文／邱鴻春，客語支援教師，桃園楊梅客家人（海陸腔）
全台係唯一
退役車子無亂拂
環保福德護莊捩
–〈火車伯公〉／邱鴻春（海陸腔）–
身為客家人，相信大家多多少少應該有聽過、抑係拜過，盡多無共樣个伯公，像係石頭伯公、樹頭伯公、水頭伯公、田頭伯公、莊頭伯公、茶園伯公……等等，有聽過火車伯公無？你無聽毋著，就在伯公岡就有全台唯一个火車伯公。
簡單講，就係鐵路局在民國98年，選定在伯公岡這位規劃設廠，準備將松山个保修廠，歸下徙下來，尋著這位占地有50零甲个所在，但係堵好箍著當地居民个信仰—伯公廟，正高不將先請伯公在別位暫戴，等到機廠起好正請轉來，但係103年年底，所有工程完工該時，準備愛摎伯公請轉來，吂知機廠負責人嗄講，這係公所在，做毋得起伯公廟，當地居民嗄無結無煞，毋知愛仰般形正好！有盡多熱心地方人士，摎鐵路局長官打合當久，還係無一隻好个結果，包尾正有人提議，係毋係做得用報廢車子來做伯公廟，該就毋會違反規定，又做得滿足當時所答應居民个要求，甚至變做地方个特色伯公。臺鐵方面初聽著這想法，感覺像人有通樣，經過內部个熱烈討論後，總算摎居民宣布：「做得咧！」
經過多擺跌筊問伯公，總算在機場完工五年後，在108年10月請神安座，居民這兜相賽歡喜靂天。
火車伯公係目前最有特色个伯公廟，雖然無靚靚雕花作棟个廟體，乜無框金金亮亮个缶壁摎鋪地磚，除了保留客家莊頭个信仰文化之外，其實還係一隻當湛斗个裝置藝術作品，利用報廢个第一代電氣化自強號「英國貴婦（EMU100型）」个車子來改裝，脣頭細花園肚有〈母子情深〉裝置藝術，車子外背四向有山水畫、油畫騰雲駕霧，最難得个係，這兜全係出自機場裡背个工程師之手，完全毋使尋外背專業个業者，可見鐵路局人才斗斗。
臺鐵安名「富岡基地土地公文化創作園區」，開放提供分所有居民、信眾祈求平安順利，同時乜係伯公岡个新地標，歡迎各地好朋友來參拜，有拜有保護哦。同時也希望，有機會帶動地方个觀光，順續來伯公岡老街行行遶遶，食看啊客家美食點心，感受在地客家風情，期待你个光臨。
富岡基地土地公文化創作園區
開放時間：逐日／05：00－19：00
地址：桃園市楊梅區富豐里富全街1號
華語
全台的唯一
退役車廂無亂扔
環保福德護莊行
–〈火車伯公〉／邱鴻春（華語）-
身為客家人，相信大家多多少少應該有聽過、或是拜過，很多不一樣的土地公，像是石頭伯公、樹頭伯公、水頭伯公、田頭伯公、莊頭伯公、茶園伯公……等等，有聽過火車伯公嗎？你沒聽錯，就在富岡就有全台唯一的火車土地公。
簡單說，就是鐵路局在民國98年，選定在富岡這裡規劃設廠，準備將松山的保修廠，全部遷下來，找到這裡占地有52公頃的地方，但是剛好圈到當地居民的信仰—土地公廟，才很捨不得的，先請土地公在別的地方暫住，等到機廠蓋好才請回來，但是103年年底，所有工程完工的時候，準備要將土地公請回來，沒想到機廠負責人卻說，這是公有地，不可以蓋土地公廟，當地居民卻心急如焚，不知要怎樣才好！有很多熱心地方人士，紛紛和鐵路局長官協調，還是沒有一個好的結果，後來才有人提議，是不是可以用報廢車廂來做土地公廟，那就不會違反規定，又可以滿足當時所答應居民的要求，甚至成為地方的特色土地公。臺鐵方面初聽到這想法，感覺像是有通，經過內部的熱烈討論後，總算和居民宣布：「可以了！」
經過多次跌筊請示土地公，總算在機場完工五年後，在108年10月請神安座，所有的居民都歡天喜地。
火車土地公是目前最有特色的土地公廟，雖然沒有漂亮的雕樑畫棟廟體，也沒有貼閃閃亮亮的壁磚和鋪地磚，除了保留客家莊的信仰文化之外，其實還是一個很棒的裝置藝術作品，利用報廢的第一代電氣化自強號「英國貴婦（EMU100型）」的車廂來改裝，旁邊小花園裏面有〈母子情深〉裝置藝術，車廂外面四周有山水畫、油畫騰雲駕霧，最難得的是，這些全是出自機場裡面的工程師之手，完全沒有找外面專業的業者，可見鐵路局人才濟濟。
臺鐵取名「富岡基地土地公文化創作園區」，開放提供給所有居民、信眾祈求平安順利，同時也是富岡的新地標，歡迎各地好朋友來參拜，有拜有保佑喔。同時也希望，有機會帶動地方的觀光，順便來富岡老街走走逛逛，吃看看客家美食點心，感受在地客家風情，期待您的光臨。
富岡基地土地公文化創作園區
開放時間：每日／05：00－19：00
地址：桃園市楊梅區富豐里富全街1號
