平均地權條例三讀修正通過 遏止炒房5大重點一擺看
【羅盛滿／新竹竹東海陸腔】立法院院會今晡日三讀修正通過平均地權條例部分條文，分別有5大重點遏止炒房，包括限制換約轉售，重罰炒房行為，最高做得開罰新台幣5000萬銀，增加修訂檢舉獎金制度、私法人買屋改做許可制，還過5年以內做毋得移轉。
平均地權條例部分條文三讀修正通過个重點包括：第一，限制換約轉賣預售屋或者新起个樓仔屋買賣契約，買受人除了配偶、直系或者二親等內旁系血親，或者經過內政部公告个特殊情形之外，做毋得讓分第三人抑係轉賣分第三人；建商乜做毋得同意或者協助契約讓出去抑係轉賣出去，違反个人做得按照戶口開罰50萬銀以上300萬銀以下个罰鍰。
第二，重罰炒作行為，三讀通過條文明定，任何人做毋得散播無影無跡个資訊，影響不動產交易價數、透過雙方同謀協議做假个交易，營造熱銷个假象、利用違規銷售影響或者加價轉賣，還過明顯影響市場交易秩序或者操控市場、轉賣牟利。違反个人做得按照交易戶數，開罰100萬銀以上5000萬銀以下罰鍰，經過限期改正但係毋改正个人，還做得連續處罰。
第三，建立檢舉獎金制度，鄉親做得準備證據，摎地方政府檢舉不動產銷售買賣或者申報實價登錄違規行為，係講經過縣市政府查證過後確實有影，會由實收罰鍰總金額當中，提出一定比率金額做為檢舉獎金。
第四，增加修訂私法人買屋許可制，私法人買屋應當準備使用計畫，還過經過中央主管機關許可，同時限制私法人取得屋仔過後，在5年以內做毋得辦理移轉、讓與抑係預告登記。
第五，解約申報登錄，三讀通過條文明定，預售屋買賣契約假使有解約情形，建商應該在30日之內申報登錄資訊；申報登錄價數不實个人，會按照戶棟處罰3萬銀以上15萬銀以下罰鍰，還過做得按照次數處罰。另外，通過條文乜明定，這擺修正條文个施行日期，由行政院決定。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
（Android連結：https://reurl.cc/8GWlXd）
（IOS連結：https://reurl.cc/O1pb59）
