文／邱鴻春，客語支援教師，桃園楊梅客家人（海陸腔）
阿爸，今晡日（3月9號）在這位摎你來告別，心肝肚有當多當多个哀傷毋盼得！記得你長透講，你細人个時節屋下苦，爺仔當早就無在，只有阿姆摎阿婆兩個餔娘人，就係?个阿婆摎阿太。你九歲就摎人掌牛做長年換飯食，名講係掌牛，實際上麼个事乜愛做，正經非常非常个艱苦，想起來就會出目汁！
慢慢仔較大咧，轉來屋下後，滿哪仔摎人做田事，不管係犁田、打碌碡、蒔田、割禾，項項全奈得何，還過做小工、做零工，有錢好賺，做麼个全做得，哪有麼个禮拜日，就愁驚無事好做，哪識聽人講，麼个過勞死、做死个，就恁樣坎坎跌跌摎?三姊妹畜大！
等到?出世，小可仔知人性開始，你已經在工廠上班，逐日準時4點左右，下班轉到屋下來，轉來屋下毋係尞，係遽遽去菜園種菜無斯淋菜。?記得有幾下片个菜園，見擺做到斷烏正轉屋。
包尾還有摎人退權利（有使用權無所有權）買分零地个山田來耕，毋記得總下係有四夫，抑係五夫田，其中一夫係濫田，細人跺啊落去，強強會落到膝頭咧。割禾抔禾紮徙步非常悿，禾割忒愛蒔田，屋下又無牛好犁田，就?等兩子爺兩支钁鋤用改个，利用禮拜日摎逐日个下班下課時間，實在盡有好做，還有暗晡頭三更半夜，冷咻咻去巡田水，滿哪仔又暗疏疏。無像這下路燈恁多恁光，還有年過啊忒，初四、五斯落田，實在就還冷，強強牙根咬等！
上中學个時節，你總係喊?愛認真讀書，毋好像阿爸無讀書，就會做這兜苦力个事，辦公室該兜人，坐在辦公室擎筆涼涼，錢領比你較多！該下?還細好搞，耳空根本就係東片落西片出，哪有聽落去！
直直到中學三年生，畢業愛考高中正知死，哪考得著公立學校好讀，該下正多少仔會想，知阿爸阿姆辛苦，賺錢實在無簡單，讀私立恁多錢，愛仰結煞正好？?又毋甘願無讀高中，好得當時有盡多建教合作班，就決定讀這好，無想著就恁樣半工半讀，直直讀到研究所畢業。
這其中還有結婚降細人，好得有你个支持，你總係講，後生人有上進心當好，你做你認真去讀書，細人你毋使愁，?摎若姆會摎四個細人渡到好勢好勢，果不其然，細人全有聽阿公講，有乖乖讀書，?乜順利完成學業。
42歲拿著碩士學位，就考慮著細人仔慢慢愛升高中大學，未來个經濟會較緪，堵好有一隻機會做得去大陸發展，四個細人愛讀大學个預算就無問題咧，雖然初期你無麽个同意，經過參詳溝通後，你還係支持?，承蒙你个體諒摎辛苦个付出，在大陸食頭路11年零，逐個孫女孫仔全分阿公教到當好當像人。
但是，?大陸一轉來，阿姆摎?講，你已經一禮拜零無麼个有食飯，還懶??毋講話，愛渡你去醫院又毋去，怕有拗蠻个傷重！?就遽遽渡你去分先生看，一看就戴院一禮拜，乜係你第一擺落醫院，先生檢查著心臟脹大，進一步查著係腰仔出問題影響个，愛開始洗腰仔咧，出院後你還係毋甘願洗腰仔，經過一年个食藥仔控制，包尾還係無辦法改善，又加一擺戴院，就開始洗腰仔咧，同時心臟也盡弱咧，到今洗有5年半較加咧，最尾1隻月，還有腰骨痛个問題，辛苦你咧！
這下你好好跈佛祖去修行，所有个病痛全無咧，放下世間个一切，屋下子孫你毋使愁。你見擺講?毋知漦濞，細人愛人講、愛人罵正會長進，?會記得你个教訓，孫女孫仔乜會記得，?會摎阿姆、阿旺（老弟）擔起屋下个一切，你放心在天頂，跈等佛祖摎觀音娘娘修行，毋使轉來人間受苦咧，將來天頂來相會。
華語
爸爸，今天（3月9日）在這裡和您你來告別，心裡有很多很多的哀傷和不捨！記得您常常說，您小時候家裡貧窮，爸爸很早就不在，只有媽媽和奶奶兩個婦人家，就是我的奶奶和曾祖母。您九歲就幫人家放牛做長工換三餐，名義上是放牛，實際上什麼事都要做，真的是非常非常的辛苦，想起來就會掉眼淚！
慢慢長大了，回到家裡後，到處幫人做田事，不管是犁田、田整平、插秧、割稻，樣樣都沒問題，還有做水泥工、臨時工，有錢好賺，無論做什麼都可以，哪有甚麼禮拜天，就怕沒事好做，哪有聽說，什麼過勞死、做死的，就這樣坎坎坷坷把我們三兄妹養大！
等到我出世，稍微懂事開始，您已經在工廠上班，每天準時4點左右，下班回到家裡來，回到家裡不是休息，是趕快去菜園種菜，不然就是澆菜。我記得有好幾片的菜園，常常做到天黑才回家。
後來還有向人家退權利（有使用權沒有所有權）買了一分多的梯田來耕，不記得總共是有四塊，還是五塊田，其中一塊是爛泥巴田，整年水泡著，小孩子踩下去，差一點就到膝蓋了。割稻抱整把稻穗移步非常累，稻子割完要插秧，家裡又沒有牛好犁田，就我們兩父子兩把鋤頭翻土，利用禮拜天和每天的下班下課時間，實在是很有得做，還有晚上三更半夜，冷的要命去看田水，到處都是黑暗的。不像現在路燈這麼多這樣亮，還有剛過完年，初四、五就下田，實在是好冷，緊咬著牙齒！
上國中的時候，您總是叮嚀我要認真讀書，不要像爸爸，沒有讀書，就只會做這些勞力的工作，辦公室那些人，坐在辦公室拿著筆涼涼，錢領比您還多！那時候我還小愛玩，耳朵根本就是東邊進西邊出，哪有聽進去！
一直到國中三年級，畢業要考高中才知道完了，哪考得到公立學校好讀，那時候才稍微會想，知道爸爸媽媽辛苦，賺錢實在不簡單，讀私立那麼多錢，要怎麼辦才好？我又不甘心沒讀高中，還好當時有很多建教合作班，就決定讀這好，沒想到就這樣半工半讀，一直讀到研究所畢業。
這其中還有結婚生子，還好有您的支持，您總是說，年輕人有上進心很好，你放心認真去讀書，小孩你不用操心，我和你媽媽會把四個小孩帶的很好，果不其然，小孩子都有聽爺爺的話，有乖乖讀書，我乜順利完成學業。
42歲拿到碩士學位，就考慮到孩子們慢慢要升高中大學，未來的經濟會較吃緊，剛好有一個機會可以去大陸發展，四個小孩要讀大學的預算就沒問題了，雖然初期您是不同意的，經過商量溝通後，您還是支持我的，謝謝您的體諒和辛苦的付出，在大陸工作11年多，每個孫女孫子都給爺爺教的很好，也都是正正當當的。
但是，我大陸一回來，媽媽和我說，您已經一個多禮拜沒什麼吃飯，還懶洋洋的不講話，要帶您去醫院又不去，恐怕已經滿嚴重了！我就趕快帶您去給醫師看，一看就住院一禮拜，也是您第一次進醫院，醫師檢查是心臟肥大，進一步檢查，發現是腎臟出問題影響的，要開始洗腎了，出院後您還是不甘願洗腎，經過一年的吃藥控制，最後還是沒辦法改善，又再一次住院，就開始洗腎了，同時心臟也很差了，如今已超過有5年半了，最後1個月，還有腰痛的問題，辛苦您了！
現在您好好跟著佛祖去修行，所有的病痛都沒有了，放下世間的一切，家裡子孫您不用操心。您常常講我什麼都不懂，小孩要人講、要人罵才會長進，我會記得您的教訓，孫女孫子乜會記得，我會和媽媽、阿旺（弟弟）擔起家裡的一切，您放心在天上，跟著佛祖和觀世音菩薩修行，不用回來人間受苦了，將來天上來相會。
