無懼客家人口最少　台南市府簽署「一代人救轉客話宣言」力拚客語友善環境

2023年04月19日

00:00

臺南客家事務委員會簽署「一代人救轉客話宣言」

【蘇佑昇／西湖海陸腔】臺南市政府客家事務委員會為著響應中央客家委員會「一代人救轉客話」个宣言，特別邀請幾下儕台南各界專業領域个人士共下簽署宣言！臺南客家事務委員會主委古秀妃表示，從1988年12月28「還?母語」大遊行，這場上世紀臺灣最大个客家運動之後，到今有35年了，當年各項訴求也定定仔執行了，這滿為著繼續傳承客家語言文化，摎客語帶進入去大家个現代生活，加上臺南市政府這幾下年當煞猛推動客語深根服務，希望分台南个細孲仔到大人，全部做得講客語，所以台南市政府也響應中央客家委員會个「一代人救轉客話」个宣言，目標係全力推動在2050年，臺灣有300萬儕共下來講客話，另外，有三大方向：一、制定《客語發展法》落實客語做國家語言个地位，全面完善客語環境，二、加強社區營造，提升客家文化意識，三、進行客語个現代基礎，分客語進入AI時代。

臺南市政府也講，雖然臺南毋係客家文化重點个發展區，客語人口个比例也係全國最低，毋過台南有111年度全國客語教學个績優人員謝明麟先生，同時也在舊年同步配合客家委員會法律規範修訂客語能力个認證獎勵計畫，新增加基礎級、高級還有專業級个獎勵，就係希望摎台南打造出一隻完善个客語發展環境，分國家語言做得永續發展。