文／邱鴻春，客語支援教師，桃園楊梅客家人（海陸腔）
〈打餔娘菜〉
艾菜生來靚又香
煮熟勼水盡多湯
話著偷食打餔娘
溝通清楚後悔傷
客家人煮个鹹粄圓，除了客家人好食以外，還有盡多其他族群个好朋友，有食過儕通盤乜阿腦到會企，有一隻當重要个菣香菜就係艾菜（海陸腔：ngieˇ coiˇ），粄圓張到碗肚後，愛食以前再加一息仔豆油，該味道正經大湛斗。
艾菜還有一隻盡生趣个名仔，安到「打餔娘菜」，因為佢生生个時節，生著膨膨青青當得人惜，洗菜盆肚放等有大嫲盆，頭擺个人較艱苦省儉，無恁多東西好食，老公行過看著，心肝肚當歡喜，想講暗夜有當多菜好傍飯咧，吂知到食夜个時節，老公看著桌頂个艾菜恁少，話著餔娘自家煮食先偷食，還無搞清楚就罵佢恁圖食、恁夭壽，嗄冤家相打泌背、吵吵鬧鬧好久，包尾舞清楚後正知，原來煮熟會勼忒怕有超過三分之二較加，所以分人安到打餔娘菜。
艾粄（海陸腔：ngieˇ banˊ）乜係客家人當有名个米食，名仔雖然係艾粄，毋過佢毋係用艾菜做个，可能當多人毋知！客家婦人家運用大自然个禮物，摘田脣野生个黃艾（海陸腔：vong ngieˇ）嫩葉、嫩梗來做，尤其係冬禾割忒，滿田會生當多，頭擺這兜煞猛做家个客家婦人家，不但降子降到止、渡人渡到死，還會利用吂春耕打田个時節，遽遽去田肚摘轉來，煠熟後就做得摎粄共下亼，亼勻後就做得打艾粄咧，大人細子食到呵呵㕸㕸、歡喜靂天。
但是等到禾仔蒔落去了後，若想愛打艾粄來食，嗄無恁多黃艾好摘，該愛仰結煞正好！包尾慢慢仔，正有人想著，做得用另外一種艾，乜有人講係艾仔（海陸腔：ngieˇ er），做出來个口味，兩種食起來差毋多，在外型看起來，黃艾做个有較淺色息仔，用艾做个就較深色點仔，假使兩種摎共下也無問題，色水就會較平均咧，用艾還有一隻最大个好處，就係艾當好種，儘採竹䃗脣抑係菜廂脣，楔落去就會生，還過一年四季全有好摘，隨時想愛摘來打艾粄食全做得，非常个利便。
堵好這下就係冬禾割忒，田脣有黃艾，阿姆菜園肚乜有種艾摎艾菜，提供相片分大家來小可仔熟事一下，下二擺看著你就知咧，千萬毋好摎人講，艾粄係用艾菜做个，乜毋好再過懷疑，辛苦煮食个人有偷食哦！
華語
〈打老婆菜〉
茼蒿長得香又美
不知煮熟會縮水
以為偷吃打老婆
溝通清楚很後悔
客家人煮的鹹湯圓，除了客家人喜歡吃之外，還有很多其他族群好朋友，有吃過的都稱讚豎起拇指，有一個很重要配角就是茼蒿，湯圓盛到碗裡，要吃之前加一點醬油，那味道才真的是棒。
茼蒿還有一個有趣名字，叫做「打老婆菜」，因為長的蓬鬆綠油油，非常漂亮可愛，放在洗菜盆有一大盆，以前人比較辛苦節儉，也沒有充裕食物好吃，老公走過看到，心裡非常高興，想說今晚有很多菜可配飯了，沒想到吃晚餐的時候，看到桌上茼蒿菜那麼少，以為老婆自己煮先偷吃，還沒搞清楚就罵他貪吃、夭壽，就爭吵動起手、吵吵鬧鬧好久，後來搞清楚才知道，原來煮熟會縮水超過三分之二以上，所以人稱打老婆菜。
艾草糕也是客家人很有名的米食，名字雖然是艾草糕，不過他不是用茼蒿做的（客語是艾菜），可能很多人不知道！客家婦女運用大自然送的禮物，摘田埂野生的鼠麴草嫩枝葉來做，尤其是第二期稻作收割後，田裡會長很多，以前這些勤勞持家的客家婦女，不但自然生到不會生、帶孩子也帶到老死，還會利用尚未春耕翻土的時候，趕快到田肚摘回來，燙熟後就可以和粄糰一起搓揉，搓勻後就可以做艾草糕了，大人小孩吃到津津有味、歡天喜地。
但是等到秧苗插下去後，如果想要做艾草糕來吃，卻沒有那麼多鼠麴草好摘，那要怎麼辦才好！後來慢慢才有人想到，可以用另外一種艾草來做，做出來的口味，兩種吃起來差不多，在外型看起來，鼠麴草做的顏色稍淺，用艾草做的就較深色一點，假使兩種混在一起也沒問題，顏色自然就較平均了，用艾草還有一個最大的好處，就是艾草好種，隨便田邊防風竹林邊或是菜園邊，種下去就會長，而且一年四季都有，隨時想要摘來做艾草糕都可以，非常的方便。
剛好現在就是第二期稻作收成後，田埂有鼠麴草，媽媽菜園裡也有種艾草和茼蒿，提供相片給大家稍微認識一下，下次看到就知道了，千萬不要和人說，艾草糕是用茼蒿做的，也不要再懷疑，辛苦煮飯的人有偷吃喔！
