文／陳美蓉，苗栗客人，這下歇在 新北市（北四縣腔）

這恁多年見到了11、12月仔，無論苗栗獅潭、新竹關西、桃園伯公岡都有仙草花節。各地都用吊菜色个仙草花，來講佢幾靚、幾浪漫，幾會哀奶人心仔，就係愛餳人去該遶尞。總講，人腳底有肥，打幫恁仔乜有好帶動在地个經濟發展。

仙草，原在本成係在田脣項無就大堋項野生个草仔，一等操持、惜福个客人會同佢挷起來晒燥變做仙草乾，還同佢縈到一只一只仔，放年放月，越放越香。等到熱天同佢拿來洗淨煲水食，清涼退火，熱著个人來食一等好。頭擺六月天公日頭旺旺仔會咬人，無論緊工食點心抑閒時閒節，熱熱係有仙草米篩目泡糖水來食啊，該斯一等湛哦。

問莊下九十零歲个老人家，佢講：「仙草，還吂得時開花就好同佢挷起來晒做仙草乾吔，?竟係吂識看過仙草開花喔，哪知得仙草花係麼个色。」該仰愛佢吂開花就挷呢？上網查正知，原來係佢吂開花前有豐富會凝凍个膠質成分，等到佢開花就無該營養價值了。今个看得著歸片仔開花打蒂吊菜色个花，其實係人工、有計畫專工種來畀開花愛分人看靚个，做得講係新興个景觀營造。

盡多人看著滿園吊菜色个仙草花，暢到恅著自家去到法國个普羅旺斯，無就係日本个北海道看薰衣草。恁仔又乜已好。總講，去到田莊下，看山看水抑看恁鬧个仙草花，無忒並絆，人都會心肝活活開。

毋過，講著滿園吊菜色个花，吾腦屎肚盡先想著「紫雲英」。紫雲英，看這名仔有試著佢像詩又像畫，像在林拶雲深所在个神祕仙女樣仔，帶來無止界个想像無？全毋會輸薰衣草抑仙草花啊！

紫雲英，?還做細人該下，田坵項到了翻耩仔割起來到翻轉年打田前，滿田浸青生到茸茸，一蕊蕊吊菜色个花，開在入軟習嫩像青毯仔个草面項。打早，吂燥个露水，同佢加添清新氣息，就像嬌尸撥撥仔个細妹卵仔樣仔在該做嬌。等到日頭箭啊下，該帶藍又帶粉个吊菜色，實在還高雅，同一般花園項無就路脣項看得著个花色幾無共樣仔，風來跈風搖，這片搖來該片去，就算恬風息氣，還係看得出佢幾像身裝嬌遽、青春窈窈仔个細阿姊仔樣仔，有一息媱，有一息嬌，等人惜，連蜂仔、揚擛仔都畀餳來跳舞呢。臨暗時頭，天腳紅霞映照滿田个紫雲英，又有一種歲月靜好个深遠同安然自在。

當久當久過後，?離開家鄉吔，紫雲英乜毋知哪久起勢就毋識再過看著吔。老人家講：「會知，仰會無忒？反正，農會分哪種綠肥作物，揢泥卵仔个人就種哪種啊！」

吓啊？！原來該央時?還細，竟係毋知紫雲英不過就係綠肥作物，毋係麼个餳得著人勾惹个名花，乜毋像細罔細，嗄係大家都會傳唱个茉莉花樣仔，作當認毋出來乜知有這種花。

問?會失望無？毋會啊。佢係?童年个花。有?跈阿婆去同佢割下來，愛拿去餵豬仔个身影；乜有屋下綯等來畜个黃狗仔，一放啊忒，暢到胚命仔走，走到田坵項輑輑輾，同紫雲英輪〈lien〉到這一搭熟熟，該一搭熟熟，吾公在門口緊喝咄又緊嘍，嗄又嘍狗毋轉个畫面啊！再過講，等春來打田同佢打入泥竇肚，就係下二冬禾仔个滋養，耕種人乜萬望五穀豐收糧滿倉，正經就係「化作春泥更護花」，這毋正浪漫，毋正哀奶人心！

紫雲英，愛再過見著厥魂影怕難，不過，本本係?夢中一等靚个色彩啊！

華語

近年來每到11、12月，無論苗栗獅潭、新竹關西、桃園富岡都有仙草花節。各地都以紫色的仙草花，說它有多美、多浪漫，多療癒人心，就是要吸引人去該地遊玩。總之，人潮便是錢潮，也藉此帶動地方的經濟發展。

仙草，以前原本是野生在田邊或田埂上，或者是河堤上的草，我們最勤奮、惜福的客家人會將之拔起來晒乾稱作仙草乾，還將之紮成一小只一小只的，經年累月的存放，越放越香。夏天時把它拿來洗淨煮水喝，清涼退火，中暑的人來吃最好了。往昔六月天，火辣的太陽彷彿會咬人，不論農忙時吃點心抑或是平常時日，燠熱的天氣若有仙草米苔目加糖水來吃，那可真是棒啊。

問鄉下九十多歲的老人家，他說：「仙草，尚未開花就要把它拔起來晒做仙草乾，我還真是不曾看過仙草開花呢，哪知道仙草花是什麼顏色。」為何要在其還未開花就得拔呢？上網查詢方知，原來是未開花前它有豐富的凝膠成分，待其開花便無那個營養價值了。而如今得以看到整片紫色的花海，其實是人工、有計畫栽種以供開花觀賞的，可說是新興的景觀營造。

許多人看著滿園紫色花海，高興得彷如去到法國的普羅旺斯，或者是日本的北海道欣賞薰衣草。這樣其實也很不錯。總之，去到鄉間，看山看水或者欣賞美麗的仙草花，少了羈絆，自然是心花朵朵開。

不過，說到滿園紫色的花，在我腦海裡首先想到「紫雲英」。紫雲英，觀其名是否覺得它如詩亦如畫，像在林密雲深處的神祕仙女般，有無盡的想像？絲毫不輸薰衣草或仙草花啊！

紫雲英，我還是孩提時，田裡到了二期稻作收割後直到來年整地前，滿田翠綠生意盎然，朵朵紫花，在柔軟嫩綠如毯的草上綻放。清晨，猶濕的露水，讓它增添幾許清新氣息，如同嬌滴滴的女孩兒在撒嬌。當陽光灑落，那有點藍又有點粉的紫色，真是高雅，迥異於一般花園裡或是路邊看得到的花色，隨風舞動，搖曳生姿，即便平靜無風，依舊顯現出其猶如身材姣好、青春洋溢的妙齡女子，有一些嫵媚，有一些嬌縱，惹人憐香惜玉，還招蜂引蝶來此跳曼波呢。日落黃昏，天際的紅霞映照滿田个紫雲英，有一種歲月靜好之深邃與悠然自在。

許久許久之後，我離開了家鄉，紫雲英也不知始於何時再不得見了。老人家說：「也不知啊，怎麼就沒了？反正，農會給我們哪種綠肥作物，我們務農的人就種哪種啊！」

啊？！原來當時我年紀小，竟爾不知紫雲英不過就是綠肥作物，非是什麼引人關注的名花，也不如小則小矣，卻是大家都琅琅上口的茉莉花，即便不認識它亦知其存在。

問我失望與否？不會啊。它是我童年的花。有我跟隨祖母去把它割下，欲餵豬食的身影；也有家裡繫繩豢養的黃狗，繩索一解放，載欣載奔，跑去田裡打滾，把紫雲英踩踏得東倒西歪，我祖父在門口不斷斥喝又不斷喊牠回來，卻又叫不回牠的畫面啊！再說，等春來整地時將它犁入田土裡，便是下一期稻子的滋養，莊稼人無不冀望五穀豐收糧滿倉，真的是「化作春泥更護花」，這不才是浪漫，不才是療癒人心。

紫雲英，恐怕再也難見芳蹤了，不過，不改其在我夢中最美的色彩啊！