文／李文煥，國中特殊教育教師，苗栗客家人（腔頭：四縣腔）
在一般人講着打保齡球該央時，亻恩俚个腦膈肚黏時就會浮現出一隻鬧熱个場景：朋友、屋下人共下享受汗水同笑容。毋管係搞到樂暢；抑係挑戰自家个得分，這兜緊張刺激个畫面，對一般人看來係當平常个事。毋過，對視障人士來講，打保齡球嗄係一個難度當高，還過無法度剪徼（註1）个運動，因為保齡球愛靠目珠去看，正知得擲球方向同力頭，這對大部份个視障朋友來講係無法度達著个目標。
毋過，對苗栗視障協會來个一群視障朋友，佢兜透過煞猛訓練摎重複練習，還係做得打幫導向桿（註2）輔具摎志工同影像講出來，打㪐了因爭目珠毋好造成个打保齡球障礙。佢兜充份使用自家其它个感覺功能取代視覺，比將講：聽覺、觸覺摎本體覺來輔助判斷，成功達著打保齡球个目標。
這群視障朋友比比企在球道項時，佢兜全部親像翹起（註3）兩隻耳公，耳角角仔在該聽撞着球罐仔个聲音同氣氛，展出（註4）自家擲球个技術，迎接球仔打出去時个挑戰。佢兜每一擺摎球仔擲出去，都需要調整擲球位仔同力頭，球仔个重量、質感摎手个感覺都做下係愛詳細掌握个孔竅，佢兜摎自家各項个感覺放大、展開、伸長變做獨特个優勢。
這兜年來，因為苗栗縣个保齡球館一間間仔收忒，視障朋友想打保齡球嗄愛到當遠个豐原正有，好得視障協會个社工還過志工團隊毋驚艱苦，長年陪等這群煞猛精進自家个會員去練習，看等佢兜一擺一擺進步，乜感受着佢兜一擺一擺心滿意足个笑容。在逐擺練習个過程裡肚，有成時因為打球个路線變化，可能擲毋著方向得著當少个分數，毋過佢兜毋會失志抑係放棄。顛倒係，這兜打擊鼓舞佢兜繼續打拚，漸漸仔改善佢兜个技巧，一息一息向還較高个水準前進。
故所，視障个人打保齡球毋單淨係一種運動个體驗，還展現了人類勇往直前个精神，還有超越自家个勇氣。佢兜个打拚乜分還較多人瞭解摎欣賞。分亻恩來肯定這群視障會員恁煞猛，雖然在過忒年个全國身障運動會，佢兜無一定會係代表本縣參賽个保齡球選手。毋過，佢兜這駁仔恁拚，互相鼓勵、勇敢領受挑戰个精神，還較值得亻恩阿腦。
註解：
（註1） ：剪徼（jienˋgieuˋ）：取巧、僥倖之意，作者家鄉的用法有在賭博時耍老千的意思。
（註2）：導向桿：一種為盲人設計，放在球道開頭，輔助引導盲人摸著桿子向前擲球的輔具。
（註3）：翹起（ngieu hiˋ）：豎立、豎起。
（註4）：展出：展現出來之意，在本文作者發音為dienˋcudˋ。
華語
在一般人說到打保齡球的時候，我們的腦海裡馬上就會浮現一個熱鬧歡樂的場景：朋友、家人一起享受汗水與笑容，不管是抏到快樂起勁；或是挑戰自己的得分，這些緊張刺激的畫面，對一般人看來是再平常不過的事。然而，對於視障人士而言，打保齡球卻是一個難度極高，並且無法取巧的運動，因為保齡球愛靠眼睛去看，才能夠引導擲球方向與力道，這對大部份个視障朋友而言是無法達到的目標。
不過，從苗栗視障協會來的一群視障朋友，他們透過努力訓練反覆的練習，仍然能夠用導向桿輔具及志工口述影像的協助，突破了視覺不便造成的打保齡球障礙。他們充份使用自己的其它感覺功能取代視覺，例如：聽覺、觸覺和本體覺來輔助判別，成功達到打保齡球的目標。
當這一群視障朋友並肩站在球道上時，他們都彷彿豎起兩個耳朵，認真在那聽撞擊球瓶的聲音與氣氛，展現自己投球的技術，迎接球發出去時的挑戰。他們每一次把球投擲出時，都需要調整擲球位置與力度，球的重量、質感和手部感覺都是他們需要詳細掌握个關鍵，他們把自己各項的感官放大、 擴展、延伸轉變為獨特的優勢。
這些年來，因為苗栗縣的保笭球館紛紛歇業，視障朋友要打保笭球必須至豐原的保齡球館，幸好視障協會的社工及志工團隊不辭辛勞，長年陪著這群努力精進自己的視障會員前往練習，看著他們一次一次進步，也體會著他們一次一次滿足的笑容。在每次練習的過程中，有時候因為發球的軌跡變化，可能投錯了方向得到了很少的分數，但他們並不氣餒或放棄。相反的，這些挫折鼓舞著他們繼續努力，逐漸改善他們的技巧，一點一點朝著更高的水平前進。
因此，視障者打保齡球不僅是一種運動的體驗，更展現了人類不屈不撓的精神，以及突破自我的勇氣。他們的努力也值得更多人瞭解與欣賞。讓我們肯定這一群視障會員的努力，或許在明年即將到來的全國身障運動會，他們未必是代表本縣參賽的保齡球選手。然而，他們這些日子的奮鬥，鼓勵彼此，勇於接受挑戰的精神，更是值得我們讚賞。
