頭一批輝瑞兒童預防射配送40萬3千門
【羅盛滿／新竹竹東海陸腔】中央今晡日起勢配送第1批40萬3千門輝瑞兒童預防射到各縣市，其中新北市拿着个數量最多，一共5萬7千門，第二多个係台中市、有5萬6千門，第三多个係台北市、有5萬4千門。指揮中心強調，有意願注射个人、就做得注射。
中央流行疫情指揮中心下晝發布新聞稿說明，輝瑞COVID-19兒童預防射已經在今晡日陸續配送到各縣市，推算需求主要係5到11歲个各縣市人口數7成，扣忒原旦想愛注莫德納預防射个意願調查人數8成（推算注射）、還有確診人數進行分配，再過依照疾病盛行率再去加配部分縣市。
台南、高雄、屏東這兜6隻縣市落大水特報 嘉義、台南謹慎防範大雷雨
中央氣象局今晡日表示，滯留鋒面个影響，針對南投、嘉義以南6隻縣市發布落大水特報；另外針對嘉義縣市、台南市發布大雷雨即時訊息，請鄉親愛多加提防拚大水。
中央氣象局下晝發布落大水特報，滯留鋒面个影響，容易有短延時強落雨，嘉義以南摎南投所在有局部落大水發生，請鄉親愛多加注意?爧摎響雷公、強陣風還過河壩水暴漲。
落大水特報所在係南投縣、嘉義縣市、台南市、高雄市、還過屏東縣。
另外，氣象局針對嘉義縣市、台南市發布大雷雨即時訊息，謹慎防範拚大水、?爧摎響雷公、9級以上个強陣風，還過低能見度。
龜山島磺煙再過噴發 遊客暢到擎手機記錄奇景
龜山島龜首海域這幾日可能係因為海底火山个能量增加，過一擺噴出白色磺煙，重現「龜島磺煙」个奇景，分盡多船頂个遊客暢到耐毋得，紛紛擎手機記錄難得一見个自然奇景。
交通部觀光局東北角暨宜蘭海岸國家風景區管理處表示，「龜島磺煙」可能係因為地動造成海底磺煙洞口必縫變大所形成，或者當有可能係龜首泥石鬆軟㪐忒，石牯跌下來矺着磺煙洞口，造成洞口必縫變形，正會出現恁樣形个奇景。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
