推特帳戶藍色勾仔个認證標章 馬斯克講：逐隻月愛收美金8個銀
【羅盛滿／新竹竹東海陸腔】推特（Twitter）个新頭家馬斯克今晡日講，推特續下來會摎使用者加減收兜帳號認證个費用，逐隻月愛收美金8個銀（差毋多新台幣260箍），認為這項計畫做得解決機器人帳戶摎食飽昶閒个酸民問題，同時為公司帶來新个收入。
排名世界好額人打頭名个馬斯克（Elon Musk）前幾日正完成美金440億個銀具有爭議个交易，變成獨自掌扼推特這間社群媒體个擎頭人，今晡日黏皮提出藍色勾仔認證標章个收費方案。
根據新計畫，有付錢个訂閱戶做得得著推特知名个藍色標記，標示這係拿著驗證、真工實料个帳戶。這項功能目前單淨提供分公眾人物，但係馬斯克形容這係「地主摎農民制度」个做法。
佢講，Twitter Blue訂閱戶在「回復、標記還過搜尋」个時節也做得得著「優先个權利」，表示這係針對「打擊垃圾帳戶摎詐騙做毋得欠个」。
目前有藍色勾仔个用戶係講無付錢，馬斯克續等會取消佢兜个認證標章。但係有兜使用者警告，假使推特摎佢兜收錢，佢兜會選擇直接離開、毋繼續使用。(中央社)
瑞典總理講：針對北大西洋公約組織在境內部署核子武器保持開放態度
瑞典總理克里斯特森今晡日表示，一旦瑞典變成北大西洋公約組織个會員國，佢會針對（北約）佢兜在瑞典境內部署核子武器保持開放態度；這項立場摎前朝政府完全無共樣。
兩隻禮拜以前接任總理个克里斯特森（Ulf Kristersson）在赫爾辛基（Helsinki）摎芬蘭總理馬林（Sanna Marin）舉行聯合記者會該時，發表頭先講个話。瑞典摎芬蘭共下申請加入北大西洋公約組織（NATO）。
詢問著兩國係毋係同意（北約）在佢兜个領土部署核子武器个時節，馬林回答講：「?兜不應該設下先決條件，?兜已經決定毋對未來个任何可能關上大門。」克里斯特森也表示同意。
另外，已經係北大西洋公約會員國个北歐鄰國丹麥摎挪威，拒絕在非戰爭時期在佢兜个領土建立永久性基地抑係部署核子武器。(中央社)
經濟部長講：台積電愛繼續在台灣投資先進製造流程 具有重要全球意義
傳出台積電1奈米先進个製造流程落腳桃園龍潭，經濟部長王美花今晡日表示，假使台積電愛繼續在台灣投資先進个製造流程，這係對台灣个肯定，乜在半導體製造供應鏈頂項具有重要个全球意義，政府當然愛做好水摎電、還過土地這兜个準備。
王美花講，台積電在全球半導體供應鏈製造領域占有重要地位，台灣半導體產業摎米國个IC設計、設備工廠，還過摎日本个材料工廠、歐洲个設備工廠，都係全球合作夥伴關係，還有台積電个客戶最多來自米國个企業，對台積電个全球規劃摎合作，政府當然係歡喜逐項事情做得順序成功。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
