拜習會6大重點一擺看忒 談論台灣海峽、俄羅斯摎烏克蘭、北韓摎氣候危機
【羅盛滿／新竹竹東海陸腔】米國總統拜登摎中國國家主席習近平今晡日藉等出席印尼峇里島个G20峰會、舉行會場脣面對面會面，係拜登就任以來兩儕頭一擺會面。拜登會談過後表示無認為中國有黏皮侵犯台灣个打算。
續下來綜合法國新聞社這兜國外新聞報導所整理个6大重點分鄉親知。
1.台灣問題吂解決
拜登表示，佢認為中國「無黏皮侵犯台灣个打算」。毋過佢兜兩儕雖然發表友好聲明，針對這一場僵持毋讓个局勢嗄無新个講法，所以台灣問題共樣係一隻潛在个不定時炸彈。
拜登講：「?兜盡命牯維持台海和平摎穩定。」華府緊用這句話來表示米國希望台海維持現下狀況。
根據中國官方媒體新華通訊社報導，習近平提著「台灣問題係中國核心利益當中个核心，係中國摎米國關係政治基礎當中个基礎，係中國摎米國關係第一條做毋得跨越个紅線」、「台灣獨立摎台海和平穩定係無法度相容、相讓个」、「拜登總統先生講著當多擺無支持『台灣獨立』，無按算摎台灣做為謀求對中國競爭優勢、抑係遏制中國个工具。希望米國政府摎拜登總統先生个承諾做得做著來」。
2.見面三分情 雙方營造回暖
對雙方來講，這擺會面顯示華府摎北京个言辭交鋒暫時轉為較緩兜仔个和挼理念。佢兜兩儕扼手摎相借問、譫哆一下仔過後，共下愐起彼此交插來往个歷史。
習近平講：「自從您擔任總統以來，恩俚透過記者會、電話還過書信溝通，但係這兜都無法度取代面對面个交流。今晡日恩俚總算有咧這一場面對面會談。」
拜登乜呼應講：「面對面討論做得講係無法度取代个。斯像您所知个，?盡煞猛在該維持您摎?之間個人還過雙方政府所有部門个溝通管道順順序序。」
3.反對俄羅斯用核子武器
俄羅斯總統普丁（Vladimir Putin）今年2月分入侵烏克蘭過後，外界緊胚想中國會提供俄羅斯哪種政治、經濟甚至係軍事援助，但係到目前為止看起來「並無多」。
根據法國新聞社報導，在峇里島舉行个會談當中，拜登摎習近平都有共識个一點，係克里姆林宮在普丁大聲宣揚動用核子武器方面毋會得著支持。
米國透過會議聲明表示，拜登摎習近平兩儕強調「反對在烏克蘭境內使用，抑係宣揚愛使用核子武器」。
4.重返氣候危機合作
米國摎中國在這方面取得一兜仔成功，計劃恢復聯合作業，引導世界實現聯合國緩解全球暖化个目標。係因為中國當閼之前米國支持台灣，所以中國先前中斷相關聯絡。
拜登談著「針對需要恩俚雙方合作个迫切全球問題愛共下煞猛」；習近平宣布「人類社會面臨頭擺從來毋識有个挑戰，國際社會普遍期待中國摎米國處理好彼此个關係」。
5.拜登拉北京共下遏制北韓
拜登摎習近平講，中國有「義務」阻止北韓進行核子武器个爆炸試驗，若無，米國可能愛加強東亞地區个軍事存在，「?兜到時定著愛採取一兜仔還較具有防禦性个行動，雖然講這毋係針對中國」。
6.絕對無新冷戰个必要
根據中方對這場會談描述，習近平摎拜登講，中國摎米國兩隻國家个「共同利益毋係減少咧，係講變還較多咧」。
根據報導，習近平表示，北京當局个立場係「從來毋尋求改變現有个國際秩序，毋干涉米國个內政，並無挑事想愛挑戰摎取代米國」；拜登乜堅定表示，佢「絕對」認為「無需要新个冷戰」。（中央社）
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
