文／蕭宥 國中生、台東客家人、現下戴台東
在學校，有同學會講：「本土語言在屋下講就好，在學校讀書既經當kioi咧，還愛學習本土語，當麻煩。」亻厓認為，母語係做毋得添放忒个，學校有提供學生仔選自家母語來學習个機會，亻厓兜就愛把扼。
因為在未來，講母語个人可能會越來越少，故所你會講一息仔就當難得了，做毋得因為自家懶尸，就毋學習祖先傳下來个語言，添放忒自家係麼人。
在屋下，亻厓兜就愛盡量講客，現下會講本土語言个人，大體係老人家較多。若係屋下有老人家，你賺著了，這係講母語最好个機會，聽老人家講，你也做得跈等學，將最烏个講法留在腦海肚，恁樣佢就毋會分時間帶走。
有一個同學識同亻厓講：「亻厓个阿公淨會講客家話定定，每擺同佢講話，亻厓都聽毋識佢在該講麼个，亻厓實在毋知愛仰結煞正好，拜託你教亻厓幾句客家話，分亻厓做得同阿公打嘴鼓好無？」語言無分年紀，這位同學想愛用阿公最熟事个語言，串起佢兜之間个祖孫情，亻厓就答應佢了，這下佢乜變做一個當好講客語个人了。
學校肚个人，或者講現下社會个人啊，有兜會想起自家个族群認同，想愛傳承自家族群个特色，乜有兜人，對自家个文化做毋得講完全毋熟事，淨了解一息仔表面，就像有人講著客家就會想著：桐花啦、勤儉啦、齧察啦，有時蠻皮个細人仔知著亻厓係客家人，就會同亻厓講啊：「你係客家人喔？你一定當齧察啦，一定食當鹹嗬？」
佢兜毋會想著，客家人食當鹹係因為去田項做事愛用當多體力，勤儉、凝家係因為頭擺經濟正起步，畜細人仔無這下恁容易。
學校裡背个同學一聽着亻厓講客，就感覺當神奇，一大陣人將亻厓圍起來，請亻厓教佢兜兩句，毋過還係有人，笑亻厓講母語當好笑又當奇怪。亻厓就會想：「母語明明就恁餳人，仰會有人毋願學習，還愛笑亻厓个發音呢？」該兜人个想法，到今亻厓還係愐毋解。
亻厓認為，無論在學校、屋下抑係任何位所，做得講母語，你就放勢講，莫管別人仰般誚㸐、笑你戇。你係為著保護自家个文化，傳承自家个語言，記得自家係麼人，故所講母語。
華語：
母語要在哪裡說
在學校，有同學會說：「本土語言在家裡說就好，在學校讀書已經很累了，還要學習本土語，很麻煩。」我認為，母語是不能忘記的，學校有提供學生選擇自己母語學習的機會，我們就要把握。
因為在未來，講母語的人可能會越來越少，所以你會講一點點就很難得了，不能因為自己懶惰，就不願學習祖先傳下來的語言，忘記自己是誰。
在家裡面，我們就要說更多，現在會講本土語言的人，大多是老人家，你家中若有老人家，就是你賺到了，是講母語最好的機會，聽老人家說，你也可以跟著學，將最道地的唸法留在腦海中，這樣它就不會被時間帶走。
有個同學曾對我說：「我阿公只會講客家話而已，每次和他講話，我都聽不懂他在講什麼，我實在不知道要怎麼辦才好，拜託你教我幾句客家話，讓我可以和阿公對話好嗎？」語言不分年紀，這位同學想要用阿公最熟悉的語言，串起他們之間的祖孫情，我就答應了他，現在他也變成一個很喜歡講客語的人了。
學校裡的人，或者說現在社會上的人，有些會想起自己的族群認同，想傳承自己族群的特色，也有些人，對自己的文化並非完全不熟悉，卻只了解到一點表面，就像有人一提到客家就想到：桐花啦、勤儉啦、小氣啦，有時候，有時候調皮的小朋友知道我是客家人，就會對我說：「你是客家人喔？你一定很小氣啦，一定吃得很鹹囉？」
他們不會想到，客家人吃得很鹹，這是因為去田裡做事要費很多體力，勤儉持家，是因為以前的經濟才剛起步，養小孩沒有現在容易。
學校裡的同學一聽到我講客家話，就面面相覷，一大群人將我圍起來，請我教他們兩句，不過，還有些人，笑我說母語的時候很好笑又很奇怪。我就會想：「語言明明就是很吸引人的，怎麼會有人不願學習，還要笑我的發音呢？」那種認為講母語的人很奇怪的想法，到今天我還是無法理解。
我認為，無論在學校、家中或者是任何地方，可以講母語，你就講，不要管別人怎麼嘲諷、笑你傻，你是為了保護自己的文化，傳承自己的語言，記得自己是誰，所以講母語。
延伸閱讀：
