文／巫茂熾，台中東勢客人（大埔腔），這下戴東勢，感謝客語薪傳師羅月鳳、劉素玉指導客語寫作。
大菜大頭哩，愛過年哩喲！東勢巫家過年有共下拜祖公、祖婆个傳統，乜用大埔客語念疏文，現下个工商社會，伙房共下拜祖公係已難得个！
巫屋伙房共下拜祖公，一年總共有九到，第一到係年初一，這日特別早，係六點鐘，續落來有正月半、清明、五月節、七月半、八月半、重陽、冬節，還有年三十該日，除撇年初一，其他八到總下係朝脣七點開始拜。逐個節日，厥等愛準備合時節个牲儀，比論講，五月節斯愛用米粽拜喏，七月半毋單淨準備牲儀，還愛用米粽、粄粽、焿粽來拜；重陽就係所有祖先个生日，愛準備爺哀好食个東西；冬節該滿，歸陣人斯拜甜惜圓，桌項淰淰係一碗一碗紅紅、白白个惜圓。
逐擺拜祖公以前，阿松哥用大埔客話拜請祖公、祖婆來入座，領收裔孫準備好食个牲儀，有雞、鴨、鵝、豬肉、魷魚、豆腐乾這兜，燒金紙進前，又唸一擺疏文，主要係講請祖先各歸原位，稽首奉送祖先。巫家伙房拜託阿松哥唸疏文，因為佢對水利局公家單位退休，較有時間來準備疏文，疏文內容也愛合時。
巫屋子孫大部分係戴伙房附近个東勢區下新庄，過年、過節使得準時轉來拜喏，逐家來一、兩個人來公廳拜祖公，若係有兜人慢到，先到个人會打電話催一下，一半下有人準備牲儀毋著，阿盛嫂乜喊佢遽遽換較素絲个菜色。
共下拜祖公乜使得共下打嘴鼓，在等燒金紙進前，戴正手房个國炘會泡茶分伙房人啉，交流農業經驗，像阿寬叔對咖啡轉做茂谷柑，茂松哥種大梨，國炘老弟種柑，大家交流果樹應該愛仰脣照顧管理。婦人家在禾埕打嘴鼓，講頭擺佢兜差毋多時間降子、做月時，衫褲分東勢街路个洗衫店洗，洗衫店用車來伙房全對西門巷駛過來，一路收做月愛洗个衫褲。
人講：「一個人行較遽，一陣人行著遠。」文化傳承愛有傳个人，乜愛有承个人，巫屋子孫利用歇睏个時間準備牲儀，朝脣打早共下來燒香拜喏，盡望世世代代永流傳！
華語
長年菜大棵了，就快過年了！東勢巫家過年有共同拜祖先的傳統，也會用大埔腔客語念疏文，現在的工商業社會，伙房共同拜祖先是非常難得！
巫家共同拜祖先，一年有九次，第一次是大年初一，這天祭祖是六點鐘，特別早，接下來的元宵節、清明節、端午節、中元節、中秋節、重陽節、冬至、除夕都是早上七點開始拜祖先，每個節日拜拜，祭拜的食物要符合時節。例如，端午節要用肉粽來拜拜，中元節不只是準備三牲，還要用肉粽、鹹粽、焿粽來拜拜，重陽節是所有祖先的生日，要準備在天上的爸、媽喜歡吃的食物，冬至時，伙房人都拜甜湯圓，桌上滿滿都是一碗碗的紅、白湯圓。
每次在拜祖先之前，阿松哥用大埔客語請祖公、祖婆來到入座座，接受裔孫們準備的食物，有雞、鴨、鵝、豬肉、魷魚、豆腐乾等等，在燒金紙之前，又念一次疏文，內容是請祖先歸回原位，稽首奉送祖先。巫家人拜託阿松哥念疏文，是因為他從水利局退休，比較有時間準備疏文，且疏文內容也合乎祭拜的節日。
巫家子孫大部分都還住在伙房附近的東勢區下新里附近，過節都可以準時去伙房拜拜，每一家各派一、兩人到巫家公廳拜拜，假如有人晚到，先到的巫家人會打手機催促一下，假如有人準備牲禮不適合，阿盛嫂也會提醒他較適合的菜色來拜拜。
共同祭祖也可一起聊天，在等待燒金紙時，在右橫屋住的國炘，會泡茶請伙房人喝茶，交流農業經驗，像阿寬叔將咖啡轉做茂谷柑，茂松哥種大梨，阿國堂弟種柑，大家交流果樹如何照顧和管理。巫家嫂嫂們也在三合院的禾埕聊天，講過去她們幾乎同時間生小孩、坐月子，那期間的衣服都是由東勢街上的洗衣店清洗，洗衣店的車子都從西門巷開進來，沿路收坐月子要清洗的衣服。
常言道：「一個人走得快，一群人走得遠。」文化傳承是有傳，也有承接的人，巫家子孫利用休息時間準備牲禮，一大早一起燒香拜祖先，希望世世代代永流傳！
