文／羅寶貴 新竹市客家人，現下戴頭份（海陸腔）
思愐起細人時節，屋下恁窮苦，哪有零用錢好使，入小學後摎阿哥阿姊避暑去新竹市中華路个藝品店做臨時工，試電珠仔抑係包裝个頭路，該當時加減賺兜零用錢就當歡喜。
國中一年生該下，清明到了，細哥講：「渡妳去賺零用錢，尋一支禾鐮仔，跈等亻厓去新竹市成德國中脣項个第五公墓割草，有錢乜有艾粄好食。」細哥手腳盡遽，黏邊走去湊鄰舍个細人伴，一轉首斯無看著人。臨時及急抓著禾鐮摎細刀嫲後，在後背追等去，從青草湖對面个半崎起勢，蹶上山頂高，一群人早就毋知走去哪。
這山路係一條牛車細路，礫礫矻矻當多細石牯，盡毋好行。脣項高天天个油加利樹，無心性好欣賞，愛煞煞追著佢兜正著。背尾總算追著了，來到該片塚埔，生草打弄。清明係華人最重視个節日，該日當多人來掛紙，歸家族人難得一年聚總祭祖一擺，佢兜準備到當豐沛，有三牲、糖仔、水果、紅卵、雞卵糕、發糕、艾粄、餅這兜東西，「食果子拜樹頭，食水愛知水源頭」這斯係毋忘本个精神。
細哥去問來掛紙个主人愛割草無？結果該主人講愛用細倈仔就好，較有力斬草除根。阿姆哀！今晡日敢會石灰掞路——打白行？無人愛用細妹仔割草，心肝肚毋甘願，亻厓當當發閼愛噭毋得嘴扁、眼橫橫看等該主人該下，細哥喝一聲：「還毋煞煞去別位尋該大門風水、人多草長个地方？在該發琢呆麽个？」
亻厓聽著煞煞摎另外兩個鄰舍阿姊離開去尋，行該高高低低个墓地，尋著盡大門个墓地，遽遽挨兼去問愛割草無？總算有主人願意分亻厓兜割草，還暢哦！亻厓心肝肚歡喜當煞猛割草，摎屙糟地泥，拚掃到淨淨俐俐，正經「三人同一心，黃泥變成金」。?兜拿著錢又去尋下一門風水，連續整理幾門風水悿了正休息，無幾久，聽著紙炮仔響，煞煞去排列仔分艾粄，乜有分到銀角仔。
褲袋裝淰淰食个，尋著細哥佢兜人，大家共下坐下來食艾粄，講兜該下發生个生趣事情。山腳下有外省老兵牯開个賣雜細店，亻厓兜去買枝仔冰、零嗒食，兩隻手分草割到血絲淰淰，還痛哦，賺錢正經無恁該啊！但係自家賺錢買个圓糖仔滋味，當懷念。麽儕有恁樣个經驗，請擎手？
華語
回憶起小孩時，家裏這麼窮，哪有零用錢呢？進小學後跟著哥哥姊姊暑假去新竹市中華路的藝品店做臨時工，測試燈泡或者包裝的工作，那時後加減賺點零用錢就很高興。
國中一年級時，清明節到了，小哥說：「帶妳去賺零用錢，找一支鐮刀，跟著我去新竹市成德國中旁邊的第五公墓割草，有錢也有艾草糕好吃。」小哥手腳很快，馬上去找鄰居的玩伴，一轉眼就不見人影。臨時很急拿到鐮刀與小刀後， 在後面追趕，從青草湖對面的半山坡開始，爬上山頂上，一群人早就沒看到。
這是一條牛車小路，突出不平的很多小石頭，很不好走。旁邊高聳的油加利樹，無心欣賞，趕快追到他們。來到這片墓地，雜草叢生。很多人來掃墓，掃墓是中國人最重視的節日，整家族人難得一年相聚祭祖，他們準備得非常豐盛，有三牲、糖果、水果、紅蛋、雞蛋糕、發糕、艾草糕、餅這些東西，這就是「吃水果拜樹頭，喝水要知水源頭」，不忘本的精神。
小哥去問來掃墓的主人需要割草嗎？結果那主人講要用男孩就好，比較有力斬草除根。我的媽呀！今天會石灰撒路上——白來一趟嗎？沒人要用女孩割草，心裡很不甘願，正當生悶氣想要哭卻無法哭出來而強抿著嘴，睜大兩眼，狠狠的瞪著主人時，小哥大叫一聲：「還不趕快去別的地方找風水大人多草長的地方？在那邊發愣什麼？」
我聽到趕快與另外兩位鄰居姊姊離開去找，走那高高低低的墓地，找到很大門的墓地，趕緊靠過去問要割草嗎？總算有主人願意給我們割草，好高興哦！心裏歡喜當然認真割草，將骯髒地掃得非常乾淨，真的「三人同一心，黃泥變成金」我們拿到錢又去找下一處墓地，連續整理幾處墓地很累才休息，沒多久聽到鞭炮聲，趕快去排隊拿艾草糕，也有拿到硬幣。
褲子口袋裝滿滿吃的東西，找到小哥他們，大家一起坐下來吃艾草糕，講些方才發生的趣事。山腳下有外省老兵開的雜貨店，我們去買冰棒、零食吃，兩隻手被草割到血絲滿滿，好痛哦，賺錢真的沒這麽容易啊！但是自己賺錢買的圓糖滋味，非常懷念。誰有這樣的經歷，請舉手？
