桃園龍岡米干節結合滇緬泰美食、潑水文化　超熱鬧異國慶典只到5月1日

2023年04月24日

00:00

好搞又好食个桃園龍岡米干節登場

【蘇佑昇／西湖海陸腔】第二擺國民黨摎共產黨在中國內戰，其中在雲南有一支無愛摎共產黨投降个部隊，就流亡到了緬甸這隻國外異鄉暫時生活，到了 1953、1954年之間，這兜異鄉國民黨个軍隊撤退到台灣，徙到桃園龍岡戴，也摎雲南、緬甸這兜飲食文化傳到台灣，經過恁多年，這滿桃園中壢區、平鎮區還有八德區這兜所在，這幾下年全部會舉辦鬧熱个「龍岡米干節」个慶典文化。

桃園市政府表示，今年桃園龍岡米干節活動，會從4月22到5月初1展開，這乜係等了5年，龍岡米干節重新轉到龍岡忠貞新村文化園區舉辦，所以桃園市政府觀光旅遊局講，今年也有特別安排水花火舞个主題活動，歡迎大家來龍岡感受當年國民政府孤軍從雲南還有泰國緬甸北部撤退來到台灣，摎這兜國外个文化、美食帶來龍岡个歷史，桃園市政府也講，經過恁多年个文化融合之後，桃園出現其他所在當難得看著个景點還有美食，大家千萬毋好錯過一年一擺个龍岡米干節，來感受濃濃个泰國、緬甸還有雲南文化慶典。

桃園市政府觀光旅遊局局長周柏吟也講，今年龍岡米干節長達2隻禮拜，也特別規劃「水」摎「火」這兩大主題分大家來體驗，這隻禮拜首先係「潑水節」，做得分大家先來搞潑水，潑水个所在係桃園个「雲南文化公園」，除了潑水之外，鄉親也做得摎佛祖淋水來祈求平安；續下來第二隻禮拜係「火把節」，火把節个所在係忠貞新村文化園區，大家做得來擎火把祈福，正經當生趣。

最尾提醒鄉親，因為龍岡个米干節這兩隻禮拜周邊會實施交通管制，加上周邊个停車位仔也有限，活動脣頭道路也毋係闊，所以假使鄉親駛車仔來，愛全部停過去龍岡大操場，正過坐毋使錢个主辦單位車仔到會場，還係無駛車仔个鄉親做得坐火車到中壢火車站，過轉車桃園客運「112南」个車枋到忠貞站下車就到會場了，以上桃園龍岡米干節个活動訊息做得提供分大家參考。