實施人數有1萬3,517儕；以製造業、運輸倉儲業、還過支援服務業這兜來講，在人數上增加幅度較明顯。勞動部勞動條件及就業平等司个副司長王金蓉表示，支援服務業主要斯係旅行社，本期大體來講、還係續等實施个情況；運輸及倉儲業主要有一家航空公司續等實施減少工時措施300零儕，規模較大。王金蓉講，製造業有2家公司个人數較多，其中金屬機電工業就占咧219儕，主要係有一家汽車零組件業者續等實施100零儕，可能摎逐儕經營情況有關；另外在資訊電子工業增加78儕，有一家業者就占咧60零儕，主要係因為火燒屋、所以實施減班休息；其他大體都係小規模零星實施。

7月份有機會邊境解封　到時遰着COVID-19機率共樣个國家　斯做得毋使隔離

國內COVID-19（斯係2019冠狀病毒疾病）个疫情升溫，連續幾下日个單日確診人數超過1,000儕。衛生福利部个部長陳時中今晡日表示，世界COVID-19个疫情漸漸仔較緩兜仔，台灣疫情向往上提升，等今年7月份个時節，有機會有个國家做得流通、假使佢兜7日、抑係14日以內、遰着COVID-19个機率摎台灣差毋多，只要雙方疫情程度共樣，到時斯做得自由流通、毋使隔離。