文／陳美蓉  苗栗客人，這下歇在新北市（北四縣腔）

細人仔大吔，各各自家箍謀頭路，加已無閒，久久仔正一擺同?共下轉妹家。見係轉去，做阿婆儕看著男高髻大个孫仔，總係猛幾暢，笑到嘴弛弛仔。

毋過，佢乜總會帶愁帶愁仔問講：「阿明牯，你一餐食幾多碗飯？仰會七後生八後生就肚扐扐仔得著？」看等細个就問：「阿弘仔，無成你食个飯同若哥無共樣哪？仰逐擺看著你，就竹篙樣仔無較作肉呢？」

有影呢！平平食共飯盆頭飯、共桌菜，仰會一儕恁大絲，一儕恁伶梗呢？

有一日看著新聞報導講，照米國个一項研究報告指出，目毋足，人會想食還較多東西，會使致到肚屎个油分增加9%，內臟个油分增加11%。還過，內臟个油分緊來緊多，帶來个發炎反應、化學物質這兜，驚怕較會著著心血管疾病、糖尿病。講起來，目毋足毋單止會害人變大箍，乜驚怕係現下恁多人著著文明病个膿頭哦。

故所，醫生建議：對無辦法改變目毋足這種情形个人，該當對食雜愛知好謹，乜愛養成規律運動个好習慣，恁呢人个新陳代謝正會正常，身體正會康健。

看啊佢兩兄弟，平常時平平都做到星光無半夜正轉到屋，毋過，大个因為好煮食乜當會變食，故所，麼个半夜轉點吔，斯愛佢試著肚飢，自家就會幾皮仔青菜洗洗啊、幾粒仔槓丸抑火鑊料這兜、一粒卵、一細只仔麵線無就食伸个冷飯乜好，瓦斯爐一扚，兩下半就一鑊熟，燒熝熝仔食落肚，猛幾滿足。?就講佢，半夜吔還來食恁飽愛矺䗆蜱正得。佢做佢耳靴靴仔。等佢食飽又還愛坐到暢，正去洗身腳，洗盆身像洗金身樣仔，洗毋得好。等到上眠床，講較失禮兜仔人家早睡个人怕愛䟘床哩喲。?輒常話佢，莫總係恃夠夠仔自家還後生窈窈仔，毋知好惜命哪！?做?講，佢做佢詐無聽著，正經會畀閼死。背尾講到懶頭哩，乜無恁大神氣在該燒氣發冷氣，取在佢。細个就無共樣哦，坐尞一下仔，就去身腳洗洗啊睡目。做佢講个：「?輒常一日就食一餐定定」。

麼个毋一儕人總係肚蟈蟈仔，一儕人又總係像人無撿佢食樣仔，瘦羌瘦羌。

做阿婆儕乜知得，這下个人生活壓力大，總係頭路做到無閒洎杈，日仔過到日夜顛倒，盡多人無辦法照時間來睡目，還過目無足。毋過，佢還係笑笑仔同兩兄弟講：「認真做頭路好斯當好，斯講人毋係鐵打个，錢係長命人賺个，自家愛曉得顧身體吓，毋好分人煩愁，知無」。

華語：

小孩子大了，各自籌謀事業，更忙了，好久才一次和我一起回外婆家。每次回去，外婆看著人高馬大的孫子，總是非常欣喜，高興得嘴角上揚。

不過，她也總會略帶憂慮的問道：「阿明啊，你一餐吃幾碗飯啊？怎麼年紀輕輕便小腹凸出呢？」而看著小的就問說：「阿弘啊，難不成你吃的飯跟你哥哥不同？怎麼每次看到你，就瘦得像竹竿似的都沒長肉呢？」

還真是呢！一樣吃同鍋飯、同桌菜，怎會一個這麼福態，一個卻又似瘦皮猴呢？

一天，看到新聞報導說，依據美國的一項研究報告說，睡眠不足，會讓人更想吃東西，以至於腹部的脂肪增加9%，內臟的脂肪增加11%。而且，內臟的脂肪越來越多，引發的發炎反應、化學物質等等，會增加得著心血管疾病、糖尿病的風險。如此說來，睡眠不足不止會讓人發胖，也或恐是如今這麼多人罹患文明病的禍首哦。

所以，醫生建議：對無法改變睡眠不足這種情形的人，應該對飲食知所節制，也要養成規律運動的好習慣，如此新陳代謝才會正常，也才能維持身體健康。

看看他們兩兄弟，平日一樣都做到三更半夜才回家，但是，大的因為喜好烹飪也擅於廚藝，所以，無論深更半夜了，只要他覺得餓了，自己就會幾片青菜洗一洗、準備幾粒貢丸或火鍋料等、一顆蛋、一小把麵或是剩飯也好，瓦斯爐一開，三兩下就一鍋熟食，熱騰騰的下肚，好不滿足。我就念他，半夜了還吃得這麼飽是要壓死吸血的臭蟲嗎？他可充耳不聞呢。等他吃飽又還要坐好久，才去洗澡，洗個澡彷彿洗金身，洗超久的。等他上床，不客氣地說，早睡的人恐怕差不多要起床了。我常常勸他，別總是仗著自己還年輕，不知要珍惜生命哪！我說我的，他當作耳邊風，真的會被氣死。到後來懶得再說，也無意再搞得自己一肚子氣，隨便他了。小的可就不一樣哦，休息一會兒，便起身洗澡睡覺去。他常說：「我常常一天就吃一餐而已」。

難怪一個是身材發福，一個又總是像沒得吃一般，瘦巴巴的。

外婆也知道，現代人生活壓力大，總是忙於工作，日子過得日夜顛倒，許多人無法在正常時間上床睡覺，而且還睡眠不足。不過，她還是笑笑地和兩兄弟說：「認真工作是很好很不錯，只是人不是鐵打的，錢慢慢賺，自己要懂得照顧身體，不要讓人擔憂啊，知道嗎」。