文／李文煥，苗栗縣客家人，國中特教教師。（四縣腔）
頭擺頭擺，在天背个異次元空間，有一個天闊地闊个大陸，頂項戴个全部係「雞仔」，故所該位安到「雞仔大陸」。聽講雞仔大陸識發生一擺得人驚个大地動，大陸中央漯下一條大深坑，直直摎雞仔大陸破開兩析。當多年以後，兩片析个雞仔各自成立國家，左片析个安到妖雞王國，右手析个安到聖雞王國。
這兩隻國家个雞仔有自家个語言同文化，裡肚盡特別个係貴族雞，因為佢兜全全係「相打雞1」个血統，相打雞家族大體係負責治理國家同保護人民。自古以來相打雞个毛色，淨會有兩種色目定定，一種圓身係茶色；頸根圍一圈金那那个毛，另外一種毛色係歸身仔烏疏疏；頸根个毛紅啾啾仔。有一年聖雞王國个相打雞家族發生兩件怪事，第一件係聖雞王降出一隻當靚个妹仔，聖雞公主个雞毛色目係歸身仔淰黃淰黃，遠遠看下過親像係發出金光个鳳凰。另一件怪事，係聖雞王國个烏毛相打雞裡肚，嗄降出一隻歸身仔蓬白个細雞牯，從頭到尾白雪雪無半支雑毛，更加怪奇个係這隻細白雞牯个目珠仁，竟然係紅色還看得著血筋。
該隻紅目珠歸身仔蓬白个相打雞，名仔安到「白白」。白白從細就長透分其它个雞仔取笑，因為雞仔大陸吂識出現過白色个相打雞，故所逐擺大家看佢个目光，就像係看着妖怪共樣。白白盡驚晒着日頭花，若係在日頭下超過一杯茶个時間，佢就會歸身仔起膘合㪐皮。還過，厥目珠生成就係弱視，單淨看得着面前二米濛濛个影仔定定，故所佢從細就輒輒分人欺負。
白白十五歲該年，有一日在街路頭行等，分幾隻壞嘴个雞仔攔下來。佢兜簡賤講：「看該係麼人來了？白毛个相打雞，哈哈！ 㖸死人了！若姆定著係同著「生卵雞」正會降出你這隻野膦屎，?俚聖雞王國淨有該脧脧个生卵雞，毛正會係白色个，哈哈你係白毛个脧面雞。」
白白：「毋係！毋係！你兜莫亂講，?係相打雞，?係正種个相打雞，?愛同你兜相打，證明?乜係相打雞毋會差。」
白白晟等烈烈个日頭，同該兜壞嘴个雞仔打起來了，毋過因為厥个目珠忒差，還過又堵好係當晝大日頭。落尾白白還係輸忒了，佢分該兜壞嘴雞撳在地泥下，歸身仔血漬漬仔白毛蓬蓬跌，白白齧等牙根無噭眵。佢心肚愐，?一定愛變強，總有一日?會證明，?係純種、勇敢个相打雞。
白白並無因為該擺在路脣分人欺負个事情就來失志放棄自家，顛倒分佢瞭解自家个缺陷係麼个，故所佢起勢學習特殊个格鬥孔竅。逐日在星光半夜个時節，白白會企在月光下盡命牯鍛練。佢苦練自家个聽力，聽着蟲仔撥翼个聲音，毋使看就抓得着蟲仔。佢還盡命牯鍛鍊腳髀个力，兩支腳䌈等大石牯走跳。包尾，白白縱起毋單淨速度遽，還做得跳一棧樓恁高。白白發覺在夜摸暗晡，就係厥个世界，若係有人愛尋佢相打，定著無人有法度打得贏佢！
相打雞白白个古，還吂講煞，你想愛看白白摎雞公主發生麼个事情無？請看「天背奇雞」下集。
註解：相打雞：xiongˊ daˋ gieˊ，華語稱為鬥雞，台灣早期民間常畜養以觀賽為樂。
華語
從前從前，在天外的異次元空間，有一個天闊地闊的大陸，上頭住的全部是「雞仔」，所以那裡叫做「雞仔大陸」。聽說雞仔大陸曾經發生一次恐怖的大地震，大陸中央塌下一條大深坑，直直把雞仔大陸破開兩半。很多年以後，兩邊的雞仔各自成立國家，左邊的叫做妖雞王國，右邊的叫做聖雞王國。
這兩隻國家的雞仔有自己的語言和文化，裡面最特別的是貴族雞，因為他們全部都是「鬥雞」的血統，鬥雞家族大多是負責治理國家與保護人民。自古以來鬥雞的毛色，只會有兩種顏色而已，一種周身是茶色；脖子圍一圈金閃閃的毛，另外一種毛色是整身烏溜溜；脖子的毛鮮紅。有一年聖雞王國的鬥雞家族發生兩件怪事，第一件是聖雞王生出一個很漂亮的女兒，聖雞公主的雞毛顏色全身黃澄黃澄，遠遠過去很像是發出金光的鳳凰。另一件怪事，是聖雞王國的黑毛鬥雞裡頭，卻生出一隻整身雪白的小公雞，從頭到尾白雪雪無半支雑毛，更加奇怪的是這隻小白公雞的黑眼珠，竟然是紅色還得看到血管。
那隻紅眼睛全身雪白的鬥雞，名字叫做「白白」。白白從小就經常被其它的雞取笑，因為雞仔大陸不曾出現過白色的鬥雞，所以每次大家看他的眼光，就像是看着妖怪一樣。白白最怕晒到陽光，若是在陽光下超過一杯茶的時間，他就會全身起水泡和脫皮。還有，他的眼睛天生就是弱視，儘能看得到面前二米濛濛的影像而已，所以他從小就時常被人人欺負。
白白十五歲那年，有一天在街上走著，被幾隻壞嘴的雞仔攔下來。他們歧視的說：「看那是什麼人來了？白毛的鬥雞，哈哈！ 笑死人了！你媽媽一定是外遇「生蛋雞」才會生出你這隻野種，我們聖雞王國只有那笨笨的生蛋雞，毛才會是白色的，哈哈你是白毛的傻雞。」
白白：「不是！不是！你們別亂說，我是鬥雞，我是正種的鬥雞，我要同和們決鬥，證明?乜是鬥雞不會錯，。」
白白照著烈烈的陽光，與那些壞嘴的雞仔打起來了，不過因為他的眼睛太差，而且又剛好是中午大太陽。最後白白還是輸掉了，他被那些壞嘴雞;壓在地上，整身都是血漬白毛掉一地，白白咬等牙根沒哭。他心裡想，我一定要變強，總有一天我會證明，我是純種、勇敢的鬥雞。
白白並沒有因為那次在路邊被人欺負的事情就來灰心喪志，反而讓他瞭解自己的缺陷是什麼，所以他開始學習特殊的格鬥技巧。每日在三更半夜的時候，白白會站在月光下拚命鍛練。他苦練自己的聽力，聽着蟲兒拍翅的聲音，不用看就能抓得到蟲。他還拚命鍛鍊大腿腳的力，兩支腳綁著大石頭跑跳。最後，白白縱起不只是速度快，還能夠跳一層樓那麼高。白白發覺在漆黑的夜晚，就是他的世界，若是有人要尋他打架，肯定沒無人有辦法打贏他！
鬥雞白白的故事，還沒有講完，你想要看白白和雞公主發生什麼事嗎？請看「天外奇雞」下集。
