金門酒廠首度公開遴選總經理　金門縣府：年薪逾232萬不算高！

2023年03月24日

00:00

金門酒廠1952年成立以來　第一擺公開徵選總經理

【蘇佑昇／西湖海陸腔】金門酒廠公司今晡日表示，金門酒廠个總經理進前全部係由金門縣政府派任人員來做總經理，毋過，今年起勢，改成公開徵選總經理，所以，金門酒廠在今年正月17，摎外界公開徵選總經理，也在今年2月初1起勢到2月半，做盡收到87儕報名徵選，之後在3月21該日，邀請到金門縣政府財政處、政風處派官員到現場，金門酒廠个董事長謝世傑也在現場見證，參加徵選總經理書面个資料。

這擺經過一系列委員會嚴格審查之後，今晡日金門酒廠公開宣布，金門酒廠總經理个人事案書面審查已經完成了，目前報名个87儕裡背，有40儕符合資格條件。

這擺个審查委員會係由董監事代表、機關學校代表、酒類同業公會、同鄉會推薦在台灣做生理个金門人士、金酒工會代表這兜專家學者組成个委員會。

毋過金門酒廠也講，這擺87儕報名，淨有40儕符合資格，所以審查委員會，會過在這40儕裡背，選出來最好个10儕，正過來邀請這10儕進行下一階段个面試，這隻面試，按算會在清明連假過後進行，假使面試有順利，就會選出來最好个總經理人選。

這隻分委員會選出來个最尾總經理个名單，會送入去金門酒廠个董事會，最尾董事會會通過之後，就會摎大家公布最新个金門酒廠个總經理人選。

對這擺係金門酒廠1952年成立以來，第一擺公開選總經理个事情，金門縣政府秘書長兼金酒公司个董事長謝世傑講，其實金門酒廠酒个總經理一隻月个薪水係14萬，加上年終獎金4.6隻月，待遇毋係講盡好，毋過假使新个總經理上任之後，帶領金門酒廠做出來好个業績，摎這滿个金門酒廠一年100億個銀个業績，帶上去到200億、還係講係300億個銀，金門酒廠來調整總經理个待遇薪水，自然一定毋會有問題个！

金門酒廠人力資源个經理許嘉祥也講，目前還在協調遴選委員个面試這10儕候選人个時間，按算會在清明連假之後辦理面試，審查標準包含「對白酒市場个認識个程度、行銷能力、營運能力、市場經驗、專業知識還有其它个面向，這兜審查全部愛有實際个表現成績，就係希望做得透過當面个溝通審查，選出來最好个金門酒廠个總經理人選。