文／李秀鳳，新竹客家人，中小學客語先生，這下戴中壢（腔頭：海陸腔）
下課拚掃時節，在教室肚，輒常看著學生仔擎等「缺牙耙」个掃把掃地泥。看佢兜掃地泥像寫大字，任掃都掃毋淨。成時忍毋核，?會去壁角擎一支掃把來?掃。唉！怨怪學生毋得，逐支掃把都缺牙耙，仰掃得淨？
臨暗仔騎自行車轉屋，看老街溪脣頭山排个娘婆開花了，隨風搖來搖去實在當靚。著啦！就愛用阿婆紮个娘婆花掃把來掃地泥正會掃淨俐，毋單淨掃垃圾，連塵灰都掃到淨淨。
還細時節，看著漫山遍野个娘婆花，就知入秋了，阿爸會去山頂割轉大大把个娘婆花在禾埕項晒燥。阿婆三不二時會去巡巡、貶貶啊，摎無用个葉仔擘忒。看娘婆花青色个莖變赤，就會拿等一把一把晒燥个娘婆花，在禾埕背个大石牯頂高輕輕仔敲。
黏時，白色个娘婆花分風吹到滿天飛，?兜一大群細孲仔在娘婆花肚舂上打落，緊走緊喊：「落雪哩喲！落雪哩喲！」阿婆開聲罵：「一群戇牯痴嫲，等下歸身虐削就知死！」日頭花晟等阿婆面皮打摺个笑容，到這下還印在?个腦膈肚。
阿婆講：「娘婆花愛敲淨來，係無，會緊掃緊屙糟。」所以，有兜無敲淨个娘婆花，阿婆會摎佢捋淨來。續下來，就看阿婆坐在矮凳頂展功夫。阿婆先摎無花个娘婆花莖分做一束一束，先用娘婆稈皮䌈好勢，過用當利个禾鐮割忒一兜䌈在中央三股兩股長个莖（恁樣掃把柄正毋會昶大把毋好揢），過用細細條个麻索綯緪來。最尾，摎五束个娘婆花莖紮做一大把，看阿婆細心細義用麻索摎柄纏到緪緪，再過摎尾節个莖割齊來，一支掃把總算做完工。
阿婆紮个掃把拶腹又當緪，正經耐用，儕儕都安腦佢个巧手。阿婆講：「打田打地打毋著手藝」，佢紮掃把个好手藝，係?公教个。阿公當後生就去做仙，好得阿婆有學著仰般紮掃把。當懷念擎這種環保个掃把掃地泥，屋肚壁角滿哪仔都掃到淨淨俐俐。無像這下个塑膠掃把，掃歸晝邊還係泥了了。
?教一個細倈學生，掃把愛擎正來定定仔掃，毋好花螺心這畫一下、該畫一下，當然掃毋淨。問佢：「若姆毋識喊你擎掃把?掃屋下，著無？」佢應?：「?屋下無掃把。」
?講：「有影！這下當多人屋下無掃把，用吸塵器較利便。」細阿哥搖頭講佢屋下也無吸塵器。?著下驚：「該你屋下用麼个掃地泥？」佢笑等講：「用掃地泥機器人啊！」哈哈哈！?也跈等大聲笑。
華語
下課打掃時間，在教室裡，常看到學生拿著「缺門牙」的掃把掃地。看他們掃地像寫毛筆字，怎麼掃都掃不乾淨。有時忍不住，我會去牆角拿一支掃把來幫忙掃。唉！不能怪學生，每一支掃把都缺門牙，怎掃得乾淨？
傍晚騎腳踏車回家，看老街溪旁山坡上的芒草開花了，隨風搖來搖去實在很美。對啦！就是要用阿婆紮的芒草花掃把來掃地才會掃乾淨，不只掃垃圾，連灰塵都可以掃得很乾淨。
小時候，看著漫山遍野的芒草花，就知道入秋了，爸爸會去山上割一大把的芒草花在曬穀場上曬乾。阿婆三不五時會去巡巡、翻翻啊，把沒用的葉子剝掉。看芒草花綠色的莖變黃褐色，就會拿著一把一把曬乾的芒草花，在晒穀場後方的大石頭上面輕輕敲打。
馬上，白色的芒草花被風吹得滿天飛，我們一大群小孩在芒草花裡亂竄，一邊跑一邊喊：「下雪了！下雪了！」阿婆出聲罵：「一群笨小孩，等一下全身癢不舒服，就知道不好了！」從雲縫中灑下的陽光照著阿婆滿臉皺紋的笑容，到現在都還烙印在我的腦海裡。
阿婆說：「芒草花要敲乾淨來，要不然，會越掃越髒。」所以，有些沒敲乾淨的芒草花，阿婆會把它搓乾淨。接下來，就看阿婆坐在矮凳上施展功夫。阿婆先把已經沒花的芒草花莖分做一束一束，先用芒草稈皮綁好來，再用鋒利的鐮刀割掉一些綁在中間三分之二長的莖（這樣掃把柄才不會太大把不好握），再用小條的麻繩綁緊來。最後，將五束的芒草花莖紮成一大把，看阿婆小心翼翼用麻繩將柄纏得非常緊，再把尾節的莖割齊來，一支掃把總算完工。
阿婆紮的掃把紮實又很緊，真的耐用，每個人都誇獎她的巧手。阿婆說：「水災毀田地但損不了個人的手藝」，她紮掃把的好手藝，是我阿公教的。阿公很年輕就過世，還好阿婆有學到如何紮掃把。很懷念拿這種環保掃把掃地，屋裡牆角到處都掃得乾乾淨淨。不像現在的塑膠掃把，掃了半天還是滿地沙塵。
我教一個男學生，掃把要拿正來慢慢掃，不要花心這邊畫一下、那邊畫一下，當然掃不乾淨。問他：「你媽從來不曾叫你拿掃把幫忙掃家裡，對嗎？」他回我：「我家沒掃把。」
我說：「確實！現在很多人家裡沒掃把，用吸塵器較方便。」小阿哥搖頭說他家裡也沒有吸塵器。我嚇一跳：「那你家裡用什麼掃地？」他笑著說：「用掃地機器人啊！」哈哈哈！我也跟著大聲笑。
