伸最尾一隻月 蔡英文講：注文車單、湊朋友、轉家鄉打票
【羅盛滿／新竹竹東海陸腔】距離打票日伸一隻月，蔡英文總統今晡日提出3隻拜託：第一隻拜託係「注文車單」，佢講，愛拜託所有个選民朋友，特別係第一擺打票个首投族，這下就擎出手機仔，定好11月26轉家鄉个車票。
第二隻拜託係「湊朋友」，拜託大自家提醒身邊个親朋好友，共下注文車單、也共下關心家鄉个選舉。因為民主社會最珍貴个價值，就係大自家有權利投下神聖个一票，改變自家个家鄉。
最尾一隻拜託係「轉家鄉投下正確个一票」。佢呼籲選民朋友，11月26，定著愛轉家鄉打票，用手町个選票，支持18歲公民權過關，同時顧好家鄉，也顧好台灣个未來。
布吉納法索對抗聖戰份子 招募5萬儕人幫助軍隊反擊
非洲國家布吉納法索宣布，這隻禮拜起勢招募5萬儕个民防志願者，協助軍隊對抗聖戰份子。根據法新社報導，布吉納法索係全球最窮苦个國家之一，對2015年以來，一直在對抗聖戰份子叛亂；這兜叛亂輒常造成有人著傷抑係過身。
政府目前已經在各地開始招募3萬5千儕个志願者來保衛國家，佢兜个任務係摎安全部隊共下保護人民摎財產。還過昨晡日也宣布愛另外打造一隻1萬5千儕志願者个部隊，可能會分政府安排在全國各地。
聖戰份子控制布吉納法索差毋多4成領土。在昨晡日發生在北部城市吉波（Djibo）个最新一件攻擊案當中，至少有10儕布吉納法索个軍人過身。(中央社)
曾俊欣拿著ATP新生代總決賽參賽門票 係台灣第一儕拿著
台灣網球選手曾俊欣今年表現當打眼，世界職業網球協會(斯係ATP)官網今晡日宣布，曾俊欣拿著11月在義大利米蘭舉行个網壇新生代總決賽个參賽入場券，係台灣網壇第一儕人。
2017年創賽个新生代總決賽，單淨限定21歲以下、當年表現最好个8個後生球員正會受著邀請參賽，曾俊欣係世界職業網球協會今年公布个第6個受著邀請个球員，比賽續下來會在11月初8到12號在義大利米蘭舉行。
ATP提著，曾俊欣今年迎來生涯爆發个一隻賽季，毋單淨世界排名一口氣突破一百名之內，還過一度排在世界第83名，還過佢在2018年識包辦法國網球公開賽摎溫布頓網球錦標賽青少年細倈仔單打冠軍，分佢一下仔變成青少年世界球王。
本季表現打眼个曾俊欣，今年已經拿下2站ATP挑戰賽冠軍，還過在ATP巡迴賽當中拿著勝利，值得一提个係，今年網壇四大滿貫賽，曾俊欣都順利取得會內賽个入場券。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
