新竹縣竹北市一間還在起个屋新建案頭前 大路昨晡日嗄出現大窟
【蘇佑昇／西湖海陸腔】新竹縣竹北市莊敬六街有一間還在起个大樓，昨晡日朝晨路脣出現大窟，造成一台車仔跌入去大窟裡背，經過時代力量个立法委員邱顯智調查，這間大樓在起樓期間，淨係周邊个道路，加上這擺就係第５擺發生路脣漯忒个情形，邱顯智講，請新竹縣政府一定愛好好調查，也希望監察院調查相關人員敢有失職。
新竹縣政府講，目前已經喊建案个廠商黏時停工，進行全面調查，尋出來道路漯忒个原因。新竹縣政府工務處乜講，目前判斷道路漯忒个原因係建商挖地下室抽地下水，正造成土砂層部分毋見忒，路正會漯忒，所以新竹縣政府為著避免附近个道路過發生漯忒个情形，已經有要求這間建設公司，愛先透過「透地雷達」設備，詳細去檢測建案个周邊道路，敢係土質流失造成大窟，假使係這隻原因，就愛煞煞改善處理。
這滿新竹縣政府會摎新竹地檢署達成共同个想法，一定會要求工地達成工地安全，確定鑑定報告結果係完全安全个情形，建商還愛舉辦施工个說明會、納淨所有个罰鍰，新竹縣政府正會評估建商敢做得辦理復工，請鄉親做得放心。
最尾來關心台灣股票
因為美國股市那斯達克个指數挷高百分之2.43，帶動台灣電子股指數今晡日也挷高，企上去15500點以上，最尾加權指數係收在15579.18點，漲幅有167.69點，成交價值係新台票2222億空7百萬個銀。今晡日8大類股票淨有做紙類个股票跌價，其他７大類行業个股票全部係起價个情形；像係晶圓代工雙雄台積電係收在502箍，起價8.5箍，漲幅係百分之1.72；聯電係收在49.1箍，漲幅百分之0.51；IC設計大廠聯發科係漲幅百分之0.45來到665箍；鴻海係收在104.5箍，漲幅係百分之0.97，以上係今晡日台灣股市个消息做得分有投資股票个鄉親參考。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
