文／羅倩英，護理師、高雄美濃客家人、現下歇美濃（腔頭：南四縣腔）
講到結婚，?等个時代緊在該改變，現代社會有越來越多人選擇毋結婚，有兜後生人乜會兩儕人直接去戶政事務所登記，無辦桌請人了，故所，愛在這下个社會，看著傳統个客家婚禮，斷真係非常珍貴、難得个事情。
客家婚禮裡背有兩項不可缺少个東西，就係祭祀同八音。再來還有六個禮俗，包括敬外祖、敬內祖、迎娶、食晝（插新娘花）、上燈祭祖、謝媒，還有食新娘茶這六個。敬外祖就係敬神、敬伯公，這係有順序个喔，敬外祖做毋得隨便亂拜，愛先拜阿姆、阿婆同婆太這片个祖先，再來敬神、敬伯公，還愛準備彩旗、茶、新丁粄、五牲等各種祭品來祭拜，講著彩旗，還細个時節，時常會看著路項个新娘車，窗仔門都會插等彩旗抑係甘蔗，這下都無麼看著了，正式分人盡懷念。
敬外祖个時節，一定會有八音團共下表演，毋過科技進步，蓋多人就自家放八音，無請八音團到現場表演咧，抑係有兜後生人，因為驚吵驚見笑，乜毋好有八音團。敬外祖結束，愛歸到自家屋家來敬內祖，就係拜屋家个祖先，若係家族裡背个長子、長孫，抑係還細有許願个，還愛拜天公還神，?有參加過阿哥个還神，該場面正式裝啊蓋大，還會有蓋多个親戚朋友共下來鬥鬧熱，係一個家族愛討新娘，共下來慶祝个感覺。
還神過後就會準備迎親，迎親愛準備个東西又還過多喔，除了八音在現場鬧熱，一定會用彩旗來辟邪，還會有男燈，男燈係添丁進財个意思，其他還有長命草芋頭、老太伯、文房四寶這兜，其中?覺著蓋生趣个就係老太伯，老太伯係麼个呢？老太伯在結婚个時節，係驚鬧洞房鬧到忒過分，愛用來鎮壓，其實毋單淨結婚會有老太伯，祭祖个時節乜有人會做老太伯來鎮壓，用來阻擋家族裡背發生是非。老太伯乜生到蓋生趣喔，佢下背會用冬瓜撐等，頂高用豬肺同氣管，氣管會畫做人个樣仔，豬油網準衫著，氣管挖隻空來食菸，看起來正式就像一個老阿伯食等菸在現場坐鎮樣仔。
迎親个過程，新郎愛到細妹仔屋家个時節，女家頭愛準備菸抑係檳榔拜轎門，來請新郎下轎入屋，乜愛準備甜个圓粄仔抑係甜茶，來招待男家頭來个人，接下來新郎新娘會共下來祭拜女家頭个祖先。阿公婆拜好，就愛同阿爸阿姆拜別、?羅帕，續等新娘就會分長輩帶上轎，準備來去新郎屋家。出發个時節，新娘个阿姆會潑一碗水，表示希望妹仔出嫁後莫忒想屋家，新娘乜會擲一把扇仔，表示會改忒以前个壞習慣，好好做一個好心臼。
同新娘討歸來个時節，東西同人數都愛湊雙，有男燈就愛有女燈，還愛有拖青、掛尾蔗、花布籃同帶路雞，帶路雞係一隻雞公一隻雞嫲，這兩隻雞仔定著愛有四隻月之後正可以㓾來食。新娘下轎个時節，愛用遮仔抑係米篩遮等，有避邪祝福个意思。下轎之後就係入洞房，新郎會用秤陀个秤仔來將羅帕掀開來，這時節媒人抑係長輩就會講「秤不離陀，陀不離秤，你等兩儕永永遠遠結做好公婆了喔」，現場就會有蓋多人共下喊「有喔」，正式蓋生趣，結婚蓋像在該過關樣仔，愛一關一關完成正做得討著新娘。
華語
說到結婚，我們的時代一直在改變，現代的社會有越來越多人選擇不要結婚，有些年輕人也會兩個人直接去戶政事務所登記，不辦婚宴客了，所以，要在現在的社會，看到傳統的客家婚禮，真的是非常珍貴、難得的事情。
客家婚禮裡面有兩項不可缺少的東西，就是祭祀還有八音，再來還有六個禮俗，包括敬外祖、敬內祖、迎娶、結婚儀式（插新娘花）、上燈祭祖、謝媒，還有喝新娘茶這六個。敬外祖就是拜神、拜伯公，這是有順序的喔，敬外祖不能隨便亂拜，要先拜媽媽、外婆、外曾祖母這邊的祖先，再來拜神、拜伯公，還要準備彩旗、茶、新丁粄、五牲等各種祭品來祭拜，講到彩旗，還小的時候常常看到路上的新娘車，窗戶都會插著彩旗或是甘蔗，現在都沒什麼看到了，真的很讓人懷念。
敬外祖的時候，一定會有八音團一起到現場演奏，不過科技進步，很多人就會自己播放八音，不會再請八音團到現場表演了，或是有些年輕人，因為怕吵怕丟臉，也不喜歡有八音團。敬外祖結束後，要回到自己家裡敬內祖，就是拜自己家裡的祖先，若是家祖裡面的長子、長孫，或是小時候有許過願的，還要有拜天公、還神，我就有參加過哥哥的還神，那個場面真的盛大，還會有很多親戚朋友一起來湊熱鬧，是一個家族要娶新娘，一起來歡慶的感覺。
還神之後就會準備迎娶，迎娶要準備的東西又更多，除了八音在現場熱鬧以外，一定會用彩旗來辟邪，再來還有男燈，男燈就是添丁進財的意思，其他還有長命草芋頭、老太伯、文房四寶這些，其中我覺得很有趣的就是老太伯，老太伯是什麼呢？老太伯在結婚的時候，是怕鬧洞房鬧得太過分，要用來鎮壓的。其實不只結婚會有老太伯，祭祖的時候也會有人做老太伯來鎮壓，是要用來阻擋家族裡面發生是非。老太伯也長得很有趣喔，他下面會用冬瓜來支撐，上面用豬肺和氣管，氣管會畫成人的樣子，用豬油網做衣服，氣管會挖洞叼根菸，看起來真的就像一個老伯伯叼著菸在現場坐鎮一樣。
迎娶的過程，新郎要到女方家的時候，女方要準備菸或是檳榔拜轎門，來請新郎下轎進屋子，也要準備甜湯圓或是甜茶來接待男方一同來迎娶的人，接下來新郎新娘會一起來祭拜女方祖先。祖先拜好，就要和女方的爸爸媽媽拜別、蓋頭紗，新娘會由長輩帶上轎，準備前往新郎家。出發的時候，新娘的媽媽會潑一碗水，表示希望女兒出嫁後不要太想念家裡，新娘也會丟一把扇子，表示會改掉以前的壞習慣，好好做一個好媳婦。
將新娘迎娶回來的時候，東西跟人數都要準備雙數，有男燈就要有女燈，還要有托青、掛尾蔗、花布籃和帶路雞，帶路雞是一隻公的一隻母的，這兩隻雞一定要四個月以後才能殺來吃。新娘下轎的時候，要用傘或米篩遮住，有避邪及祝福的意思。下轎之後就是進洞房，新郎會有秤陀的秤子將頭紗掀開，這個時候媒人或是長輩就會講「秤不離陀，陀不離秤，你們倆個永永遠遠成為好夫妻了喔」，現場就會有很多人一起喊「有喔」，真得很有趣，結一個婚就好像在闖關一樣，要一關一關完成才可以娶到新娘。
