加入CPTPP 吳釗燮講：目前無堵著任何國家講毋支持台灣
【羅盛滿／新竹竹東海陸腔】外交部長吳釗燮今晡日在立法院備詢該時表示，在推動台灣加入「跨太平洋夥伴全面進步協定」（CPTPP）个過程當中，「目前為止還吂堵著一隻國家，公開抑係私下講佢兜毋支持?兜。」
澳洲總理艾班尼斯（Anthony Albanese）在11月18在APEC表示，單淨分大自家承認國家个正做得加入CPTPP，續等澳洲政府摎艾班尼斯都澄清表示，澳洲各黨派對支持台灣加入个立場無變。
立法院外交摎國防委員會今晡日審查112年度中央政府總預算案、有關外交部主管收支公開摎機密部分。無黨籍立委林昶佐、國民黨立委溫玉霞都關切台灣加入CPTPP个進度。
林昶佐質疑，台灣澄清澳洲總理發言該時，毋使自我矮化，主張經濟體乜做得加入CPTPP，應該大方講出台灣就係主權國家。
針對這件事情吳釗燮回應表示，外交部絕對毋允許台灣分人矮化，當澳洲總理恁樣形講話之後，外交部第一時間就黏時摎澳洲政府聯絡，在台灣這片乜黏皮摎澳洲駐台灣代表，表達講「到底在該講麼个」。
吳釗燮講，佢從當後生个時節就聽著社會賢達講過，假使台灣自己毋承認係一隻主權獨立个國家，就無條件要求其他國家承認台灣，外交部就係代表國家主權，這一點佢絕對會做著。
溫玉霞詢問目前有幾多隻國家支持台灣加入CPTPP，吳釗燮表示無法度具體回答數字，但係目前為止做得講係逐隻國家都當願意摎台灣進行非正式諮商，有兜原旦還毋了解台灣，抑係對台灣入會个態度較冷淡个國家，經過當煞猛溝通過後，乜採取較開放支持个態度。
另外台灣加入个時間表，吳釗燮講，英國入會申請還吂完成，台灣个案仔應該係等到英國入會案完成過後正會進行，所以速度係無辦法當遽个，但係到目前所知个，各隻國家係無人反對台灣加入个。
吳釗燮表示，明年紐西蘭係CPTPP秘書處又係主席，角色非常凸顯个，台灣摎紐西蘭之間个經濟貿易諮商相當頻繁，假使台灣做得維持高標準，還過做得摎所有其他會員國完整諮商、取得同意，佢相信紐西蘭應該係會支持个。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
