過年前假鈔全台流竄　央行教3方法秒分辨真偽

2023年01月16日

00:00

請鄉親要細義這滿有假个一千銀票流通个消息

【苗栗西湖海陸腔／蘇佑昇】桃園市警察局八德分局正月初二接到報案，有2儕嫌犯駛車仔到檳榔攤用假个一千塊假个銀票買東西之後遽遽駛走，警察接到受害个檳榔攤報案之後，黏時調出來監視器查緝2儕嫌疑犯到案，同時也查扣這兩儕消費个假銀票一千塊進行鑑定。桃園市警察局八德分局講，這陣仔編號HR484268XD个假一千塊銀票已經在全台灣各縣市流通了，也有幾間攤商受害。
中央銀行提醒鄉親，這鬥假个一千塊假銀票應該係借等文具、變奇術道具个方法製作，其實手法品質當毋好，鄉親淨愛透過3著簡單个方法，第一係摸一下，用手摸銀票正面个數字還有文字，會有墨紋凸出紙面个感覺。

第二看一下，摎銀票橫15度角來看，就會有花紋還有1000塊个數字，第三，係轉一下，銀票个左下角還有背面左上角个「1000」數字，會出現金色還有青色个變化，另外，正面右側條狀箔膜，還有背面窗式安全線也會有七彩光影變化个效果，這鬥全部係銀票防偽个方法，請鄉親做得特別注意毋使愁。

可惡！千元假鈔流竄彰化　號碼竟藏「屁孩」嘲諷諧音

【生活中心／綜合報導】彰化夜市攤商發現有假鈔集團成員拿千元鈔票玩遊戲，利用找零機會換回真鈔，彰縣警局員林分局永…

台灣儕口移入還有移出个消息

根據內政部統計，民國107年到111年第3季，全台灣人口社會增加最多个鄉鎮市區係新竹縣竹北市，移入1萬9085儕；第二名增加个所在，係新北市林口區、淡水區，這兩著所在係因為新市鎮開發，餳到鄉親徙落來待。另外，從社會增加率來看，每一季平均人口移入率最高个所在係連江縣北竿鄉，第二名係新北市林口區、桃園市復興區。

根據內政部統計，107年到111年第3季，社會增加人數最多的20著鄉鎮市區，排名前十名分別係：

第一名新竹縣竹北市1萬9085儕

第二名新北市林口區1萬7160儕

第三名新北市淡水區1萬5901儕

第四名台中市北屯區1萬4565儕

第五名桃園市桃園區1萬2234儕

第六名桃園市中壢區1萬0449儕

第七名桃園市龜山區8651儕

第八名桃園市八德區7882儕

第九名新北市汐止區7347儕

第十名高雄市仁武區7106儕

另外社會增加人數最多个11名到20名，係桃園市楊梅區、台中市南屯區、新竹市東區、新北市五股區、高雄市楠梓區、台中市太平區、桃園市觀音區、台南市安南區、台南市善化區、新竹縣湖口鄉，內政部分析增加人口大部分係集中在六都。