文／李秀鳳，新竹客家人，中小學客語先生，這下戴中壢（腔頭：海陸腔）
逐隻月第一隻摎第三隻拜四个暗晡頭七點，在中壢圖書館三樓會議室，有一群客家人聚總在這位講客，用客語演講、講笑科、講古、隨來隨鬥等等，佢兜係台灣客語國際演講會个會員，這隻演講會係國際演講會（Toastmasters International）个一隻分會，係全台灣甚至係全世界唯一講客个演講會。
客語國際演講會在九十二年摎「國際總會」世界總部提出入會个申請要求，得著7058這組編號，就恁樣開始到今有21年个歷史了，總共舉辦過447擺个例會。
客語演講會見擺个例會，都係照等「國際演講會」个方式進行，就係先做好議程表，安排好勢愛備稿演講个會友係麼儕？講麼个題目？聚會个時節，大家就照輪上台，不管係主持會議、發表演講、接受講評、講笑科、現場靈通个隨問隨答…，逐儕都有上台講客个機會，訓練大家用客語表達个能力、膽量摎技巧。
客語演講會裡肚，有一個擎頭旗个人，二十零年來，毋單淨出錢出力還出時間，毋分客語演講會倒會，這個人就係創會會長黃女容董事長，大家親暱暱喊佢黃大姊。
五年前，黃大姊摎厥老弟黃仁安董事長，同時得著客委會頒發个二等獎章，表揚佢兩姊妹除忒經營企業成功以外，還恁熱心推動客家事務，煞猛傳承摎發揚客家文化。舊年，黃大姊還得著第33屆客家台灣文化獎，逐個會友都歡喜靂天恭喜佢。
講著這隻獎，愛特別紹介：客家台灣文化獎个設立，係海外个客家台灣人摎社團，對台灣客家文化漸漸沒忒，試著當愁慮，所以在36年前，就係1988年決定設立客家台灣文化獎，用來鼓勵該兜對台灣客家文化个研究、提倡摎推廣有功勞个人士抑係團體。每一儕抑係社團，都會得著獎牌摎獎金一千箍美金。
得獎个人無限定係客家人，總愛認同台灣，無論佢个胞衣跡在哪位，講哪種語言，係戴在台灣抑國外，通棚有資格參加遴選。毋過，佢兜研究或者推廣个定著愛係台灣个客家文化。黃大姊得著這隻獎，表示戴在外國个客家人，都肯定佢對客家个貢獻。
客語演講會餳來各行各業个人才，像企業家、退休校長、大學教授、餐廳頭家、客語先生這兜，大家來到這位唯一个目的，就係煞猛講客，摎客語傳下去。現任會長鄭惠芳，係在大學教英文个教授，入會以前，佢駛車个時節都係聽ICRT，這下一上車就開始聽講客廣播電台个節目，希望做得摎自家个母語一點一滴拈轉來。
識擔任1988年還我母語運動總領隊个邱榮舉教授，第一擺來到客語演講會，就安腦這隻演講會係佢看過最會講客个社團，毋管佢幾無閒，總會抽間來參加例會。
國小退休个范明龍校長，聲胲盡亮，大家當好聽佢講古，校長講：「初一十五毋講古，三頭兩日背了祖。」佢認為講古分細人聽，係最好个家庭教育，因為忠孝節義个做人做事道理，通棚沉浸在精彩个故事情節裡肚。
在鄭會長、邱教授兩儕帶頭摎桃園市立圖書館中壢分館主任劉銀丹參詳了後，今年一月開始「魚幫水，水幫魚」个合作方式，就係圖書館提供場所、?手宣傳，客語演講會開放分鄉親免費落來參加。若係你逐隻月个第一隻摎第三隻拜四暗晡頭有閒，也歡迎你湊陣來講客。
華語
每個月第一和第四個星期四晚上七點，在中壢圖書館三樓會議室，有一群客家人聚集在這裡講客語，用客語演講、講笑話、講故事、隨問隨答等等，他們是台灣客語國際演講會的會員，這個演講會是國際演講會（Toastmasters International）的一個分會，是全台灣甚至是全世界唯一講客語的演講會。
客語國際演講會在九十二年向「國際總會」世界總部提出入會的申請要求，得到7058這組編號，就這樣開始至今有21年的歷史，總共舉辦過447次的例會。
客語演講會每次的例會，都是按照「國際演講會」的方式進行，就是先做好議程表，安排妥當要備稿演講的會友有哪些人？講什麼題目？聚會時，大家就依序上台，不管是主持會議、發表演講、接受講評、講笑話、現場機智的即問即答…，每個人都有上台講客語的機會，訓練大家用客語表達的能力、勇氣和技巧。
客語演講會裡，有一個帶頭領導的人，二十多年來，不止出錢出力還出時間，不讓客語演講會倒會，這個人就是創會會長黃女容董事長，大家親暱喊她黃大姊。
五年前，黃大姊跟她弟弟黃仁安董事長，同時獲得客委會頒發二等獎章，表揚兩姊弟除了經營企業成功之外，還很熱心推動客家事務，努力傳承與發揚客家文化。去年，黃大姊還榮獲第33屆客家台灣文化獎，每個會友都歡天喜地恭喜她。
講到這個獎，要特別介紹：客家台灣文化獎的設立，是海外的客家台灣人和社團，對台灣客家文化漸漸失傳，覺得很憂慮，所以在36年前，就是1988年決定設立客家台灣文化獎，用來鼓勵那些對台灣客家文化的研究、提倡及推廣有功勞的人士或者團體。每一人或者是社團，都會得到獎牌及獎金一千美元。
得獎的人沒有限定是客家人，只要認同台灣，無論他的故鄉在哪裡，講哪種語言，是住在台灣還是國外，全部都有資格參加遴選。不過，他們研究或者推廣的一定要是台灣的客家文化。黃大姊得到這個獎，表示住在外國的客家人，都肯定她對客家的貢獻。
客語演講會吸引來各行各業的人才，像企業家、退休校長、大學教授、餐廳老闆、客語老師等，大家來到這裡唯一的目的，就是努力講客語，把客語傳下去。現任會長鄭惠芳，是在大學教英文的教授，入會以前，她開車時都是聽ICRT，現在一上車就開始聽講客廣播電台的節目，希望可以將自己的母語一點一滴撿回來。
曾擔任1988年還我母語運動總領隊的邱榮舉教授，第一次來到客語演講會，就誇獎這個演講會是他看過最會講客語的社團，不管他有多忙碌，總會抽空來參加例會。
國小退休的范明龍校長，嗓門宏亮，大家很喜歡聽他講故事，校長說：「初一十五不講古，三天兩日背了祖。」他認為講故事給小孩聽，是最好的家庭教育，因為忠孝節義的做人做事道理，全部沉浸在精彩的故事情節裡。
在鄭會長、邱教授兩人帶頭與桃園市立圖書館中壢分館主任劉銀丹商量以後，今年一月開始「魚幫水，水幫魚」的合作方式，就是圖書館提供場所、幫忙宣傳，客語演講會開放給鄉親免費進來參加。如果你每個月的第一個和第三個星期四晚上有空，也歡迎你結伴一起來講客語。
