文／謝宜庭，桃園客家人（四縣腔）

放學个時間到咧，學生仔一路嘰嘰嘎嘎，緊拚拚仔相賽對學校門口舂出來，有人自家行路轉屋，乜有人係屋下人來接，歸路項人聲濟借、鬧熱煎煎，一陣一陣連連續續个笑聲同講話聲，就恁樣鑽入路項行人个耳公肚，分?愐起該兜囥在吾心肝肚、?盡懷念个淰淰回憶。

還記得?八歲、讀國小二年生該下，戴在莊下，阿爸阿姆逐日無閒洎杈，哪有法度載?兜細人仔去學校呢？就喊?同阿哥自家騎自行車去學校；該央時，對屋下到學校差毋多3公里恁遠，上下課時節?看等車仔來來去去个街路，車仔塞到淰淰像蟻公恁多，正知細人仔愛騎車仔過大路毋係搞个，愛較細義兜仔正好哪；毋過?對六歲開始，逐日就會騎等?該臺阿爸買分?，青青又細細个自行車仔，載等正三歲个老妹滿哪仔溜上溜下，故所?試著對莊下騎車仔到都市當簡單，就像拿刀仔切菜樣仔毋係問題。

有一擺放學个時節，?輕輕鬆鬆騎等自行車仔過大路，騎啊騎，臥頭看一下青紅燈，嗄看著青燈遽啊會轉紅燈哩，就盡命牯箭等車仔飆等過，正經過路口个檳榔攤仔頭前，無想著頭前一個騎等奧多拜个婦人家，嗄好恬恬摎厥車仔頓恬下來，?來毋掣閃佢，就直直撞啊去，砰一聲，吾自行車橫倒地泥項，?乜跌到頭暈腦疺、四腳惹天，屎胐強強會必開來，車籃仔裡背便當袋仔肚个便當盒仔還跌跌出來，在路脣打幾下隻環車正停下來，磬磬鏘鏘搣到當多人目盯盯仔在該看?，?面紅濟炸試著當見笑，遽遽對地泥項蹶䟘起來，詐毋知仔牽起車仔遽啊瀉走，好得?橫倒該下無分後背个車仔輾著，無就河壩跑馬－壞蹄了。俗話講：「一日分蛇咬，三年驚稈索」，下後?騎車仔，都會提醒自家愛騎較慢兜仔，保持安全个距離，正做得快快樂樂出門、平平安安轉屋下。

讀國小四年生該下，徙屋到別位乜轉學咧，對屋下行路去學校足足愛四十零分，該央時，細人仔大體都係坐11號公車—用自家个兩隻腳慢慢啊行轉屋下。熱天个時節，透當晝日頭恁烈，熱到人佇毋著，強強會晒㪐皮，路隊長就會渡等歸路隊个同學舂落去路脣个雜貨店，一儕買一枝冰冰涼涼个枝仔冰來清涼一下，拿著冰先摎包裝紙扯開來舐幾口過願，伸个冰就緊行緊食；又冰又甜个味緒食落嘴肚，甜在心肚，逐儕細人仔都食到開容笑面，又有氣力好行了。

寒天个時節，冷沁沁个風吹啊過來，儕儕都寒到緊顫，身體跔到像蝦公樣仔，強強會行毋停動；落雨天係無帶著水衣抑係遮仔，就還較慘，落雨浙濟、雨淋雨涿乜愛行，歸身仔涿到潦潦，一雙鞋乜搣到泥漿了了，實在艱苦到講毋得。?輒輒在心肚愐，若係有「哆啦A夢」个任意門，門一打開來，人黏時就轉到燒暖个屋下，毋知有幾好哩。

幾下十年過忒了，這下換?愛去學校渡細人仔轉咧，在幼兒園个門口，阿綸牯看著?，面項就笑到像蕊花樣仔對?緊擛手，兩子哀歡歡喜喜行路轉屋，總係慢慢仔行定定仔尞，一下仔去公園裡背肚看大蕊細蕊个花有靚無，一下仔又行去魚塘邊脣，眼睛睛仔看等花啦必駁个鯉魚仔在水竇肚泅來泅去；還有在廣場个石碫仔頂項坐等食點心，無就在公園凳仔坐等看日頭落山…，放學个路項總有恁多生趣个、有趣味个事情，等?俚去摎佢尋出來好好感受。?牽等阿綸牯細細个手，斡頭看等厥面項得人惜个笑容，像看著寒天个日頭樣仔，毋單淨手心燒燒个，心肝肚乜共樣燒暖燒暖。

華語

放學的時間到囉，學生們一路嘰嘰喳喳，趕著從學校門口衝出來，有人自己走路回家，也有人是家裡人來接送，整路上人聲鼎沸熱鬧不已，一陣陣接連不斷的笑聲跟講話聲，就這樣鑽入路上行人的耳朵裡，讓我想起那些藏在我心裡、讓我最懷念的滿滿回憶。

還記得我八歲、讀國小二年級那時，住在鄉下，爸爸媽媽每天忙的不得了，哪有辦法載我們小孩子去學校上學呢？就叫我跟同哥哥自己騎自行車去學校；那時候，從家裡到學校差不多3公里左右這麼遠，上下課的時候我看著車水馬龍的街道，車子塞得滿滿的像螞蟻這麼多，才知道小孩子要騎腳踏車過馬路不是開玩笑的，要小心一點才行；不過我從六歲開始，每日都會騎著那臺爸爸買給我、綠色又小台的腳踏車，載著才三歲的妹妹到處晃來晃去，所以我覺得從鄉下騎車到都市很簡單，就像拿刀子切菜一樣不成問題。

有一次放學的時候，我輕輕鬆鬆騎著自行車過馬路，騎啊騎，抬頭看一下紅綠燈，卻看到綠燈馬上就要轉紅燈了，就拚命踩著車子衝過去，才經過路口的檳榔攤時，沒想到前面一個騎機車的婦女，卻突然把車子停下來，我來不及閃避，就直接撞上去，砰一聲，我的自行車摔倒在地，我也摔的頭昏腦脹、四腳朝天，屁股差點要開花了，車籃裡便當袋中的便當盒還掉出來，在路邊翻了幾個跟斗才停下來，鏗鏗鏘鏘弄得許多人目不轉睛的看著我，我滿臉通紅覺得很丟臉，趕快從地上爬起來，裝作沒事牽起車子趕快溜走，還好倒下的時候沒有被後面的車子輾過，不然就糟糕了。俗話說：「一朝被蛇咬，十年怕草繩」，之後我騎腳踏車，都會提醒自己要騎慢一點，保持安全距離，才能快快樂樂出門、平平安安回家。

讀國小四年級的時候，搬家到其他地方也轉學了，從家裡走路去學校足足要四十多分鐘，那時候，小孩子大部份都是坐11號公車—靠自己的兩隻腳慢慢走路回家。夏天時，日正當中非常的炎熱，熱到人受不了，快要晒到脫皮了，路隊長就會帶著整路隊的同學衝進路邊的雜貨店裡，一人買一支冰冰涼涼的冰棒來吃、消消暑氣，拿到冰棒先把包裝紙撕開來舔幾口過過癮，剩的冰就邊走邊吃；又冰又甜的滋味吃進嘴裡，甜在心裡，每個小孩都吃的笑嘻嘻開心不已，又有力氣可以向前走了；冬天時，冷颼颼的風一吹過來，每個人都冷到直發抖，身體縮到像蝦子一樣，走不動了；下雨天如果沒帶到雨衣或雨傘，就更慘了，雨天泥濘、就算被雨淋濕了也要向前走，全身淋得濕溚溚的，一雙鞋也弄得全部都是泥巴，實在是苦的不得了。我常常在心裡想，如果手邊有「哆啦A夢」的任意門，門一打開來，馬上就可以回到溫暖的家，不知道有多好啊。

幾十年過去了，現在換我要去學校帶小孩回家了，在幼兒園門口，阿綸看到我，臉上就笑到像一朵花一樣對我直揮手，毋子倆高高興興地走路回家，總是慢慢地走、細細地逛，一下子去公園裡看大大小小的花，一下子又走去魚池邊，目不轉睛地看著色彩斑斕的鯉魚在水裡游來游去；還有在廣場的石階上坐著吃點心，不然就在公園椅子上坐著看夕陽…，放學的路上總有許多有趣的、有興味的事情，等著我們去發掘出來好好感受。我牽著阿綸小小的手，轉頭看著他臉上可愛的笑容，像看見冬日的陽光一般，不只是手心熱熱的，心裡也同樣暖呼呼的。