竹縣花3年解決「竹東客家音樂村」占地難題　獲客委會補助4.6億

2023年04月26日

00:00

新竹縣花了３年零个時間打官司成功解決「客家文化大禾埕計畫」个土地問題　也拿著客委會補助新台票4.6億個銀

【蘇佑昇／西湖海陸腔】新竹縣政府在2018年提出在竹東起客家音樂村个計畫，摎客委會同步申請補助經費，嗄因為土地分業主占等，造成爭議，補助个經費也暫時个取消，之後新竹縣政府摎法院提出个訴訟官司，到了2021年6月，經過3審个定讞確定這隻土地个業者愛拆忒屋仔，摎土地還分新竹縣政府，新竹縣政府乜摎原本个「竹東客家音樂村計畫」改成「客家文化大禾埕計畫」，客委會前幾日也核定，會用前瞻个特別預算補助這隻計畫新台票4.6億個銀，來起「客家文化大禾埕」。

根據了解原本个竹東客家音樂村个計畫，預定个土地係3.0151公頃，位所係竹東鎮北興路、工業一路摎工業二路之間，其中新竹縣政府摎國家財產局購買个土地有3058平方公尺，毋過這隻土地嗄分業主占等起鐵皮屋仔做修車廠，業者係講，這隻土地係祖先傳下來个土地，無意願離開，所以也造成這隻計畫延纏，客委會也希望新竹縣政府先解決問題，正來申請補助經費。

這滿經過3年零个時間摎土地問題解決之後，新竹縣政府交通旅遊處个處長戴志君表示，客家文化大禾埕个經費做盡係13.1億個銀，其中法定停車場係5.2億個銀係新竹縣政府愛自家出錢，「音樂文創禾埕」係6.1億個銀，這隻「音樂文創禾埕」客委會會補助4.6億個銀，伸下來毋罅个錢，愛新竹縣政府自家出。

戴志君講，續下來音樂文創禾埕會起4層樓个1萬1000平方公尺大型屋仔，交通旅遊處也會依照客委會審查个意見修正提案个資料，按算4月底回函客委會，同步研擬客家文化大禾埕發包摎執行計畫，希望做得順利遽遽分大家看著新竹客家音樂文化个靚。