肥咧30公斤正知擐大肚 台北市立動物園斑哥羚羊迎接新成員
【羅盛滿／新竹竹東海陸腔】台北市動物園今晡日宣布好消息，斑哥羚羊兩公婆「蘭雅」摎「梅忠忠」在舊年識共下戴一站仔，連保育人員都無意料著佢兜在短時間之內就做得順利打種，一直到發現「蘭雅」肥咧30公斤恁重，正確定細羚羊「元宵」已經來報到。
台北市立動物園今晡日發布新聞稿表示，相隔4年恁久，斑哥羚羊「蘭雅」今年2月初5再過一擺降下細羚羊。因為生日堵好係元宵節該日，保育人員就摎細羚羊个名仔安到「元宵」。
動物園講，「元宵」身體當砸磳，正降出來無幾多點鐘斯已經做得企䟘起來，在阿姆「蘭雅」自家飼奶照顧之下，正過兩三日个時間斯做得滿哪仔走，這下輒常會偎凴在阿姆「蘭雅」抑係阿姊「小雅」个脣頭，還會有樣跈樣个咬起地泥下个樹椏摎葉仔再過呸忒。
動物園說明，斑哥羚羊擐大肚个時間將近10隻月，一胎正降一隻，推算「蘭雅」大概係在舊年4月摎「梅忠忠」共下戴該時順利打種，但係無想著佢兜做得在恁短个時間肚就成功發子，一直到保育人員在舊年年底發現「蘭雅」肥咧將近30公斤恁重正確定正經有身項。
動物園發言人曹先紹講，園肚个斑哥羚羊繁殖成功，數量相當多，所以一直當細義个為羚羊族群進行計畫生育，舊年觀察著「蘭雅」摎「梅忠忠」有相背个行為過後，就摎佢兜兩儕分開來戴，還過密切關注「蘭雅」个狀況，因為斑哥羚羊个肚屎弧線毋顯明，該量時看起來單淨係一隻細肚屎，牽去分秤仔秤過正知講有擐子咧。
動物園提醒，斑哥羚羊个性體當細義又無膽，所以還細个「元宵」大體个時節都會囥起來毋分人看，歡迎大自家到非洲動物區尋看啊「元宵」个身影，但係請大家愛盡量降低聲音，講話愛細聲兜仔，正毋會嚇著佢兜儕。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
