文／李文煥，國中特殊教育教師，苗栗客家人（四縣腔）
「夜鷺」係一種夜行性个鳥仔，亻恩客人因爭厥叫聲呱呱，故所喊佢安到「夜鴰仔」，還過又因為厥形投仔親像日時頭田項个白鶴仔，故所又有客家鄉親喊佢安到「夜鶴仔」。夜鴰仔在暗晡頭飛行，呱呱个緊喊，就像向這世界宣告自家个存在。佢帶等愛摎情，飛過河壩田脣，為該兜煞猛打拚个人帶來一份恬靜同安慰。
夜鴰仔身胚長差毋多60 到70公分，背囊个鳥毛係深吊菜色，翼胛係深豬肝色。佢兜个頸根摎肚底弇等白色个鳥毛，非常滑過軟。夜鴰仔有十分長个腳髀摎大又有力个觜，這分佢兜做得專門捕食魚仔摎水生生物。在星光半夜，夜鴰仔會像一隻烏影樣在田肚河壩脣飛來飛去，佢兜會恬恬仔、定定仔在該絡食。
自從亻厓二十二歲該年，決心踏出家門去外地讀書到今，一?目既經二十六冬了。這恁多年來，亻厓旦勢日合夜在該打拚，對於夜鴰仔這隻鳥仔、這隻名仔，亻厓險險就會毋記得了!好得前一駁仔在「客家國」網路社群打嘴鼓个時節講著佢，正分亻厓重新拈轉頭擺个回憶。
暗晡夜，亻厓行在高鐵三路項愛轉屋，旋旋風又聽著當久無聽著个鳥仔叫-呱…呱。厥个叫聲一下仔就帶亻厓飛轉去頭擺，黏時就分亻厓回想起吾爸，吾爸佢係一個毋好講話、篤實个人，佢長透在暗晡頭一儕企在圳溝脣，看等夜鴰仔飛過、頓腳，阿爸深情个望著佢這兜，就像係在同佢兜對話。細人該央時，亻厓輒輒跈等阿爸共下端詳夜鴰仔，感受著該種恬靜、平和，還過享受同阿爸低聲講客話个兩子爺親情。
該當時，在苗栗田脣，火焰蟲乜會時時出現在亻恩俚个目珠前。佢兜用慢又靚个動作一?一?在暗夜裡肚，就好比夜鴰仔个叫聲共樣，逐擺个叫聲都代表亻厓同阿爸感情个交流。
愛，係人生中盡要緊个情感之一。在亻厓心肝肚，夜鴰仔乜係一種情感，一種分亻厓感動摎感慨个情感。夜鴰仔个呱呱叫聲，像係在該講話，傳達等佢个情感摎想法。可能亻恩無法度旦旦理解夜鴰仔个言語，毋故亻恩知得佢囥在肚項个情感，這兜情感，敢怕就係愛个力量。
夜鴰仔在暗晡頭低鳴、飛翔，亻厓个頭那裡背乜無停在該回憶過去个時光，還過該兜曾經同亻厓做伴个人。逐擺亻厓看等佢兜个形影，在心肝肚恬恬仔祈禱，希望這片土地項个人做得過到還較美好、過較快樂。夜鴰仔分亻厓感受著生命个價值，乜分亻恩體會著戴在莊下田園个幸福。到今，逐擺亻厓看等夜鴰仔飛過，亻厓感著自家个心靈分佢滿足了，乜愛承蒙這片土地分亻厓个一切。
華文
「夜鷺」是一種夜行性鳥類，我們客家人由於他的叫聲呱呱，因此叫他「夜鴰仔」，而又因其形態像白天田間的白鷺絲，因此又有客家鄉親叫他為「夜鶴仔」。夜鷺在暗夜中飛行，呱呱地叫著，彷彿在向這個世界宣告自己的存在。牠帶著愛和情，飛越田園，為那些辛勞打拚的人們帶來一份安靜和慰藉。
夜鷺身長約60至70公分，背部羽毛呈暗紫色，翅膀則呈深褐色。它們的脖子和腹部覆蓋著白色的羽毛，非常光滑柔軟。夜鷺有很長的腿和大有力的喙，這讓它們能夠專門捕食魚類和其他水生生物。在深夜裡，夜鷺會像一個黑影一樣在田裡河畔旁穿梭著，它們靜靜地慢慢地在那覓食。
自從我二十二歲那年，決心踏出家門到外地讀書至今，一眨眼已經二十六年了。過去這些年，我大多日已繼夜的在工作，對於夜鴰仔這個鳥、這個名，我差點就不記得了!好在前一陣子在「客家國」網路社群聊天時講起牠，才讓我重新拾回從前的回憶。
就在今晚，我走在回家的高鐵三路上，突然間又聽見久違的鳥叫聲呱…呱。它的叫聲一下子就帶我回轉從前，立刻讓我回想起我的阿爸，阿爸他是一位不善於言詞、篤實的人，他常在夜晚獨自站在圳溝邊，看著夜鷺、飛翔，阿爸深情地望著牠們，仿佛在
牠們對話。
小時候我經常跟著阿爸一起觀察夜鷺，感受到那種恬靜、平和，更享受著與阿爸低聲講著客話的父子親情。那時候在苗栗田邊，螢火蟲也會不時出現在我們的視野裡。牠們用緩慢而優美的動作閃爍於暗夜之中，正如同夜鷺的叫聲一樣，每一次的鳴叫都代表我和阿爸感情的交流。
愛，是人生中最重要的情感之一。在我心中，夜鷺也是一種情感，一種令我感動和感慨的情感。夜鷺的呱呱叫聲，像是在說話，傳達著牠的情感和思緒。或許我們無法完全理解夜鷺的言語，但我們可以感知到它蘊含的情感，這些情感，或許就是愛的力量。
夜鷺在暗夜中低鳴飛翔，我的思緒也不斷地回憶過去的時光，以及那些曾經陪伴過自己的人。每當我看著牠們的身影，在心中默默祈禱，希望這片土地上的人們能夠活得更加美好，更加快樂。夜鷺讓我感受到了生命的意義，也讓我們體會到了身處鄉下田園的幸福。至今，每當我看著夜鷺飛過，我感到自己的心靈被滿足了，也感謝著這片土地所賦予我的一切。
