塔利班禁止細妹人讀 米國警告會造成嚴重後果
【羅盛滿／新竹竹東海陸腔】塔利班當局今晡日下令全國禁令，嚴格禁止阿富汗細妹人接受大學教育，延續這隻強硬派伊斯蘭組織打壓細妹人个受教權摎自由个作為。米國警告，塔利班恁樣形做、會造成嚴重个結果。
根據法國新聞社報導，塔利班（Taliban）舊年拿着政權該時、識保證會用較溫和个方式來做事，這下嗄毋顧國際社會个反對，對細妹人生活个各隻層面、加咧還較多个限制。
一封有高等教育部長納丁（Neda Mohammad Nadeem）簽名、寄分所有公私立大學个信仔寫講，「通知學校黏皮實施信仔頂項寫个細妹人教育中止令，一直到收着另外个通知」。
吂有3隻月以前，阿富汗全國有幾下千個年紀無共樣个細妹人正參加大學入學考試，盡多人立志決定ham+擺愛做教書个先生、抑係做醫生。
塔利班接管阿富汗政權以來，各大院校斯分佢兜強迫實施新个規定，包括細倈仔摎細妹仔隔離个教室還過入口；同時，摎細妹仔上課个教授也單淨做得係細妹人或者年紀較大个細倈人。
阿富汗十過歲个細妹仔大體已經被佢兜禁止接受中等教育，嚴重限制咧大學入學率。
還過細妹人也分佢兜逼出盡多个政府公職，抑係分佢兜減忒薪水、好來留在屋下肚。細妹人佢兜做毋得在無細倈人个親戚陪同之下出門旅行，出門必須歸身上下都愛包揫揫，最理想个打扮就係著等傳統个罩袍波卡（burqa）。
還過在11月份，細妹人也分佢兜禁止去公園、遊樂場、健身房還過公共洗身堂。
對細妹人个限制加上經濟壓力，法國新聞社上隻月訪問幾下戶阿富汗家庭該時，佢兜都講透過婚姻保障妹仔个未來，贏過分佢兜逐日閒閒囥在屋下肚。
針對塔利班最新个禁令，米國今晡日發言譴責，同時警告續等採取反制措施，分阿富汗進一步分國際社會孤立。
國務院發言人普萊斯（Ned Price）摎媒體表示，塔利班「這隻決定違反咧佢兜一再公開摎自家同胞做出个承諾，應該預料着恁樣形做、會分佢兜付出具體代價」。普萊斯補充講，米國「以最強烈个措辭」譴責塔利班个這項決定。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
