文／羅寶貴，新竹市客家人（四縣腔），現下戴頭份。
在新竹市東區，有十八座山仔相連个矮山地形，故所安到十八尖山。係日本時代就開闢做森林公園，全長大約7到8公里左右，介壽亭海拔131.79公尺，係十八尖山个最高點。對當多朋友來講，除忒係時常運動散步个位所外，乜有佢兜青春个回憶。
?讀高商時，學校堵好在十八尖山下。還記得該央時，?係班項个體育股長，體育先生係林圭璋，佢渡大家去走十八尖山，山路彎彎斡斡，同學雖然走到氣凹凹仔，乜共樣順序轉到學校，?愛看頭看尾，驚怕有人無跈著。有一擺嗄正經有一個同學，身體毋鬆爽，面青里里強強會橫落去，?扶等佢慢慢轉學校保健室休息，該載無事情哦！頭擺阿姆三叮嚀四吩咐毋好去十八尖山，該搭樹仔、草仔生到塞塞無治理，輒常有鱸鰻仔鬧事，相打、食煙、唶毒都有，異得人驚。臨尾新竹市政府，大力整頓，還市民一隻恬靜个環境、分大家做得安心散步、遶山花个所在。
愛去十八尖山，有十隻登山入口做得落，?慣勢從桐花廣場上去，步道路盡原始，有一擺，?看著山狗太，恬恬無停動，?話著死忒咧！?拿竹仔去弄佢，忽然間醒過來，一下仔走到尾瀉屎，實在生趣。到了山項，有路好行，乜有當多條石碫仔做得行下山。涼亭盡多，都有人準備茶、水果、點心在該譫誃、打嘴鼓，也有人唱歌跳舞，當鬧棚。?輒常行到最高點介壽亭，遠遠看新竹市个風景，心情異鬆爽。頭擺毋知，?逐條下山路線行看啊！就看著石頭个觀音，插香有人拜喔！毋過，這幾位講乜奇怪，當少人行，試著陰涼陰涼！背尾聽人講，在清朝時十八尖山係塚埔，日本政府1924年正式建立東山公園，又安到森林公園。廢墓地將這兜無主埋骨，徙去起好个納骨塔、萬靈塔，來安慰幽魂，過在十八尖山設置，三十三座石觀音柱雕刻，舉行開光典禮，聽人恁樣講，?驚著咧，就毋敢行這兜地方。
十八尖山四季有無共樣个風景，特別好在春天去行路，種有盡靚个鳳仙花、麗格海棠、百合花、風鈴草、杜鵑、情人菊、玫瑰、繡球花，?緊行緊鼻花香，樹仔淰草鮮綠青，看著高高个樹頂，膨尾鼠在該跳上跌落，走上走下異生趣，鳥仔樹椏乜在頂高啾啾滾，盡好聽。行細路會看著生理人賣菜、水果抑係涼糕，看係有萋就順續仔買；乜有街頭藝人路脣彈奏樂器，係試著好聽就放錢分佢鼓勵。見擺，行到晝就去新竹城隍廟前食肉圓、蚵仔煎、四神湯等；今年係十八尖山100週年，市政府也有辦賞花季，定著會鬧熱煎煎。歡迎大自家來十八尖山遶尞哦！
華語
新竹市東區有十八座淺峰山頭連綿而成的丘陵地帶，所以取名為十八尖山。這座森林公園在日治時期開闢，全長約七到八公里，最高點為海拔一百三十一點七九公尺的介壽亭。許多朋友都喜歡在這裡運動散步，也承載了他們青春的回憶。
我就讀高商時，學校恰好座落在十八尖山山腳下。當時我擔任班上的體育股長，體育老師是林圭璋，帶大家去跑十八尖山；山路彎曲，同學跑得氣喘吁吁，但還是順利回到學校，我會檢查，怕有人沒有跟上。有一次有位同學身體感到不適，臉色蒼白幾乎要昏倒，我扶著她慢慢回到學校保健室休息，幸好沒事！以前，媽媽一再提醒不要去十八尖山，樹木叢生、草叢茂密沒整理，經常有流氓鬧事，打架、吸菸、吸毒都有，令人懼怕。最後新竹市政府大力整頓，歸還市民一個安寧的環境，讓他們可以安心散步欣賞山景。
前往十八尖山時，有十個登山口可供選擇，我習慣從桐花廣場出發，這條步道相當原始。看見一隻蜥蜴，一動不動地靜止著，以為它已經死了！拿起一根竹子去戲弄牠，突然間它醒過來了，就跑得飛快，實在新奇。上山後，有馬路可走，也有許多條石階可往下走。山上有很多涼亭，都有人準備茶水、水果、點心，有些在閒聊家常，也有人唱歌跳舞。在最高的介壽亭上眺望遠方，景色讓人心情愉悅。很久以前，會每條山路往下走看看，就看到了幾尊石頭雕刻的觀音像，有人在那裡上香祭拜呢！不過，這幾處地方很奇怪，很少人來，感覺陰涼的！後來聽說，在清朝時這裡是墓地，日本政府於1924年正式建立東山公園，又稱為森林公園。這墓地廢棄將無名的骨骸移走，放在已興建好的納骨塔、萬靈塔內，旨在安撫幽魂，共有三十三座石觀音柱雕刻，放這供人祭拜，嚇到了就不敢走這些地方。走在小路上會看到商販在賣菜、水果、涼糕，看到有新鮮的，會順便買一些；還可能會遇到街頭藝人在路邊彈奏樂器，如果喜歡就會打賞給予鼓勵。
十八尖山每個季節都展現獨特的景緻，我特別喜歡在春天前往，山上種滿非常漂亮的鳳仙花，麗格海棠、百合、風鈴草、杜鵑、情人菊、玫瑰、繡球花，一直走邊聞花香，樹木很多草翠綠。高高的樹上，可見到松鼠跳躍奔跑，實在生動有趣味，鳥在樹枝上啾啾叫，很好聽。每次走到中午了就去新竹城隍廟前，吃肉圓、蚵仔煎、四神湯等；今年是十八尖山百年紀念，市府也舉辦了賞花季，必定熱鬧非凡。歡迎大家來十八尖山遊玩！
