獵風者衛星暫定明年3月發射 蘇貞昌盼望台灣盡遽在太空占有重要地位
【羅盛滿／新竹竹東海陸腔】台灣第一枚自家製造个氣象衛星、名仔安到「獵風者」，暫定明年3月初10發射，行政院長蘇貞昌今晡日前往國家太空中心視察獵風者衛星个準備情形，表示台灣有自家製造火箭摎衛星个相關能力，希望盡遽在太空占有重要地位。
蘇貞昌講，這下全世界已經有9隻國家做得自家發射火箭，台灣還無法度。目前台灣有自家製造个火箭摎衛星个相關能量，台灣个半導體摎資訊通訊還過精密機械有最湛斗个力量。
太空中心主任吳宗信講，獵風者衛星係台灣第一枚自家做个氣象衛星，任務係提供海面觀測資料，還過驗證10項關鍵元件摎技術。
獵風者衛星有82%係由台灣研發製造，太空中心摎成功大學、中央大學、工業技術研究院，還過20零家協力廠商共下投入，推動太空科技進步。
獵風者衛星暫定2023年3月初10在法屬圭亞那太空中心發射。獵風者衛星升空之後，台灣自主設計製造个10項關鍵元件摎技術，完成太空實地環境个測試摎驗證，對進入國際太空產業供應鏈有幫助，係台灣太空產業進軍國際个新里程碑。
臺灣海洋大學觀音校區蚵螺石館動工 蔡總統講：培育海洋人才
國立臺灣海洋大學觀音校區蚵螺石摎海洋生態館，今晡日舉行開工動土典禮，推算做得在113年啟用。總統蔡英文表示，期待完工過後，做得成為在地个海洋人才育成基地。
海洋大學發布新聞稿表示，海洋大學觀音校區蚵螺石摎海洋生態館，係由桃園市政府以「無償撥用」方式提供土地，台灣電力公司摎中油公司補助工程經費，學校負責規劃摎興建。
海洋大學觀音校區續等會設立「蚵螺石摎海洋生態館」、「觀賞水族摎經濟水產研發中心」、「藻類培育區」、「創新智慧物流中心」還過「推廣教育中心」，除了推動蚵螺石生態保育，也會持續培育專業人才。
搞手機仔遊戲搞到手指變成像扡婆个爪 醫師講：尺神經壓迫造成手指頭變形
有一個35歲个細倈人好用手機仔搞遊戲，結果造成左手个蘸藥指摎手指尾瘸忒像扡婆个爪，台中市澄清醫院中港院區骨科醫師魏伯翰今晡日表示，這係因為尺神經壓迫所造成个手指頭變形需要開刀解決。
魏醫師指出，這個細倈人逐暗晡睡目以前都慣勢在眠床頂覆等，用雙手个手㬹撐等眠床做為支點，兩隻手緊搞手機仔遊戲，一搞就係幾下點鐘，這一站仔發現雙手个蘸藥指摎手指尾表面會麻痺，尤其左手个蘸藥指摎手指尾瘸忒像扡婆个爪共樣、當難伸直，麻痺到暗晡頭都睡毋落覺，正到醫院骨科分先生看。
醫師提醒鄉親，係講手㬹姿勢愛維持弓起來昶久个頭路，像係愛打電腦个、鋼琴家、整時錶、做金飾／金工个師傅這兜，還有長時間姿勢毋著，像係睡當晝用手髀做枕頭个人、抑係長時間搞手機仔个人，都有較高个機會得著肘神經症候群。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
（Android連結：https://reurl.cc/8GWlXd）
（IOS連結：https://reurl.cc/O1pb59）
