文／李文煥，國中特教教師，苗栗縣客家人（四縣腔）
阿源叔个頭路係電子工程師，逐日都係無閒到星光半夜正做得下班，雖然講公司分佢个月給罔罔仔（註1），毋過摎屋下人共下个時間就少異多。有一日暗晡轉夜，佢車仔駛到莊頭附近个時節，嗄恬忒毋會發了，！阿源叔心肝肚想：「恁夜吔！行路轉去好了，天光日正喊人來整（註2）。」
佢順等一條彎斡个細路仔行等轉，路脣个電火楯有兜無點著，有兜無罅光。阿源叔心肚當在該愐：「光線恁毋好，係講有壞人囥在這，該就『河壩跑馬——壞蹄』了！吂知就在這時節，阿源叔聽著路脣苦楝樹林裡肚，有奇怪个聲哨傳出來，詳細一聽親像係有兩儕人在地泥項相打，啊哦！還有衫褲扯爛忒个聲，佢黏時清醒過來，在近近仔个苦楝樹下，定著有一個細妹仔分人欺負了！
阿源叔想：「到底?愛插這件事情無呢？老古人言：『人相打莫行前，人相罵莫幫言。』?生著矮㑁㑁仔又無力，若係舂過去?手，顛倒分壞人㓾著仰結煞？係毋係打電話報警就算了，莫去狗打老鼠——管閒事。」阿源叔決定个過程像係千年萬載，其實過無幾秒鐘，佢聽著該細阿妹喊噭个聲緊來緊弱。佢心肝頭拶拶想：「?一定愛過去救人，做毋得無插佢，恁仔正對得起自家个良心。」
雖然阿源叔原旦毋係勇敢个人，也毋係手腳流掠个人，這擺佢毋知哪來个膽量同氣力，在佢決心愛?手該細阿妹个時節，佢旋風變到當有力。黏時舂到苦楝樹叢裡背，摎該隻伏在細阿妹身項个人掊開，就看阿源叔雖然矮細，毋過這擺拳頭嫲攉過去，拳拳有力；拳拳入肉，包尾佢一腳蹬著該儕个下身，該隻漦貨仔（註3）痛到蹦飆（註4），跪下來喊毋敢了！
在阿源叔同壞人相打該央時，總算莊頭項有人發覺打電話報警，該壞人正跪下來定定，警察仔就來到現場了。阿源叔心肝嗶哱跳望轉苦楝樹下，該隻細阿妹仔還跍在樹頭下噭眵，佢揞等面驚到歸身仔緊顫。阿源叔講：「好了！該儕人分警察捉走了，你這下安全了。你係莊項哪家人个妹仔，阿叔送你轉去。」吂知，細阿妹仔舂過來揇等阿源叔大噭：「阿爸！?係若妹仔！」
阿源叔著大驚，跈等目汁忍毋核跌下來。佢摎厥妹仔揇核核，心肚愐：「該哉有出手救人，係無?毋敢想會發生麼个事。」阿源叔輕輕拍等厥妹仔个背囊，細聲講：「敗勢，阿爸差一息仔就失忒你了。」厥妹仔在厥胸前定定仔靜下來，月光下苦楝樹个影仔緊搖，見證著這場幸運个抉擇。
註釋
（註1）罔罔仔：音mongˋ mongˋ eˋ；還不錯、蠻好的意思。
（註2）整：音zangˋ；修理、修改的意思。
（註3）漦貨仔：音xiauˇ fo eˋ；無所是事；沒有用的人。
（註4）蹦飆：音bangˋ beuˊ；蹦跳起來。
華語
阿源叔的工作是電子工程師，每天都是忙碌到三更半夜才能夠下班，雖然說公司給的薪水挺不錯的，不過和家人一起的時間就少了很多。有一日晚間下班返家，他車子駕駛到莊頭附近的時候，卻熄火不會發動了，！阿源叔心想：「這麼晚了！走路回去好了，明天再叫人來修理。」
他順著一條彎延的小路走著回，路旁的路燈有的不亮，有的不夠光。阿源叔心裡正在那想：「光線那麼不好，假使有壞人躲在這，那就『河壩跑馬——壞蹄』了！哪知就在這時，阿源叔聽著路邊苦楝樹林裡面，有奇怪的聲音傳出來，詳細一聽很像是有兩個人在泥地上打架，啊哦！還有衣褲扯爛的聲，他立刻清醒過來，在極近的苦楝樹下，一定有一位女孩被人欺負了！
阿源叔想：「到底我是不是要理會這件事情呢？老古人言：『人相打莫行前，人相罵莫幫言。』我生得矮小又沒什麼氣力，若是衝過去幫忙，反而被壞人殺傷怎麼辦？是不是打電話報警就算了，莫去狗打老鼠——管閒事。」阿源叔決定的過程像是千年萬載，其實過不了幾秒鐘，他聽見那小阿妹喊噭的聲愈來愈弱。他心頭抽搐想：「我一定要過去救人，不能夠不管她，這樣才對得起自己的良心。」
雖然阿源叔本來不是勇敢的人，也不是手腳靈活的人，這次他不知哪來的膽量和力氣，在他決心要幫助那小阿妹的時候，他立即變成孔武有力。立馬衝到苦楝樹叢裡面，把那個伏在小阿妹身上的人推開，就看阿源叔雖然矮小，然而這次拳頭揮過去，拳拳有力；拳拳入肉，最後尾他一腳踢著那個人的下體，那個沒有用的人痛到跳起來，跪下來喊不敢了！
在阿源叔和壞人相打那時候，終於莊裡有人發覺打電話報警，那壞人剛跪下來而已，警察就來到現場了。阿源叔心頭猛跳望回苦楝樹下，那個小阿妹還蹲在樹下哭泣，他摀著臉嚇到全身一直發抖。阿源叔說：「好了！那個人被警察抓走了，你現在安全了。你是莊裡頭誰家的女兒，阿叔送你回家去。」哪裡知，小阿妹衝過來抱著阿源叔大哭：「阿爸！我是你的女兒！」
阿源叔嚇一大跳，隨著眼淚就忍不住流下來。他把他的女兒抱緊緊，心裡想：「幸虧有出手救人，否則我不敢想會發生什麼事。」阿源叔輕輕拍著他女兒的背，小聲說：「對不起，阿爸差一點就失去你了。」他女兒在他胸前慢慢的靜下來，月光下苦楝樹个影子搖曳，見證著這場幸運的抉擇。
